Read Biete MARKA 12 Bible Online

MARKA 12 - Biete bible

MARKA 12

¹Khante, Jisuan ṭongrikhekin an ziangah thu â sîr a, “Voikah chu mi khatkan grep rikul a siam a, idâiin arkul a, grep sômkhur a choih a, ngâkna in risâng a sin a. Khanchu, loi ienkol ranghei ziangah a pêk a, ram dangah ân zin tâk a.

²Khante, grep rimal zoro a hong nitin chu a dongtum ilah rangin â enkolhei ziangah a suak khatkah a tir a.

³Enkoltuhei khan suak khah an lei man a, an hêm a, kut korongin an infe nôk a.

⁴Khante, ani khan suak dang a tir nôk a, khah khom khah a lu an lei itôk iphop pêk a, mualphoi an lei sak ral a.

⁵Khanungchu, ani khan suak dang a tir nôk a, kha vâng kha chu an lei that a. Suak dang itam takka khom kha ṭhenkah an lei hêm a, ṭhenkah an lei that a.

⁶Khante, mi itir rang khatkah, a naipa lungthlung tak bang kha a nei tâk a, ‘Ki naipa hi chu marit lei tho ngêt an ti,’ itin a naipa khah a nungkhôn takah a tir tâk a.

⁷Nikhomsela, rikul ienkoltuhei khan, ‘Hi mi hih rikul chongpu naipa a nit hih. Hong rei, that ei ta, archon lua rang hih eimanin ei donga rang,’ itin an risôn a.

⁸Khanchu, a naipa khah an man a, an that a, a ruak khom grep rikul putiang an pai tâk a.

⁹“Khateh, rikul chongpu khan im a hong ilo rang tâk? Hong a ta, kha rikul enkoltuhei khah that a ta, grep rikul khah enkoltu danghei pêng a ti.

¹⁰Hi Pathian thu hih nin itep ino mani? “‘In isintuhein mangmunboi itia lung an ipai khah, Kha lung ngêi khah â kila lung kâmiom tak a chang tâk.

¹¹Amakhah Pumapa itho a nit a, Ei mitmuah hin arkhêl vang na!’ iti hih,” a ti a.

¹²Khanchu, kha ṭongrikhek khah anmani demin a isîr a nit iti an riat sikin amah iman an tum a; khanniseh, mipui an ṭi sikin ani khah an mâk a, an rot tâk a.

¹³Khante, a thu sîra rithoka man rangin Farisai ṭhenkahei neh Heroda pôla mi ṭhenkahei a ziangah an tir a.

¹⁴Kha mihei khah a ziangah an hong a, “Minriseitu, mi diktak ni nit a, tute lunghâng nî tho ual omak iti kin riat, tute ithlei ual loiin theidôrkan Pathian thu nen risei ngai a; khateh, Kaisara zianga sia chôi hih arthiang im, rithiang mak im? Kin ipêk rang im, kin ipêk ino rang im?” an ti a.

¹⁵Jisuan an vârriletzia khah a riat ṭiana, an ziangah, “Ithôm nin ne irnak? Duli [12] hong chôi ta u, lei en rong,” a ti a.

¹⁶Khanchu, an hong chôi pêk a, ani khan an ziangah, “Tu rimil neh tu riming im ai nit hi?” itin ardon a. Anni khan, “Kaisara” itin an sâm a.

¹⁷Khanchu, Jisuan an ziangah, “Kaisara ta chu Kaisara peh unla, Pathian ta chu Pathian peh rei,” a ti a. Khanchu, Jisua chungah khan an ringai arkhêl tak tak a.

¹⁸Khante, thoinôkna omak iti ngai Sadukaihei khom kha Jisua ziangah an hong a,

¹⁹“Minriseitu, Mosian hi dân hih kin ta rangin arziak a, ‘Tukhomin nai nei loiin thi sela, a nupui khah unaipa khan a nei ngêt rang a nit, a ulianpa ta rangah khan richi ân nei rang a nit,’ iti hih.

²⁰Voikata chu urêng parual sarikah an om a; a ulian takin nupui a nei a, richi nei loiin a thi a.

²¹Khanungchu, â nikna khan a nei nôk a, richi nei loi ngirin a thi nôk tâk a. Â thumna khom khangkah ngirin a nit a.

²²A nuaiahei khom khangkah korong an nit a; parual sarikahei khan kha nupang khah nupuiin an lua seng a, tutên nai nei loiin an thi riai a. A nungkhôn takah chu nupangnu khom khah a thi tâk a.

²³Thoinôknaah khan tu nupui tak im ai nit rang tâk? Kha pasal sarikahei khan nupui lakin an rêngkan an lua seng a,” an ti a.

