Read Biete MARKA 15 Bible Online

MARKA 15 - Biete bible

MARKA 15

¹Khante, zîng a hong nit kaneh chu thiampu lalhei khah upahei, Dân inriseituhei neh roirêltuhei murdi neh an rimua, an risôn[18] a, Jisua khah an khuap a, an ṭhui a, Pilata kutah an bâng tâk a.

²Pilata khan ani khah a lei ridon a, a ziangah, “Judahei rêng ni nit im?” a ti a. Jisuan, “Ni nit ni ne ti khate,” itin a sâm a.

³Thiampu lalhei khan lam itam takkan Jisua khah an nô a.

⁴Khanchu, Pilata khan Jisua ziangah, “Nang an nônahei hih ringai ta, nî sâm ino rang mani?” a ti nôk a.

⁵Jisua khan iten sâm ngir mak sikin Pilata ringai arkhêl tak tak a.

⁶Khante, Kalkan Kût zoro fengin mi tâng khatkah mipuihein an ingên tak khah Pilata khan â sua pêk ngai a.

⁷Kha zoroah khan rihel pôla mi khatkah arming Baraba an iti kha, buai lâia mi an that sika tâng ina tâng mai a om a.

⁸Khante, mipuihei khah an hang fe a, an ta ranga ai tho pêk ngai angkana tho rangin an ngên a.

⁹Khanchu, Pilata khan an ziangah, “Judahei rêng hih nangni sua pêk inlang nin nuam im?” a ti a.

¹⁰Thiampu lalhei khan an narsa sika Jisua khah a kutah an hong ibâng a nit iti a riat infel a.

¹¹Nikhomsela, thiampu lalhein mipuihei khah Baraba isua pêk ranga ngên rangin an ithor a.

¹²Khante, Pilata khan an ziangah, “Khateh, Judahei rêng nin itipu hih im ki lo rang tâk?” itin ardon nôk a.

¹³Annihei khah an ikhêk nôk a, “Krosah hêmde roh,” an ti a.

¹⁴Pilata khan an ziangah, “Ithôm? Im ai thonsual?” a ti a. Nikhomseh, annihei khan, “Krosah hêmde roh,” itin an ikhêk inring ual ual a.

¹⁵Khanchu, Pilatan mipuihei lunginhoi a nuam sikin Baraba khah â sua pêk a. Khante, Jisua kha chu ân hêm zoi tenan chu krosa hêmde rangin an ziangah a pêk tâk a.

¹⁶Khante, sipaihein Jisua kha Ram-optu in tual thapukah, praitorian an iti-ah khan an ṭhui a, an lôma mihei murdi an koi bûm a.

¹⁷Khanchu, zakorfual senduk an inhâk a, riling lukhum an phiar a, an inkhum a.

¹⁸Khanungchu, “Chibai, Judahei Rêng,” itin chibai an bûk a.

¹⁹Irolin a luah an itôk a, an ichil a, rikhûk idilin chibai an bûk a.

²⁰Khante, an phengsan zoiin chu zakorfual senduk khah an lâk nôk a, ama puan ngir khah an insil nôk a. Kha rizoiin chu krosa hêmde rangin an ṭhui tâk a.

²¹Khante, thingtlâng lampuia rithoka khopui hong ipan mi khatkah, arming Simona an tong a, sipaihei khan Jisua kros riput pêk rangin an dânde a. Simona khah Kurini mi, Alekzandara neh Rufa pa a nit.

²²Khanchu, Jisua khah Golgotha, “Luru Mun” an iti mun idênin an ṭhui tâk a.

²³Kha munah khan Jisua kha uain, mura neh inripol an pêk a; nikhomseh, Jisuan in mak a.

²⁴Khanungchu, krosah an hêmde tâk a. An dong rang chit an riat theina rangin thlasânin a silbomhei khah an risem a.

²⁵Jisua an hêmde zoro khah zîng dâr ikuakkah [19] vêl a nit.

²⁶Khante, amah an nôna thu khah an riziak a, “Judahei Rêng” itin a lu chungah an târ a.

