Read Biete MARKA 14 Bible Online

MARKA 14 - Biete bible

MARKA 14

¹Khante, Kalkan Kût neh Bairiam Kût rang sûn nika matonah thiampu lalhei neh Dân inriseituhei khan Jisua inrûkka imana ithat rangin lampui an zong mai a.

²Anni khan, “Kût sungin chu ni no seh, mipui vântlâng lâiah buaina a suak duai lôiin,” an ti a.

³Khante, Bethaniah, iphâr Simona inah Jisua a om a, bu a nêk lâiin nupang khatkan nard siriak namhoi man ilutak alabastar bûrin a hong chôi a, a bûr khah â khoi a, Jisua luah a buak a.

⁴Khantaka om mi ṭhenkah kha an ilung hoi mak a, anmani lâiah, “Îtho rang im hi siriak namhoi hih a înrichêk hi?

⁵Duli rizathumka nêka tam man a nit a, izuara a sum khah inrianghei ipeh thei kêng ai nit,” itin kha nupang chungah khan an riphun a.

⁶Khanniseh, Jisuan an ziangah, “Rikôk no rei, ithôm nin înbuai hi? Ki chungah hin thil iṭha neh enihoi tak ai tho a nit.

⁷Inrianghei chu nin zianga om mai an nit a, nin nuam tik tikah nin isan thei a nit. Kei chu nin ziangah om mai no ning e.

⁸A theilam dôrkah ai tho a nit; ki takpum hih iphûm ranga siriak namhoi a lei ibuak thlâm a nit.

⁹Thudik nangni ke ril, rammual pumpuiah Thurchi Ṭha hi an isîrna kipah hi nupangnu sintho khom hih ama riatmaina rangin isîr sa ngai an ti,” a ti a.

¹⁰Khante, Kôilôm Sômleiinikahei lâia Juda Iskariota khan Jisua ân man theina rangin thiampu lalhei ziangah a fe a.

¹¹Amakhah an lei riatin chu an lôm tak tak a, sum ipeh rangin an inkung a. Khanchu, Juda khan ân man theina rang zoron ṭum a zong tâk a.

¹²Khante, Bairiam Kût sûn masatak, Kalkan Kût berate an that ngai nî-ah khan a kôilômhein a ziangah, “Kalkan Kût ruai hih takâm nang vân rifûk pêk unlang ni nuam?” itin Jisua an ridon a.

¹³Khante, a kôilômhei lâia mi inikah a tir a, an ziangah, “Khopuiah va fe unla, ipa khatkah bêla tui ichôiin nangni lei tong a ti; ani khah zui unla,

¹⁴a lûtna taka in chongpu ziangah khan, ‘Minriseitun ki kôilômhei neh Kalkan Kût ruai kin fâkna rang chontan khah taka hîm? a ti,’ va ti rei.

¹⁵Khanungchu, amah ngêiin chontan chuanchung rizat tak, neinun om isai, rêlinfel diam nangni inmûng a ta, amakhan ei ta rangin vân rifûk rei,” a ti a.

¹⁶Khanchu, kôilômhei khah an suak a, khopuiah khan an fe a, Jisuan â ril lam takkan tinrêng an va mu a, Kalkan Kût ruai khah an inrifûk tâk a.

¹⁷Khante, kholoi a hong nitin chu Jisua kha Kôilôm Sômleiinikahei neh an va fe tâk a.

¹⁸Khante, khalai an rikhîl lâi takin Jisuan, “Thudik nangni ke ril, nin lâia mi khatkah, khalai ner khîlpuitu ngêi hin nen man a ti,” a ti a.

¹⁹Khanchu, kôilômhei khah an ilung a zîng tâk a, an sik sikah a ziangah, “Keima mani?” itin an ridon chit a.

²⁰Jisuan an ziangah, “Sômleiinika lâia khatkah, khêng ne otpuitu ngêi hih a nit.

²¹Pathian Thubûn, Miriam Naipa hi thîng a ti, a lei iti angkah takin ai thi rang a nit; khanniseh, Miriam Naipa inmantu chung chu ân khôk rang vang na! Kha miriam kha chu ai suak ino ni seh a ta rangin ai ṭhat ual rang a nit,” a ti a.

²²Khante, an fâk lâiah khan Jisuan ibai a lâk a, lômthu â sîr a, a khoi a, an ziangah a pêk a, “Lah unla fah rei, amahih ki taksa a nit,” a ti a.

²³Khanungchu, Kilât khom khah a lâk a, Pathian ziangah lômthu â sîr zoiin an ziangah a pêk a; kilât sunga om khah an rêngkan an in tâk a.