²⁴Jisuan an ziangah, “Nin ringai insual tak vang na! Itho sik im ai nit nin riat im? Pathian thu neh Pathian ritha nin riat no sika a nit.

²⁵Mithihei an hong thoinôk tenan chu rivâna vântirtônhei angkan om tâng an ta, nupui pasal rinei khâi no nih.

²⁶Khante, mithihei kâiithoia an om rang thurchi-ah khan chu, Mosia lekhabua sûlribuka meiichok thu kha nin itep ngai ino mani? Pathianin Mosia ziangah, ‘Keimah hi Abrahama Pathian, Isaka Pathian, Jakoba Pathian ki nit,’ ai ti khah.

²⁷Ani chu mithi Pathian ni mak a, iringhei Pathian kêng ai nit. Nin irngai insual ok a nit hih,” a ti a.

²⁸Dân inriseitu khatkan an thu sîrhei khah a riat a. Jisuan Sadukaihei khah a sâm inṭhat iti a riatin chu a ziangah, “Thupêk murdi lâiah a îhîm a kâmiom tak?” itin ardon a.

²⁹Jisuan a ziangah, “A kâmiom tak chu amahih a nit, ‘O Israel, ringai roh, Pumapa ei Pathian bang hi Pumapa chu a nit.

³⁰Pumapa ni Pathian chu ni lungril murdin, ni ringna murdin, ni lunginṭong murdin, ni râtna murdin lung ni thlung rang a nit,’ iti hih.

³¹Â nikna a kâmiom chu amahih a nit, ‘Nangmah lung ni irthlung angkan ni bungahei lungthlung roh’ iti hih. Hi inika nêka thupêk kâmiom ual zel omak e,” a ti a.

³²Dân inriseitu khan Jisua ziangah, “A nit titak, Minriseitu, Pumapa bang hih Pathian a nit a, ama banah chu Pathian dang zel omak e.

³³Khasikin, Pathian chu miriamin a lungril murdin, a lunginṭong murdin, a râtna murdin, lung a thlung ngêt rang a nit a. Khabanah amah lung a irthlung angkan a bungahei khom lung a thlung rang a nit. Pathian zianga pumhâl thillan neh ribôlna danghei murdi nêkan khom kha thupêk inikahei izôm khah a kâm ai om ual tak tak a nit iti hih, ni ti indik a nit,” a ti a.

³⁴Khante, ivâr takkan a sâm iti Jisuan a riatin a ziangah, “Pathian Ram chu nî lat ino a nit,” a ti a. Kha rizoia rithokah khan chu tutên ṭong rêng rêng ridon ngam khâi mak a.

³⁵Khante, Jisuan Tempilah ân risei lâiin an ziangah, “Ingkan im Dân inriseituhei hin Mesia chu Davida richia mi a nit an iti thei?

³⁶Amah Davida ngêi khan Rithla Rithianga rithuak khuma thu sîrin: “‘Pumapa khan ki Pumapa ziangah, Ke changtiang iṭhung mai roh, Ne râlhei ni kezâ nuaiah ki sia mâkah chu,’ ai ti a nit.

³⁷Amah Davida ngêi khan ani khah ‘Pumapa’ a ti a. Khangkan a nit inteh ingkam Mesia hih Davida richia mi a nit thei rang a?” a ti a. Mipui ribûm itam takkan Jisua thu sîr khah ilôm takkan an ringai a.

³⁸Anmani ân risei a, an ziangah, “Dân inriseituhei ata ridîn rei, anni chu zakorfual ihâka lêng an nuam ngai a, bazâr muna chibai ribûk hei,

³⁹inkhôm ina ṭhungmun iṭhatak hei, ruaiṭhe muna mun iṭha takhei an ringen ngai a.

⁴⁰Numei sum an fâk a, mi lêm nan isôt tak takkah an ṭongṭai ngai a. Kha sikah khan an kuttum tuang inrik ual tak tak a ti,” a ti a.

⁴¹Khante, Jisua kha Tempila tholôm bôm kôlah khan â ṭhung a, mihein tholôm bôma tholôm an tlâk lâi khah a lei thlîr ṭian a. Mi richong tak takhei khan sum itam tak takkah an tlâk a.

⁴²Khante, numei inriangte a hong a, damali inikah [13] a tlâk a, amakhah poisa khatka dôrkah a nit.

⁴³Khanungchu, Jisuan a kôilômhei khah a koi bûm a, an ziangah, “Thudik nangni ke ril; mi danghei murdi nêkan hi numei inriangte hin tholôm bômah tholôm a tlâk intam ual.

⁴⁴Mi danghein chu an inei inliap, an mangbân an hong tlâk a, ani hin chu ân riang lamin a neisun, a nuk itûkna ai tlâk rip a nit,” a ti a.