Read Biete MARKA 11 Bible Online

MARKA 11 - Biete bible

MARKA 11

¹Khante, Jerusalem an tlung rangtoa Bethfage neh Bethani kho kôla Oliv tlâng an hong tlungin chu Jisuan a kôilômhei lâia mi inikah a tir a,

²an ziangah, “Nin matona khuaah son fe unla, nin tlung kaneh, tute la chuangna ngai no sakuartungte rithlung mûng nin ti; sût unla, hin hong kâi rei.

³Khante, mi tukhomin, ‘Ithôm nin ikâi?’ itin nangni an ridonin chu ‘Pumapan ai zong a nit, hong inthak nôk zel a ti,’ ti rei,” a ti a.

⁴Khanchu, an fe tâk a, kotbâi kôla rithlung, putiang lamiliana ding kha an va mu a, an sût tâk a.

⁵Khantaka ding mi tuhei manih khan an lei mu a, “Ithôm sakuartungte khah nin isût?” an ti a.

⁶Jisuan ân risei lam angkah takah khan an sâm a; khanungchu, an infe tâk a.

⁷Sakuartungte khah Jisua ziangah an hong kâi a, a chungah an puanhei an dâp a, Jisua kha a chuang tâk a.

⁸Mi itam takkan lampuiah an puanhei an dâp a, mi dang ṭhenkan sôl an sât a, an dâp sa a.

⁹Khante, â matianga fehei neh â nungtianga zui mipuihei khan, “Hosana! Pumapa riminga zuang chu inpâkin om riseh;

¹⁰Ram zuang itlung rang, ei Pa Davida ram chu, Inpâkin om riseh; Ân chungtakah khin Hosana,” itin an ikhêk a.

¹¹Khante, Jisua kha Jerusalem a tlungin chu Tempilah a fe a, thil tinrêng a en vêl a. Nikhomseh, kholoi a hong nit tâk sikin Kôilôm Sômleiinikahei neh Bethaniah an fe tâk a.

¹²Atûkah chu Bethania rithoka an hong kîr nôkin Jisua a von a hong ṭâm a.

¹³Khante, ilah vitkatah theichâng kung a nâ zîngdût hi a hei mu a, Â râ tite a om lôi im itin a va pun a. Khanniseh, a va tlungin chu a nâ ban chu îte mu mak a; theichâng irâ zoro khom ni mak a.

¹⁴Khanchu, Jisuan theichâng kung ziangah khan, “Atûna rithokin chu kumkhuakan tutên ne râ fah tlak khâi no riseh,” a ti a. A kôilômhei khomin amakhah an riat a.

¹⁵Khante, Jerusalem an hong tlungin chu Jisua kha Tempilah a va lût a, Tempila itika zuarhei neh richohei khah a ûmisua tâk a. Sum ithlenghei docham neh pharvali zuarhei ṭhungmun khom khah a nam inlîr pêk a.

¹⁶Khabanah, Tempilah khan tutên neinun ipêl a, an pâl thleng rang khom phal khâi mak a.

¹⁷Khanchu, mipuihei khah ân risei a, “‘Ki in chu nam tin ta ranga ṭongṭaina in tîng an ti,’ iti riziak ni mak im a? Nangnihei rêkin chu inruhei ipûkin kêng nin isiam tâk a nit hih,” a ti a.

¹⁸Amakhah thiampu lalhei neh Dân inriseituhei khan an lei riat a; khanchu, Jisua thatna rang lampui an zong tâk a, ân riseina khah mipuihei murdi khan an inlut ok sikin ani khah an ṭi a.

¹⁹Khante, kholoi a hong nitin chu Jisua neh a kôilômhei chu khopui ata khah an fe suak ngai a.

²⁰Atûk zîngah chu kha lampuiah an lôn malamin theichâng kung khah arzung idên dapka chârin an mu tâk a.

²¹Petera khan a riat suak a, Jisua ziangah, “Minriseitu, en ta, theichâng kung vâni nî sâm khah a châr vang tâk,” a ti a.

²²Jisuan an ziangah, “Pathian iam rei.

²³Thudik nangni ke ril, tukhomin hi tlâng ziangah hin, ‘Rithon inla, tuikhanglianah zur pai roh,’ ti sela, a lungrilah ringla tlak iloiin ai ti khah tlung a ti iti a iamin chu a ta rangin isinin om a ti.

²⁴Khasikin, nangni ke ril, itinrêng ṭongṭaia nin ini tâk kangân chu imu tâkin ringai unla; khanchu, isin pêk nîng nin ti.

²⁵Khante, ṭongṭai ranga nin iding zoro khomin mi chungah nuarna nin neiin chu izâ rei; khanchu, nin Pa rivâna mi khomin nin ichâinahei khah nangni zâ thei a ti.

²⁶Mi nin izâ non chu nin Pa rivâna mi khomin nangni zâ no nih,” a ti a.

²⁷Khante, Jerusalem an hong tlung nôk a; Tempilah arfang vêl lâiin thiampu lalhei, Dân inriseituhei neh upahei Jisua ziangah an hong a.

²⁸A ziangah, “Tu richamin im hihei hih nî sin? Hi richamneina hih tu nang ipêk mani?” itin an ridon a.

²⁹Jisuan an ziangah, “Kei khomin ṭongbâikah nangni ridon ki ti; ne sâm unla; khanchu, kei khomin tu richamin im hihei hih kî sin nangni ril ki ti.

³⁰Johana baptisma khah, Pathiana rithok im, miriama rithok im? Ne sâm rei,” a ti a.

³¹Khanchu, an khâtin an risêl a, “Im ei ti rang tak? ‘Pathiana rithok,’ ei ti lakin, ‘Khateh ithôm Johana khah nin iam no?’ ne tîng a ta.

³²‘Miriama rithok’ ei iti rang mani?” an ti a. Nikhomseh, mi tinin Johana khah zânthla titakin an ipom khap sikin mipuihei laka an ṭi a.

³³Khanchu, Jisua kha an sâm a, “Reh mang ung e,” an ti a. Jisua khom khan an ziangah, “Kei khomin tu richamin im hihei hih kî sin nangni ril bîk no ning e,” a ti a.