Read Biete MARKA 10 Bible Online

MARKA 10 - Biete bible

MARKA 10

¹Khante, Jisuan kha mun khah a mâk a, Judai ramah a fe a, Jordan râl a kâi a. Khanchu, mipuihei a ziangah an hong ribûm nôk a, a tho ngai lam angkan anmani a lei inrisei a.

²Farisai ṭhenkah a ziangah an hong a, amah in-ôkna rangin, “Mîn a nupui ai mâk hih arthiang im?” itin an ridon a.

³Jisuan an ziangah, “Mosian ingkan im dân nangni ai pêk?” itin a sâm a.

⁴Khante, anni khan, “Mosian chu rimâkna lekha riziakin rimâk ai phal ngai a nit,” an ti a.

⁵Jisuan an ziangah, “Nin ilung khir sikin kêng kha thupêk khah riziak ai nit.

⁶Nikhomsela, rammual insianga rithokin Pathianin ipa neh nupang a siam a.

⁷Khasikah khan ipân a nu neh a pa mâng a ta, a nupui neh inrual an ta;

⁸khanchu, an ruaikah khan takpum khatkah hong ni tâng an ti. Inikah ni khâi mak a, pumkah an hong init tâk a nit.

⁹Pathianin a irzom tâk chu miriamin ṭhen tlak no riseh,” a ti a.

¹⁰Khante, insungah an lût tenan chu kôilômhei khan kha thu khah Jisua an ridon a.

¹¹Ani khan an ziangah, “Tukhom a nupui ima a, nupang dang inei chu a nupui khah a înrêsan a nit.

¹²Khangkah ngirin, nupang khomin a pasal iman ipa dang a neiin chu a înrê a nit” a ti a.

¹³Khante, Jisuan an chungah kut arngat theina rangin mi ṭhenkan naipangtehei a ziangah an hong ṭhui a; nikhomseh, kôilômhein an lei khap a.

¹⁴Khanniseh, Jisuan amakhah a mun chu a ning a thik a, a kôilômhei ziangah, “Naipangtehei ki ziangah inhong unla, khap no rei, Pathian ram chu hingkana mihei ta kêng ai nit.

¹⁵Nangni ke ril, tukhom naipangten Pathian Ram ai lôm angkana lôm ino chu a sungah lût tlak no nih,” a ti a.

¹⁶Khanungchu, naipangtehei khah a lei ikua a, an chungah a kut arngat a, ṭhat a vur tâk a.

¹⁷Khante, Jisuan ife ranga kal â thok nôk kaneh mi khatkah a hong itlân a, a makungah rikhûk a dil a, a ziangah, “Minriseitu ṭha, kumtluang ringna ki dong theina rangin im ki sin rang tâk?” itin ardon a.

¹⁸Jisuan a ziangah, “Ithôm iṭha ni ne iti? Pathian banah chu tute mi ṭha omak e.

¹⁹Thupêkhei kha chu ni riat khate, ‘Mi that no roh; inrê no roh; iruh no roh; milakin mi nô no roh; mi lêm no roh; ni nu neh ni pa ngîk roh’ itihei hi,” a ti a.

²⁰Khante, kha mi khan a ziangah, “Minriseitu, kha thupêkhei kha chu ki naipangte lâi ata kî zôm ngai tâk a nit,” a ti a.

²¹Jisuan kha mi khah a en ngit a, lungthlungna tak ineiin a ziangah, “Lam khatkah ni lar sam, fen la nî nei murdi zuar inla, a sum khah inrianghei peh roh; khanchu, rivânah richon nei ni ti; khanungchu, hong inla, ne zui roh,” a ti pêk a.

²²Kha mi khan kha ṭong khah a riatin chu a mâi a hong mûk zap a, sum itam takka nei a nit sikin ngaiinseh takkan a rot tâk a.

²³Jisuan a en vêl a, a kôilômhei ziangah, “Richonghei rangin chu ingkana Pathian Rama lût a întak rai tâk im na!” a ti a.

²⁴Khante, kôilômhei khan a thu sîr khah arkhêl an ti tak tak a; nikhomseh, Jisuan anni chu a sâm nôk a, an ziangah, “Naihei, Pathian Rama lût chu ân tak vang na!

²⁵Richong Pathian Rama lût nêkan chu iṭhim ikuara saringsei ilût ol ual a ti,” a ti a.

²⁶Kha tenan chu an ringai arkhêl tak tak a, an khâtin, “Khangkan a nit inte, tûm inring inih thei ranga?” an ti a.

²⁷Jisuan anmani a en a, an ziangah, “Amah khah miriam rangin chu ithei ni mak a, Pathian rangin chu ithei a nit; Pathian rangin chu tinrêng ithei a nit,” a ti a.

²⁸Khante, Peteran a ziangah, “En ta, keimani lakin tinrêng imah riaiin nang kin izui tâk a nit a,” a ti a.

