Read Biete MARKA 4 Bible Online

MARKA 4 - Biete bible

MARKA 4

¹Khante, Galili dîl rikamah khan Jisuan ân risei nôk a. Mipui a zianga zuang ribûmhei khah an tam rai sikin rikuangah a chuang a, â ṭhung a; mipuihei khah chu dîl rikama imuangah khan an om a.

²Khanchu, ṭongrikhekin thurchi itam takka ân risei a, an ziangah:

³“Ringai ta u, voikata chu mi khatkan bu rît rangin a fe a.

⁴Fachi arthe a, a ṭhen lampui kôlah a tlâk a, ivahein an fâk rip tâk a.

⁵A ṭhen lungpharpha ipil chungah a tlâk a, rinêng â sâ no sikin a hong ṭoi zel a.

⁶Khanniseh, inî a hong risâng ianin chu a em inrizual a, rizung a tlâk inthûk no sikin a ram nôk rip tâk a.

⁷A ṭhen chu riling kârah a tlâk a, riling khan a dîp a, irâ zel nei thei mak a.

⁸Nikhomseh, a ṭhen chu rinêng iṭhaah a tlâk a, a hong ṭoi a, a hong thuar a, â râ tâk a; ṭhenkah sômithumkan, ṭhenkah sômirukkan, ṭhenkah rizakan a hong pung tâk a,” a ti a.

⁹Khante, Jisuan a ṭong ikhârnan an ziangah, “Ikuar inei kan chu iṭha takkan ringai riseh,” a ti a.

¹⁰Khante, a khât banga a om tenan chu Kôilôm Sômleiinikahei neh â nungizuitu danghei khan ṭongrikhek thuhei khah an ridon infel a.

¹¹Jisuan an ziangah, “Pathian Ram thu rithup riattheina nin ziangah ipe a nit a. Khan, mi dang putianga omhei rangin chu ṭongrikhek banga isîr pêk a nit:

¹²“‘En ṭian khom sela munfel no nia, Ringai ṭian khom sela rethiam no nih; Kha no ni sela chu Pathian tiang ngat nôk an ta, Aman a lei îzâ rang a nit,’ iti kha a tlung theina rangin,” a ti a.

¹³Khante, Jisuan an ziangah, “Hi ṭongrikhek hih nin iriat thei ino mani? Khangkan a nitin teh ingkam ṭongrikhek danghei rêng rêng khom kha nin riatthei ranga?

¹⁴Fachi rithetu khan Pathian thu a irthe a nit.

¹⁵Mi tam takkah chu fachi lampui kôla thla angkah an nit, thu khah an riat kaneh Soitana a hong a, an lungrila thu khah a lâk pêk rip zel ngai.

¹⁶Mi ṭhenkah chu fachi lungpharpha ipil chunga thla angkah an nit. Thu khah an riat kaneh ilôm takkan an iham zel ngai a.

¹⁷Nikhomseh, rizung inthûk an tlâk no sikin om sôt ngai mak e. Thu sika intakna manih, nuamlona manih a hong om kaneh chu an ilîr nôk zel ngai.

¹⁸Mi ṭhenkah chu fachi riling kâra thla angkah an nit. Khahei khah thu chu an riat tâk a,

¹⁹nikhomseh, hi ringnuna nunkhohoina hei, richong hoiinhâina hei, thil dang rizukna hei a hong lût a, thu khah a dîp a, a irâ thei khâi ngai ino a nit.

²⁰Khanniseh, mi ṭhenkah chu rinêng iṭha thla angkah an nit. Thu khah an riat a, an iham a, an irâ a, ṭhenkah sômithumkan, ṭhenkah sômirukkan, ṭhenkah rizakan an hong ipung tâk a nit,” a ti a.

²¹Jisua ngirin an ziangah, “Meiser hih bêl nuaia seh rangin manih, khum nuaia seh rangin manih an hong ichok ngai im a? A siamuna seh rangin ni mak im a?

²²Ithup tinrêng tlângisua la nîng a ta, inrikhum tinrêng ilîp la nîng a ti.

²³Ikuar inei murdîn ringai riseh,” a ti a.

²⁴Khante, Jisua ngirin an ziangah, “Nin thu ringai hih iṭha takkan ngaitua rei. Mi nin ritâna takah khan Pathianin nangni rita a ta, nangni bâng ual tet a ti.

²⁵Tukhom â nei kah chu peh sâng an ta, tukhom â nei ino chu ai nei viatte khom lah pêk rip an ti,” a ti a.

²⁶Jisuan thu â sîr mai a, an ziangah, “Pathian Ram chu hingkan a nit. Min a loiah chi arthe a.

²⁷Khanungchu, ani khah zânah a zâl a, sûnah a thoi a, chi khah ingkana hong iṭoi a, hong ithuar im ai nit iti ai riat ino angkah hi a nit.

²⁸Rinêngin a khâtin a kung kha ân thuar a, irâ ân nei ngai; a tîr takah a kung a hong suak a, khanung a vui a, a nungkhôn takah farmala sip buvui a hong isuak ngai a nit.

²⁹Bu khah a min tenan chu kha mi khan bu ât zoro a hong tlung tâk sikin a kôida lan bu ât ai phut ngai angkah hi a nit,” a ti a.

³⁰Jisuan an ziangah, “Pathian Ram chu inêm ei inrikhek rang tâk? I ṭongrikhek imangin im ei rilfia rang tâk?

³¹Ama angkah hin a nit. Mîn anṭam chi rimalkah a lâk a, rammuala chimu tinrêng lâia â chîntak a nit a, rinêngah a tu a.

³²Itôiteka nungah chu a hong mông a, chimu tinrêng nêka lian ualin a hong thuar a. Iṭang ilian tak tak a hong nei a, chungavuang ivahei khom â ṭang inbûrah khan an iriak thei ngai angkah hi a nit,” a ti a.

³³Khangkana ṭongrikhek itam takkah imangin an riat thei rang lamin Jisuan mipuihei ziangah thu â sîr ngai a.

³⁴Ṭongrikhek ni non chu an ziangah thu sîr ngai mak a; nikhomseh, a kôilômhei kha chu fianrialah an om zoron thil tinrêng a rilfia pêk ngai a.

³⁵Kha nî ngirah khan kholoi a hong nitin chu Jisuan a kôilômhei ziangah, “Dîl râl tiangah son lei kâi rei u,” a ti a.

³⁶Khanungchu, mipuihei khah an mâk a, Jisua lei iṭhungna rikuangah khan kôilômhei khah an lût a, ani khah an fepui tâk a. Rikuang danghei khom an om sa a.

³⁷Voikarengin thlipui irât tak a hong râng a, tuirisok khah rikuangah a hong lût a, a sip lôk lôk tâk a.

³⁸Jisua chu lukham ikhamin rikuang rimei tiangah khan a in thlar a. Khante, kôilômhei khan an ithoi a, a ziangah, “Minriseitu, kin irmang rang hih ân khôk nî ti no mani?” an ti a.

³⁹Khante, Jisua khah a thoi a, ithli khah a ngo a, “Mong inla, om ṭian roh,” a ti a. Khanchu, ithli khah a mong a, a dâi dup tâk a.

⁴⁰Khanungchu, Jisuan a kôilômhei ziangah, “Ithôm khangkah takin nin ṭi bâk a? Iamna reng nin lai nei ino mani?” a ti a.

⁴¹Nikhomseh, an ṭi tak tak a, “Hi mi hih tûm ai nit hi? Ithli neh tuirisok tena khomin a thu an izôm hi?” an riti a.