Read Biete MARKA 16 Bible Online

MARKA 16 - Biete bible

MARKA 16

¹Khante, sabatnî a hong thlengin chu Mari Magdalini hei, Jakoba nu Mari hei neh Salomi hei khan Jisua ruak va nôt rangin siriak namhoi an richôk a.

²Pathiannî zîng inî a suak chakin ithlânah an va fe a.

³Lampuiah khan, “Ithlân bâia lung khah tûm nen lum pêk rang tâk?” an ti a. (Lung ilianpa a nit.) Khanchu, an hang en a, lung khah inlum isan an mu a.

⁵Khanungchu, ithlân sungah an lût a, tlangvâl khatkah puan iṭek isil, changtiang panga ṭhung an mu a, an ilung a zîng khap tâk a.

⁶Khanchu, ani khan an ziangah, “Lung inzîng no rei; Nazaret Jisua an ihêmde khah nin izong a nit iti ki riat. Ani khah hin om khâi mak, kâiithoi a nit tâk; en ta u, an inzâlna hi.

⁷Nikhomsela, fe unla, a kôilômhei neh Petera ziangah khan, ‘Galili ramah nin matonah fêng a ta, nangni a lei îril tâk angkah khan kha munah khan mûng nin ti,’ itin va ril rei,” a ti pêk a.

⁸Khanungchu, beindong neh iṭi pumin ithlâna rithokin an suak a, an itlân thal tâk a. An ṭi tak tak sikin tute ziangah îte isîr mak e.

⁹(Khante, Pathiannî zîng a thoinôkah khan Mari Magdalini, a sung ata ramrili sarikah ai ûmisua pêknu ziangah a masa takin Jisua ân lâr a.

¹⁰Khanchu, Mari khan Jisua champuihei a va ril a. Anni khah ringaiinsia neh iṭapin an lei om a.

¹¹Mari khan Jisua a ring nôk a, imu khom ki mu a ti pêk a; khanniseh, anni khan taksôn mak a.

¹²Kha nungah khan chu anni lâia mi inikah, thingtlâng khua tiang ipana fehei ziangah mêl danglam riputin ân lâr nôk a.

¹³Anni khom khah an hong kîr a, kôilôm danghei an hong iril a; nikhomsela, taksôn ngir mak e.

¹⁴A nungkhôntakah chu Kôilôm Sômleikhatkahei ziangah, bu an nêk lâi takin ân lâr nôk a. A thoinôk imutuhei ṭong taksôn loiin an ilung an inkhir sik neh iamna reng an nei no sikin anmani a ngo a.

¹⁵An ziangah, “Rammual pumpuiah fe unla, thil siam tinrêng ziangah Thurchi Ṭha hih isîr rei.

¹⁶Tukhom â iam a, baptisma chang chu ring an ta, tukhom â iam ino chu thiamno chang an ti.

¹⁷A iamhei chu sinrikhêl sin theina ritha ipe nîng an ti; ker mingin ramrilihei ûmisuang an ta; ṭong itharhein ṭong an ta;

¹⁸kutin irûlhei man an ta, thina tûr khom in an ta, îte ti no nih; dam inohei chungah an kut ringat an ta, dam zel an ti,” a ti a.

¹⁹An ziangah thu â sîr zoiin Pumapa Jisua chu rivânah iṭhuiin a om a, Pathian changtiang a hang iṭhung tâk a.

²⁰Khaangkan kôilômhei khom khah an fe suak a, ram tinah thu an isîr tâk a, Pumapa khomin anmani a thlop a, an thu sîr khah â dik iti sinrikhêlin ân det pêk thiai mai a.) MARKA RIZIAK MONGNA TÔI UAL (Khanchu, an zianga a thu ril murdi khah nupanghei khan Petera neh a champuihei ziangah an va sîr zel a. Kha rizoiah khan, Jisua ngêiin, anmani mangin, kumtluang saninringna thucha rithiang neh idet kha, sak neh thlang, ram tinah â thek indar tâk a. Amen)[22]