²⁹Jisuan an ziangah, “Thudik nangni ke ril, tukhom keima sik neh Thurchi Ṭha sika a in manih, suapuihei manih, farhei manih, nu manih, pa manih, naihei manih, ramhei manih ima kangân chu,

³⁰hi damsung rengah hin inhei manih, suapuihei manih, farhei manih, nu manih, pa manih, naihei manih, ramhei manih a bâk rizakan mu nôk ngêt an ti, nuamlona khom mu sâng an ta, zoro la hong itlung ranga kumtluang ringna khom mu sâng an ti.

³¹Nikhomsela, mi itam takkah a masa taka omhei khah a nungkhôn takah la om an ta, a nungkhôn taka omhei khom a masatakah la om an ti,” a ti a.

³²Khante, Jisua neh a kôilômhei khah Jerusalema fe rangin lampuiah an om a, Jisua kha ma â sâk a, kôilômhei khan arkhêl an ti ok a; mipui â zuituhei khom khan an ṭi a. Khante, Jisuan Kôilôm Sômleiinikahei khah a ranin a ṭhui infiar a, a chunga thil hong itlung rang murdi khah â sîr pêk a.

³³“Ringai ta u, Jerusalemah ei ife rang a nit a, amakhan miriam Naipa hih thiampu lalhei neh Dân inriseituhei kuta inmanin om a ti. Ithi rangin a chungah thu rêl an ta, khanungchu, Jentailhei kutah pêng an ti.

³⁴Anni khan nuiza siamnan mang an ta, ichil an ta, hêm an ta, that an ti; nikhomseh, sûn thumka nungah chu thoinôk a ti,” a ti a.

³⁵Khante, Zebedaia naihei Jakoba neh Johana khan Jisua an hong nâi a, a ziangah, “Minriseitu, thil ni ne tho pêk ranga kin inuam a om,” an ti a.

³⁶Jisuan an ziangah, “Im nangni tho pêk inlang nin inuam?” a ti a.

³⁷Anni khan a ziangah, “Ni roinpuina Ramah ni rêngṭhungmun changtiang khatkah, voitiang khatkah ni ne înṭhung rangin kin inuam a nit,” an ti a.

³⁸Jisuan an ziangah, “Nin thil ngên hih nin iriat ino a nit. Tuangna kilât ki in rang hih nin iin thei rang mani? Baptisma ki chang rang khom hih nin ichang thei rang mani?” a ti a.

³⁹Anni khan, “Thei kin ti,” itin an sâm a. Jisuan an ziangah, “Ki kilât in rang kha chu in nin ta, baptisma ki chang rang khom kha chang nin ti.

⁴⁰Nikhomsela, ke changtiang manih, ke voitiang mania ṭhung rang chu keima zen rang ni mak a. Kha munhei kha chu Pathianin a inrifûk pêkhei pêng a ti,” a ti a.

⁴¹Kha thu khah kôilôm dang sômkahei khan an lei riata Jakoba neh Johana chungah khan an ning a thik tâk a.

⁴²Khanchu, Jisuan an rêngkan a koi a, an ziangah, “Jentailhei chunga roirêltua an iphunhei chu an chungah an inlal tak tak ngai a, an ruaituhei khom an chungah richam an nei tak tak ngai iti nin riat.

⁴³Nikhomsela, nin lâiah chu khangkah khan a nit rang ni mak e. Nin lâiah tukhomin â liantak ini a nuamin chu nin isom a nit bak ngêt rang a nit.

⁴⁴Khabanah nin lâia tukhomin a masatak ini a nuamin chu mi murdi suak a nit bak ngêt rang a nit.

⁴⁵Miriam Naipa lua khom mîn a sin an tho pêk ranga zuang ni mak a, mihei sin itho pêk rang neh mi tam takka ritlanna ranga a ringna peh rangin ai zuang a nit,” a ti a.

⁴⁶Khante, Jeriko khua a hong tlung a, a kôilômhei neh mipui itam takka neh Jerikoa rithokah khan Jisua a suak a; kutdo mitdel Timaia naipa Bartimaia lampui kôlah a lei iṭhung a.

⁴⁷Nazaret Jisua a nit iti a riat kaneh chu â khêk a, “Jisua, Davida Naipa, Lung nen kham roh,” a ti a.

⁴⁸Mi itam takkan idâirek rangin an ngo a; nikhomseh, ani khan, “Davida Naipa, lung nen kham roh,” itin â khêk ual ual a.

⁴⁹Jisua a ngîr a, “Ani khah hong koi ta u,” a ti a. Khanchu, mitdel khah an hong koi a, a ziangah, “Rithlaringam takkan om inla, thoi roh, nang a koi,” an ti pêk a.

⁵⁰Khante, ani khan a puanhei a pai a, artôp a, Jisua ziang tiang khah a pan tâk a.

⁵¹Jisuan a ziangah, “Im nang ki tho pêk ranga nî nuam?” itin ardon a. Mitdelah khan a ziangah, “Minriseitu, imuh thei ki nuam,” a ti a.

⁵²Khanchu, Jisuan, “Fe ta roh, ni iamna hih nî dampui a nit,” a ti pêk a. Khanungchu, a mu thei zel tâk a, lampuiah khan Jisua a zui sa tâk a.