Read Biete MARKA 13 Bible Online

MARKA 13 - Biete bible

MARKA 13

¹Khante, Jisua Tempila rithoka a suak lâiin a kôilômhei lâia khatkan a ziangah, “Minriseitu, en ta, a lunghei hih a lianin, a inhei hih a ṭhatin ringai rikhêl om tlia hi,” a ti a.

²Jisuan a sâm a, “Hi in ilianhei hih ni mu na? Hi lung richuanhei rêng rêng hih khatka lua isim loia ima om no nih,” a ti a.

³Khante, Tempil ridîn, Oliv tlângah â ṭhung lâiin a ziangah Petera, Jakoba, Johana neh Andria hei khah inrûkkan an hong a;

⁴“Amakhah tikin im a hong om rang? Khabanah khahei a hong tlung rangin im risin a hong iom rang? Ne ril ta,” an ti a.

⁵Jisuan an ziangah, “Tutên nangni an lêm nona rangin ridîn rei.

⁶Ker ming ichingin ‘Keimah hi Krista ki nit’ itin mi tam takkah la hong an ta, mi tam takkah la lêm an ti.

⁷Khante, inâi tenga ridoi rihu hei, ilavita ridoi thurchihei nin riat tikin lunginzîng no rei. Amakhah chu â om ngêt rang a nit. Nikhomsela, zoro mongna chu la ni tak no nih.

⁸Nam neh nam lar doi an ta; ram neh ram lar doi an ti. Mun tinah nînu inîng a ta, iṭâm la thlâng a ti. Amakhah naihasê riphutna angkah nîng a ti.

⁹“Khanniseh, nangni chu ridîn rei. Iman la nîng nin ta, roirêl munah iṭhuiin la om nin ti. Inkhôm inheiah ihêm la nîng nin ta, anmani Thurchi Ṭha nin isîrpêk theina rangin ker ming sikin roirêltuhei neh rênghei makungah la ngîr nin ti.

¹⁰Mongna khah a hong tlung man Thurchi Ṭha hih nam tin tin ziangah isîrin a om bak ngêt rang a nit.

¹¹Imanin nin om a, roirêl munah iṭhuiin nin om tika nin ti rang lei ingaituan nin ilung lei inbuai no rei; a zoro takah inriaa nin iom tak kha nin ti rang a nit; â ṭongtu khah nangmani ni no tin ua, Rithla Rithiang ai nit rang a nit.

¹²Urêng khomin ithat rangin inzirpui lân man an ta, Pa khomin a naihei lân man a ta, naihei khomin an nu neh pahei la doi an ta, that an ti.

¹³Keima sikin mi tinin nangni la nel an ti; nikhomsela, tukhom a mong idêna tuang idiar chu, kha mihei ngêi khah inringin om an ti.

¹⁴“Mangsang Porinche khah â ding nona rangah â ding la mûng nin ti, (â tepkan a omzia reh riseh), kha tikin chu Judai rama omhei khah itlângah lâizâm tho riseh.

¹⁵In chunga om khan chu iṭumin a insungah neinun zu lah no riseh.

¹⁶Loia om khomin a puan ilah rangin insungah kîr no riseh.

¹⁷Kha nikhuahei khah nupang nai ivonghei neh naite pom lâihei rangin chu ân rît rang vang na!

¹⁸Khahei khah phalbiah a tlung nona rangin ṭongṭai rei.

¹⁹Kha nikhuaheia inkhôkna zuang itlung kha chu Pathianin rammual a siam phut ata vuani tena la om ngai ino, tiklâi khoma om nôk tlak khâi ino rang chu a nit.

²⁰Nikhomsela, Pumapan kha nikhuahei khah a întôi a nit; intôi no sela chu miriam tute ring no nih. A mi rithlanghei sikin kha nikhuahei khah a întôi a nit.

²¹“Kha zoro tikah khan, tukhomin nin ziangah, ‘En ta u, Mesia chu hin a om,’ manih, ‘En ta u, son a om,’ manih an ti khomin taksôn no rei.

²²Mesia lem neh zânthla lem an la hong isuak rang a nit a, thei selan chu Pathian mi rithlanghei tena khom an lêm theina rangin sinrikhêlhei neh thilrikhêlhei khom thông an ti.

²³Nangni chu ridîn rei, a zoro tlung man tinrêng nangni ki lei îril vang tâk a nit.

²⁴“Kha hun inrît khah a thleng nungah khan inî hong zîng a ta, ithla khom vâr khâi no nia,

²⁵rivâna rithokin ârsihei ṭul an ta, rivâna sinthotheinahei khom innîngin om a ti.

²⁶Khanungchu, Miriam Naipa hi sinthotheina liantak neh roinpui takka sûm lâia zuang mu tâng an ti.

²⁷Kha tikin chu vântirtônhei kha tir suak a ta, Pathian mi rithlanghei chu kôlkomong ata kiangtianga kôlkomong idêna rammual kil ilika sung ata lôrkhôm tâng a ti.

²⁸“Khanchu, theichâng kung omdâna rithokah hin risei rei. Â ṭanghei rizîk a hong vôr a, a nâ a hong indonin chu kholum a nâi tâk iti nin riat ngai.

²⁹Khangkah ngirin, nangni khomin khahei murdi khah a hong tlung nin mu tikin chu ani khah a zuang nâi tâk a, inkot bul rengah a om tâk iti reh rei.

³⁰Thudik nangni ke ril, khahei murdi khah a hong tlung mâkah chu atûn lâia rualitharhei hih thi vang no nih iti remai rei.

³¹Rinêng neh rivân boi a ta, ki thu chu boi tlak no nih.

³²“Khannisela, kha nikhua neh a zoro chu Pa banah chu tutên reh mak e, rivâna vântirtônhei khomin, Naipa khomin reh mak e.

³³Ridîn unla, intûng ṭiankan om rei, kha zoro khah nin iriat ino a nit.

³⁴Mîn a in imaa ram dangah ân zin ranga, â somhei zianga an sintho rang chita richamneina inkol a, inkot ingâktu khom intûng ṭianka om ranga he be thlâma, ram ilah taka inzin angkah hi a nit.

³⁵Khasikin, intûng ṭiankan om rei, in chongpu hong rang zoro khah kholoi âm, zân âm, ârkhuan âm, zîng âm ai nit rang nin iriat ino a nit a;

³⁶khasikin, voikarengin a hong tlung duaiin chu iin thlarin nangni hong mu duai a ti.

³⁷Nin zianga ki îsîr hih mi murdi ta ranga sîr ki nit, intûng ṭiankan om rei,” a ti a.