²⁴Khanchu, Jisuan an ziangah, “Amahih ki thisen, Pathian thuthlung namindetna, mi tam takka ranga suak rang chu a nit.

²⁵Thudik nangni ke ril, Pathian rama uain ithar ki in nikhua a tlung mâkah chu hi uain hih in nôk khâi no ning e,” a ti a.

²⁶Khanungchu, la an sak a, an sak zoiin chu Oliv tlângah an fe tâk a.

²⁷Khante, Jisuan an ziangah, “Nin rêngkan lâizâm thông nin ta, ne la mah riai nin ti. ‘Pathianin berapu khah that a ta, berahei khah rithekindar chit an ti,’ iti Pathian thubu-a riziak angkah khan.

²⁸Nikhomsela, kâiithoia ki om nungin Galili ramah nin matonah lei fêng ki ti,” a ti a.

²⁹Peteran a ziangah, “A rêngkan nang mah riai khom seh, keiman chu nang mah tlak no ning e,” a ti a.

³⁰Jisuan Petera ziangah, “Thudik nang ke ril, vuanzân voinik âr khuang man nangman voi thumkah ne phial ni ti,” a ti pêk a.

³¹Peteran ṭong ikhir ualin a sâm a, a ziangah, “Ni thinaah khan thi sa rang khom inlang nang phial tlak no ning e,” a ti a. Kôilôm danghei khomin khangkah rongin an ti chit a.

³²Khante, rikul khatkah, Gethsemani an iti mun khah an tlung a, Jisuan a kôilômhei ziangah, “Ki ṭongṭai sungkah chu hin lei iṭhung rei dua,” a ti a.

³³Petera, Jakoba neh Johana hei khah a ziangah a ṭhui a; iṭha takka renga rithlavâiin â lung dûk a tong tak tak a.

³⁴Khanchu, an ziangah, “Ker thla â vâi tak tak, ithi rang dôrin kêng a ne om; hin lei om unla, intûng ṭian rei,” a ti a.

³⁵Khanchu, matiang a va fe ual viat a, rinêngah â bok a, ithei a nitin chu kha tuangna zoro khan amah a lôi theina rangin a ṭongṭai a.

³⁶“Abba, Epa, nangma ta rangin chu thil tinrêng ithei a nit. Hi tuangna kilât hih ki zianga rithokin ne khâi pêk roh. Nikhomsela, keima richam ni loiin, nangma richam ni riseh,” a ti a.

³⁷Khanungchu, a hong kîr nôk a, kôilôm ithumkahei khah â in thlarin a hong mu a; Petera ziangah, “Simon, nî in thlar kêng na? Dârkâr khatka lua khom intûng ṭiankan nî om thei ino mani?

³⁸Thlêmnaah nin lût nona rangin intûng ṭiankan ṭongṭai rei. Rithla khan chu a nuam a, taksan chu ai phâri no a nit,” a ti a.

³⁹Khante, a va fe nôk a, ai ti ngaingir khah itin a ṭongṭai nôk a.

⁴⁰Khanungchu, a kôilômhei tiang a hong kîr nôk a, â in thlar ngîrin a hong mu nôk a; an mit reng an meng thei tlak no sikin amah an sâm rang tlia khom reh thei mak a.

⁴¹Khante, a hong kîr voi thumnaah khan chu an ziangah, “Atûn chu in thlar unla, ringam ta rei. Ân rup tâk, [14] a zoro a hong tlung tâk. En ta u, Miriam Naipa hih mi sualhei kutah ipen ai om rang tâk a nit.

⁴²Thoi unla, fe tâng ei ti u. En ta u, nen manrangtu hih a hong nâi tâk,” a ti a.

⁴³Khante, Jisua a la ṭong mai lâiin Kôilôm Sômleiinikahei lâia Juda khah a hong tlung zel tâk a. Ama lômin thiampu lalhei neh Dân inriseituhei neh upahei hong itir mipui itam takkah, khandai neh tôkmol ichôiin an hong tlung sa a.

⁴⁴Ân manrangtu khan, “Â biang kî tum tak khah nin izongpu nîng a ti. Man unla, iṭha takka rung khapin ṭhui zel rei,” itin risin a lei îril thlâm tâk a nit.

⁴⁵Khante, Juda khah a hong tlung kaneh chu Jisua a pan thal a, a ziangah, “Minriseitu” itin â biang a tum a.

⁴⁶Khanchu, Jisua khah an man a, an itûk khap tâk a.

⁴⁷Khante, khan taka dinghei lâia mi khatkan a khandai a thuat a, Thiampu laltak suak a hei sât a, â kuar a sât iṭhul pêk pai a.

⁴⁸Khanungchu, Jisuan anni khah â sôn a, an ziangah, “Khandai neh tôkmol ichôiin inru man rang neh ri-ang bangkan ne man nin ihong na hi?