²⁷Khante, Jisua lômin suammi inikah an hêmde sa a, â changtiang khatkah, â voitiang khatkah.

²⁸Khaangkan Pathian Thubûn, “Ani khom mi sualhei lâia tep san a om tâk”[20] ai ti khah a hong itlung tâk a nit.

²⁹Khante, mi thlengrilôi murdîn an lu an heia, Jisua an êro a, “Nangmah, Tempil iṭhet a, sûn thumka înding nôk theitu,

³⁰Kros lêra rithokin zuang ṭum inla, zôk ta roh ba,” an ti a.

³¹Khangkah ngirin thiampu lalhei neh Dân inriseituhei khomin Jisua an êro a, “Mi danghei lak ân zôk ngai a, amah lak chu zôk thei mak a.

³²Amah ei iam theina rangin ei mitmuah, Mesia, Israelhei rêng hih, atûnah hin kros lêra rithokin a zuang ṭum im lei en rei u,” an ti a. Ama lôma an ihêmde mi inikahei khom khan Jisua an êro sa a.

³³Khante, sûn dâr sômleiinika rithokin kholoi dâr ithumka dênin rammual a zîng khap a.

³⁴Kholoi dâr ithumkan chu Jisua kha rôl iring takkan â khêk a, “Eloi, Eloi, Lama Sabakthani,” a ti a. Amakhah, “Ki Pathian, Ki pathian, ithôm ni ne mâk a?” itina a nit.

³⁵Kha muna ding ṭhenkahei khan amakhah an riatin, “Ringai ta u, Elija ai koi a nit,” an ti a.

³⁶Khanchu, an lâia mi khatkah â tlân a, uain thûrah sponj â chia a, irol mongah a târ a, Jisua hang in-in a tum a, “Lei ngâk hi rei, ama ṭhum rangin Elija a zuang im lei en rei u,” a ti a.

³⁷Jisua kha rôl iring takkan â khêk a, arthla â thla tâk a.

³⁸Khanchu, Tempil sung puanzâr khah a chungtianga rithokin a mong idênin a thlêr phat tâk a.

³⁹Kros maton ridîna ding sipai rizaka ruitu khan Jisua rithla thla dân khah a mun chu, “Hi mi hih Pathian Naipa a nit titak hih,” a ti a.

⁴⁰Khante, nupang ṭhenkah khomin ilah iankatah an lei thlîr mai a; khahei lâiah khan Mari Magdalini hei, Jakob naipang uala nu Mari hei, Josefa nu hei, Salomi hei an iṭang sa a nit.

⁴¹Kha mihei khah Jisua Galili ramah a om lâia ama zui a, a sin itho pêk ngaihei an nit. Ama lôma Jerusalema hong sa nupang itam takkah khom an om a.

⁴²Khante, Josefa, Arimathai khuaa mi, roirêltu lâia ṭang, mi maritiom tak, Pathian Ram zuang tlung ingâk mi kha, kholoi a hong nitin chu a hong a; Judahei inrinnî a nit a, (amakhah sabatnî ranga an risiam ngai nî a nit); khasikin, Josefa khan ihâi takkan Pilata ziangah a va fe a, Jisua ruak khah a nî a.

⁴³

⁴⁴Pilata khan Jisua a thi tâk iti thu khah a riatin chu arkhêl a ti tak tak a. Khanchu, sipai rizaka ruitu khah a koi a, Jisua thina ai sôt tâk manih itin ardon a. [21]

⁴⁵Sipai rizaka ruitu bâia rithokin thu fel a riat kaneh chu a ruak khah Josefa ziangah a pêk tâk a.

⁴⁶Khanchu, Josefa khan puan rivuai archôk a, Jisua ruak khah â ṭhum a, puan rivuaiah khan a tuam a, lung ihol ithlânah ân zâl a, ithlân bâi khah lungin a sîng tâk a.

⁴⁷Khante, Mari Magdalini neh Josefa nu Mari khom khan Jisua ruak an inzâlna khah an en a, an mu ṭian a.