Read Biete MARKA 5 Bible Online

MARKA 5 - Biete bible

MARKA 5

¹Jisua neh a Kôilômhei khah Galili dîl râl, Gerasin [3] ram an hong tlung a.

²Jisua kha rikuang ata a suak kaneh ramrili iman ithlâna rithoka hong isuak mi khatkan a hong pun thlit a.

³Kha mi khah ithlâna om ngai a nit a. Tutên zingziri rui khomin an ikhuap thei ino a nit a,

⁴voi izâkah an khuap tâk a; nikhomseh, an khuapna zingziri rui khah â pot sat a, a kea thîrkolhei khom â khiak chit ngai a. A rât rai sikin tutên an întâng thei ino a nit.

⁵Asûn azânin ithlânheiah neh itlângheiah khan â khêk a, lunghein ar-ât ngai a.

⁶Khante ilah vitkatah Jisua a hei mu kaneh chu â tlân a, a makungah â bok a,

⁷rôl iring takka khêkin, “Jisua, Pathian Chungnungtaka Naipa, im ne lo rang nî ti? Deng nen thei tlak loi rangin Pathian rimingin nang ker phat,” a ti a.

⁸Hi a tina bi chu Jisuan a ziangah, “Nangmah ramrili porinchepa, hi mi sung ata hih hong suak roh,” a lei ti tâk sika a nit.

⁹Jisuan a ziangah, “Im ner ming?” itin ardon a. Ani khan a ziangah, “Ker ming chu ‘Tamah’ [4] a nit. Itam takkah kin nit,” itin a sâm a.

¹⁰Khante, kha mi khan ramrilihei khah kha ram ata ûmisua loi rangin Jisua a ngên ngit a.

¹¹Khante, kha mun itlâng pangah khan fâk izong vok itam takkah an om a.

¹²Khanchu, ramrilihei khan, “Vokhei ziangah son nen fen la, an sungah va lût kin ti,” itin Jisua an ngên a.

¹³Jisuan a phal pêk a. Khanchu, ramrilihei khah miriam sung ata an suaka vokhei sungah an lût tâk a. Vok lômhei khah an rêngkan sânginikah vêl an nit, an rêngkan ikhoiah an itlân a, dîlah an richôm a, an rinîk vang tâk a.

¹⁴Khanchu, vok ivâituhei khah an itlâna khua neh loiheiah kha thurchi khah an thanginthei tâk a. Khante, thil omzia en rangin mipui an fe a.

¹⁵Jisua ziang an tlungin chu ramrili Tama imanah kha puan isila lungril ngaingir riputa ṭhungin a va mu a, an ṭi tâk a.

¹⁶Khante, kha thil imutuhei khan ramrili imanpa chunga thil omzia neh vokhei thurchi khah an lei iril a.

¹⁷Khanchu, kha mihei khan Jisua khah an ram ata suak rangin an ngên tâk a.

¹⁸Khante, Jisua kha rikuangah a chuang rangto takin ramrili imanpa khan Jisua ziangah, “Ni ziangah hong ki ti,” itin a ngên a.

¹⁹Khannisela, Jisuan phal mak a, a ziangah, “Ni inah, ni inmihei ziangah fen la, Pumapan ni ta ranga sin nang ai tho pêk neh lung nang ân khamzia hi va ril roh,” a ti pêk a.

²⁰Khanchu, kha mi khah a fe a, Khopui Sômkahei [5] khah arfang a, Jisuan a ta ranga sin ai tho pêkhei khah â sîr a. Kha a isîr iria kan chu arkhêl an ti tak tak a.

²¹Khante, Jisua khah rikuangin varâl a hong kâi nôk a, dîl rikamah khan mipui itam takkah a ziangah an hong ribûm a.

²²Khanchu, inkhôm in ulianpu arming Jaira a hong a, Jisua a mu kaneh chu Jisua ke bulah â bok a, a ziangah.

²³“Ki nai nupangtenu a nat inrik tak tak a; khasikin, zuang inla, a hong har nôk a, a dam theina rangin ni kut ne zuang ringat pêk roh,” itin a ngên ngit a.

²⁴Khanchu, Jisua khan a zui a, an fe tâk a, mipui itam takka khomin an zui a, ineng rengin an ineng suai suai a.

²⁵Khante, nupang khatkah, kum sômlei kum inika thi suaka dam ino a om a.

²⁶Dâktor itam takkan an don tâk a, a sum nei murdi â hek riai nung khomin idam ual nêkan inrikin ân rik pêk ual ual a.

²⁷Khâmnu khan Jisua thurchi a riat a, mipui kârah Jisua nungah a hong a,

²⁸a lungrilin, “A puanmôr ilua khom tôn inlang dam zel ki ti,” a ti a.

²⁹Khanchu, a puanmôr a tôn a, voikarengin a thi suak khah a chât pit tâk a, a natna khah indam a nit tâk iti arriat zel tâk a.

³⁰Jisua khom khan ama ata sinthotheina a suak iti a riat zel a; khanchu, mipuihei lâiah khan a ngat vêl a, an ziangah, “Tûm ki puan itôn?” itin ardon a.

³¹A kôilômhei khan a ziangah, “Mipuihein ineng renga nang an îneng hih ni mu hi te, ithôm tûm ki puan itôn nî ti hi?” an ti a.

³²Khanniseh, Jisuan chu a puan itôntu imuh rangin a en vêl mai a.

³³Khanchu, nupangnu khan a chunga Jisua sintho khah irian iṭi neh inthing pumin a hong a, a ke bulah rikhûk a dil a, thurchi khah ifel takkan â ril vang tâk a.

³⁴Jisuan a ziangah, “Ki nainu ni iamna hih ni dampuina a nit. Thlangam takkan fen la, ni natna ata hong dam vang ta roh,” a ti pêk a.

³⁵Jisua a la ṭong mai lâiin Jaira ina rithokin mi khatkah a hong a, Jaira ziangah, “Îrang im Minriseitu lan sôl rang? Ni nainu khah a thi tâk,” a ti a.

³⁶Jisuan an ṭong khah ngaisak loiin Jaira ziangah, “Ṭi non la, iam ngit roh,” a ti pêk a.

³⁷Khante, Petera neh Jakoba neh a unaipa Johana hei ti no chu tute ama zui rangin phal mak a.

³⁸Khante, Jaira in a va tlungin chu Jisuan a lei kuarinchokhei, â ṭap veng vunghei neh â khêkirunghei khah a va mu a.

³⁹Insung a lût a, an ziangah, “Ithôm nin kuarinchoka nin iṭap hi? Naipang hi thi mak e, â in kêng ai nit,” a ti a.

⁴⁰Anni khan an nuiso a; khasikin, an rêngkan a ûmisua vang a, naipangnu nu neh pa neh a kôilôm ithumkahei khah a ṭhui a, nupangtenu zâlna chontanah khan an lût a.

⁴¹Khante, naipang kut khah â tûk a, a ziangah, “Talitha, kumi,” a ti a; amakhah, “Tetenu, thoi roh,” itina a nit.

⁴²Khanchu, naipangnu khah voikarengin a hong thoi a, a lôn thei zel tâk a. Naipangnu khah kum sômlei kum inika mi a nit. Khangkan a hong nit kaneh chu an ringai arkhêl tak tak a.

⁴³Nikhomseh, Jisuan an ziangah, “Hi thu hih tute iril tlak no rei,” itin a khap a. Khante, an ziangah, “Ifah rang peh rei,” a ti a.