Read Biete MARKA 3 Bible Online

MARKA 3 - Biete bible

MARKA 3

¹Khante, inkhôm inah a fe nôk a, amakhan mi khatkah kut izeng a lei om a.

²Khante, sabatnî a nit sikin mi ṭhenkan Jisua an sêl theina rangin sabatnin ân dam titêm itin an en thlît a.

³Jisuan kut izeng ziangah khan, “Matiang zuang iding roh,” a ti a.

⁴Khanungchu, Jisuan mipuihei ziangah, “Ei Dânin sabatnin im itho rang a ne iphal? Thil iṭha sin im anitnole thil isia sin im? Mi ringna inzôk im anitnole ithat im?” itin ardon a. Nikhomseh, an dâirek a.

⁵An lungril khirzia neh idiknozia khah a mun ân khôk a ti tak tak a, ning ithik pumin anmani khah a en vêl a. Khanungchu, kha mi ziangah khan, “Ni kut phar roh,” a ti a. A kut a phar a, a kut khah a hong dam tâk a.

⁶Khanchu, Farisaihei kha inkhôm in ata khah an suak a, Jisua an that rang tlia ingaituan Heroda pôla mihei neh an risôn zel tâk a.

⁷Khante, Jisua neh a kôilômhei khah Galili dîl rikamah an fe a; mipui itam takkan an zui a. Kha mihei khah Galili rama rithok hei, Judai rama rithok hei,

⁸Jerusalema rithok hei, Idumai rama rithok hei, Jordan râl sua tianga rithok hei, Tura neh Sidon kho vêla rithok heia hong an nit. Kha mihei khah Jisua sinrikhêl thohei an riat tâk sika hong an nit.

⁹Mipui tam sika amah an hong ineng rai nona rangin rikuang khatkah lei inran pêk rangin Jisuan a kôilômhei khah he a be a.

¹⁰Mi tam takka a lei indam sikin natna nei murdîn amah an tôn theina rangin an bûm tul tul a.

¹¹An sunga ramrili neihei khomin amah an mun chu a makungah an ibok a, “Nangmah Pathian Naipa chu ni nit,” itin an ikhêk ngai a.

¹²Khanniseh, tûm ai nit iti chu tlângisua tlak loi rangin a khap ngit a.

¹³Khante, Jisua itlângah a fe a, a mi dithei khah a koi a. Anni khah a ziangah an hong a.

¹⁴Khanungchu, mi Sômleiinikah arthlang a, khahei khah “Tirtônhei” itin riming a be a. An ziangah, “Ki zianga om rangin nangni ki irthlang a nit, thu sîr rang khomin nangni tir ki ta,

¹⁵ramrilihei ûmisua theina ritha khom nei nin ti,” a ti pêk a.

¹⁶Sômleiinika a irthlanghei khah hihei hih an nit: Simona (Petera ai sak tâk kha);

¹⁷Zebedaia naipa Jakoba neh a unaipa Johana (Khahei khah “Boanergea” a sak a, amakhah “Khuarî Naihei” itina a nit),

¹⁸Andria, Filipa, Bartholomaia, Mathaia, Thoma, Alfaia naipa Jakoba, Thadaia, Kanana mi Simona,

¹⁹ân mantu Juda Iskariota hei an nit.

²⁰Khanungchu, Jisua kha in tiang a kîr nôk tâk a. Mipuihei khah an zuang ribûm nôk a, Jisua neh a kôilômhei khan fâk zong zoro lua man thei khâi mak a.

²¹“Ân vêt tak a nit hih,” mipuihein an ti a, amakhah a insung mihei khan an riat a, ama ṭhui rangin an hong rithok a.

²²Jerusalema rithoka Dân inriseitu zuanghei khom khan, “Belzebula ai nei kêng, Ramrilihei ilal sikin kêng ramrilihei ai ûmisua thei ai nit,” an ti a.

²³Khanchu, Jisuan anni khah a koi a, ṭongrikhekin an ziangah thu â sîr a, “Ingkam Soitanan Soitana ngir a ûmisua thei ranga?

²⁴Ram khom a khâtin ardoiin chu kha ram khah iding thei no nih.

²⁵Insungkuakah khom an inṭhen a, an khâtin an ridoiin chu iding suak thei no nih.

²⁶Khaangkan, Soitana khom a khâtin ardoiin chu iding thei loiin a irmang rang a nit.

²⁷Tutên mi rât khah an khuap thlâm bak no zelin chu mi rât ina lûtin a neinun lah pêk thei ngai mak e, an khuap thlâm tenan chu a in kha irok thei tâng an ti.

²⁸“Thudik nangni ke ril; Miriam naihei hih an sualna tinrêng neh Pathian an isîrinsiatna tinrêng izâ nîng an ti.

²⁹Nikhomseh, Rithla Rithiang sîrinsia chu tute izâ ni tlak no nih, kumtluang sual an isin a nit,” a ti a.

³⁰Amakhah, “Ramrili ai nei kêng,” an ti sika Jisuan ai ti a nit.

³¹Khante, Jisua nu neh a unaihei an hong tlung a. Tualah an iding a, ama koi rangin mi an tir a.

³²Jisua kôlah mipui iṭhunghei khan a ziangah, “En ta, ni nu neh ni unaihei neh ni farhein nang an zong a, tualah son an om,” an ti pêk a.

³³Jisuan an ziangah, “Tuhei im ki nu neh ki unaihei?” a ti a.

³⁴Khante, a kôla ṭhunghei khah a en vêl a, an ziangah, “En ta u, hihei hih ki nu neh ki unaihei chu an nit.

³⁵Tukhom Pathian lungdo sin chu ki unaihei, ki farhei, ki nuhei an nit,” a ti a.