⁴⁹Nin lâiah Tempilah nîn tin mi ken risei ngai a, ne man mak chei a. Khanniseh, Pathian thu chu a hong tlung idik ngêt rang a nit hih,” a ti a.

⁵⁰Khanungchu, kôilômhei khan ani khah an mâkrak a, lâizâm an tho tâk a.

⁵¹Khante, tlangvâl khatkah, puan riphân inzena rivo hin Jisua a zui a. Ani khom khah an man a;

⁵²nikhomseh, a suak pat a, a puan khah imarakin a korong vatkan lâizâm a tho tâk a.

⁵³Khanungchu, Jisua khah Thiampu Laltak inah an ṭhui a, amakhan thiampu lalhei neh Dân inriseituhei khom an hong ribûm a.

⁵⁴Petera khom khan ilah iankatah hin a zui a, Thiampu Laltak in tual idênin a fe a. Amakhan manmihei lâiah mei iuan â ṭhung a.

⁵⁵Khante, Thiampu lalhei neh Sanhedrinhei [15] murdi khan Jisua an that theina rangin thiamno an inchang theina rang bi an zong a; nikhomsela, mu thei mak a.

⁵⁶Mi tam takkan milakin an nô a; nikhomseh, an nôna ṭong rimun thei mak a.

⁵⁷Khante, mi ṭhenkah an iding a, milakin Jisua an nô a,

⁵⁸“Hi mi hin, ‘Hi Tempil, kuta sin hih ṭhet ki ta, a dang kuta sin nino sûn thumkan inding ki ti’ a ti kin riat,” an ti a.

⁵⁹Kha thu khomah khan an nôna ṭong khah rimun thei ngir mak a.

⁶⁰Khanchu, Thiampu Laltak khah an matonah a va ding a, Jisua ziangah, “Nang an nôna thu-ah hin îte sâmna nî nei ino rang mani?” itin ardon a.

⁶¹Nikhomseh, Jisua chu a dâirek a, iten sâm mak a. Thiampu laltak khan a ziangah, “Inpâkinrup Pathian Naipa Mesia khah ni nit im?” itin ardon nôk a.

⁶²Jisuan a sâm a, “Ki nit, Miriam Naipa hih Rithaliana changtianga ṭhung a, rivân sûm lâiah a zuang la mûng nin ti,” a ti a.

⁶³Khanungchu, Thiampu Laltak khan a puansilhei â potthlêr a, “Riatpuitu dang nang khâi mang meh,

⁶⁴Pathian â sîrinsiat tlia chu nin riat tâk a, ingkan im nin ringai?” a ti a. An rêngkan Jisua khah ithi rangin ân rup an ti khai a.

⁶⁵An lâia ṭhenkah vângin chu ani khah an ichil a, a mâi an tuam pêk a, an itôk a. A ziangah, “Isîr roh tum nang ito,[16]” an ti a. Khabanah manmihei khomin an ṭhui thiai pumin an ibên thiai a.

⁶⁶Khante, Petera khah nuai ita rikul sung tualah khan a la om mai a. Thiampu Laltak isomhei lâia nungâk khatkah a hong a;

⁶⁷Petera mei lei iua khah a mu kaneh chu a en ving a, a ziangah, “Nang khom Nazaret Jisua ziangah ni om ngai,” a ti a.

⁶⁸Khanniseh, Petera khan a phial a, “Reh mang e. Ni thu sîr omzia khah kî riat tlak ino a nit,” a ti a. Kha zoi kaneh chu dâikot putiang a va suak a, âr khom a kuang zel tâk a.

⁶⁹Khante, nungâknu khan a va mu nôk a, a kôla dinghei ziangah khan, “Hi mi khom hih an lâia mi khatkah a nit sa,” a ti nôk a.

⁷⁰Khanniseh, Petera khan a phial nôk ngir a. A nakan ual viatah chu a kôla dinghei khan Petera ziangah, “Galili rama mi ni nit sa sikin nang khom an lâia mi ni nit ngêt,” itin an dei a.

⁷¹Khanniseh, Petera khan an ziangah, “Thudik irilin vâni ki irsâm a nit, â dik non chu Pathianin kuttum ne tho riseh. Kha miriam nin iti khah kî riat tlak ino a nit,” a ti a.

⁷²Kha zoi kaneh chu âr voi nikah a kuang zel tâk a. Khanchu, Petera khan Jisuan a zianga, “Voinik âr khuang man nangman voi thumkah ne phial ni ti,” ai ti pêk ṭong khah a riat suak a; ringaiinsian a ṭap ngûi ngûi tâk a. [17]