Read Biete MARKA 2 Bible Online

MARKA 2 - Biete bible

MARKA 2

¹Khante, sûn itôiteka nungah chu Jisua Kapernaumah a fe nôk a; inah a om iti thu ân thang a.

²Khanchu, mi tam takkah an hong ribûm a, inkhâr bula lua khom mun om khâi mak a. Jisuan an ziangah thu â sîr mai lâi takin,

³mi pasal ilikan izeng khatkah a ziangah an hong rizôn a.

⁴Nikhomseh, mipui sikah khan a ziang hong ithlun thei mak a. Khasikin, Jisua omna ridîn taka inchung an iphep a. An iphep zoiin chu â zengpu khah a puantha neh an zuk iṭhul a.

⁵Jisuan an iamzia a mua, izeng ziangah khan, “Ki naipa, ni sualhei khah izâ a nit tâk,” a ti a.

⁶Dân inriseitu ṭhenkah khantaka ṭhunghei khan an lungrilin,

⁷“Hi mi hin ithôm hingkana ai ṭong ngam hi? Pathian a isîrinsiat a nit; Pathian bang kêng sualhei izâ thei,” an ti a.

⁸Voikazelin Jisuan an ingaitua khah a riat a, an ziangah, “Khangkana thu khah ithôm nin ingaitua?

⁹Izeng ziangah, ‘Ni sualhei izâ a nit tâk,’ iti neh ‘Thoi inla, ni puantha lan la, lôn ta roh’ iti hih a îhîm â ti a ol ual?

¹⁰Rammualah hin Miriam Naipan sualhei izâ theina richam a nei iti nangni lei inmu rong,” a ti a. Khanchu, izeng ziangah khan,

¹¹“Thoi inla, ni puantha lan la, ni inah fe ta roh, nang kî ti a nit,” a ti a.

¹²An rêngkan an en chak lâiin ani khah a thoi a, a puantha a lâk a, a fe zel tâk a. An rêngkan an ringai arkhêl tak tak a, “Hingkana hi chu la mu tlak ngai mang me,” an ti a, Pathian an inpâk tâk a.

¹³Khante, Jisua kha Galili dîl rikamah a fe nôk a. Mipuihei a ziangah an hong a, ani khan a lei inrisei a.

¹⁴A fe malamin, Siadôltu Levia, Alfaia naipa a ofisa ṭhung a mu a, Jisuan a ziangah, “Ne hong zui roh,” a ti a. Levia khah a thoi a, a zui tâk a.

¹⁵Anakanah chu Jisua kha Levia inah bukhêng a ot a, Jisua kha siadôltuhei neh mi sual itam takkahein an zui a, an lâia mi itam takkan Jisua neh a kôilômhei khah khalai an hong rikhîlpui a.

¹⁶Khante, Farisaihei lâia Dân inriseitu ṭhenkahei khan Jisuan mi sualhei neh siadôltuhei khalai a otpui an mun chu a kôilômhei ziangah, “Ithôm siadôltuhei neh mi sualhei lâiah teh bu ai nêk?” itin an ridon a.

¹⁷Jisuan an ṭong khah a lei riat a, an ziangah, “Idamhein dâktor zong ngai mak a, inṭethein kêng an izong ngai. Mi felhei rilam ranga zuang ni mang a, mi sualhei rilam ranga zuang kêng kî nit,” itin a sâm a.

¹⁸Zoro khatkata chu Baptistu Johana kôilômhei neh Farisaihein bu an ngei a. Mi tuhei manih Jisua ziangah an hong a, a ziangah, “Ithôm Johana kôilômhei neh Farisai kôilômhein chu bu an ngei ngai a, ni kôilômhein chu bu an ngei ngai no?” itin an ridon a.

¹⁹Jisuan an ziangah, “Rineina ruaiṭheah khualmihei khah bu ngei rangin nin itûng mani? Moiineitu an ziangah a om kârkah chu bu ngei no nih.

²⁰Khannisela, an ziang ata moineitu an ṭhui pai nikhua la tlung a ta, kha tikin chu la ngei an ti.

²¹“Tutên puan ilui khah puan ithar larsuh viat inon po ngai mak e, po ngân sela, â thar khan â lui khah kâi iṭhet a ta, ṭet ual tet a ti.

²²Tutên uain ithar khom savun peng iluiah thun ngai mak, thun ngân sela, uain ithar khan savun penghei khah mût ikhoi a ta, a uain khah ibua riai a ta, a savun peng khom mangmunboi chang a ti. Khasikin, uain ithar chu savun peng itharah an ithun ngai a nit,” itin a sâm a.

²³Khante, sabatnî voikah chu Jisua kha bu bilheiah a thleng a. A kôilômhei khan an lôn pumin bu vuihei an chun a.

²⁴Khasikah khan Farisaihein Jisua ziangah, “En ta, ithôm ni kôilômhein sabatnî-a thil rithiang ino an itho hi?” an ti a.

²⁵Jisuan an ziangah, “Voniṭâma ifah rang an risam lâia Davida thil tho khah nin lai tep tlak ngai ino mani?

²⁶Abiathara Thiampu Laltak a chang lâiah khan Davida khah Pathian ina a lût a, Pathian zianga ilan tâk ibai, thiampuhei bangin an ifâk thei kha a lâk a, a fâk a, a mihei khom ai sem sa thu khah?” a ti a.

²⁷Amah ngirin, “Sabatnî hi miriam ranga siam a nit a; miriam hi sabatnî ranga siam ni mak e.

²⁸Khasikin, Miriam Naipa hih sabatnî chung khomah hin Puma a nit,” a ti a.