Read Biete MARKA 6 Bible Online

MARKA 6 - Biete bible

MARKA 6

¹Jisuan kha mun khah a mâk a, an khua tiang a fe nôk a, a kôilômhei khomin an zui mai a.

²Sabatnin chu inkhôm inah mi ân risei a. Mi itam takkah an om a; a thu sîr an riatin chu an ringai arkhêl tak tak a, “Hi mi hin hi thuhei hih taka rithoka ai riat mani? A ziangah îvârnâm ipea om hi? Ingkan im sinrikhêl ai sin thei hi?

³Mari naipa thingisin ngai khah ni mak im a? A urênghei khom Jakoba, Josefa, Juda neh Simona hei ni mak im a? A farhei khom ei zianga om ni mak im a?” an ti a. Khanungchu, ani khah an nel tâk a.

⁴Jisuan an ziangah, “Zânthla chu ama khua neh a suapuihei neh a inmihei lâiah ti no chu mun tinah imaritin a om ngai,” a ti a.

⁵Kha munah khan chu dam ino iroicheka chungah kut ringata a îndam ti no chu îte sinrikhêl dang sin thei mak e.

⁶Mipuihein iamna an nei no sikin arngai arkhêl tak tak a. Khanchu, Jisuan mipuihei inrisei thiai pumin khuahei arfang a.

⁷Khante, Kôilôm Sômleiinikahei khah a koi a, pasal inik nikan a tir suak a. Ramrilihei chunga richamneina khom a pêk a.

⁸An ziangah, “Nin inzinnah irol ti no chu îte ibai khom, choli khom, nin kongkhitah sum khom chôi no rei.

⁹Pheikok chu ribun unla; khanniseh, zako bop chu ihâk no rei,” itin thu a pêk a.

¹⁰Khante, amah ngirin an ziangah, “Nangni an ihama nin tlungna in takah khan kha mun nin mâk makah chu om mai rei.

¹¹Khante, tak khua khomin nangni an iham noa, nin ṭong an ringai non chu marak unla, nin kea vâivut ithing itla rei. Amakhah an ta rangin riningna nîng a ti,” a ti a.

¹²Khanchu, an fe suak a, “Rilet rei,” itin thu an isîr a.

¹³Ramrili itam takkah an ûmisua a, damino itam takka siriak an inôt a, an indam a.

¹⁴Khante, Jisua riming khah mun tinah ân thang tâk sikin rêng Heroda khan a lei riat tâk a. Mi ṭhenkan, “Baptistu Johana khah a hong ring nôk tâk; khasikin, kêng hi sinrikhêl sin theina ritha hih ai nei,” an ti a.

¹⁵A danghein chu, “Elija a nit,” an ti a. Mi dang ṭhenkahein chu, “Tiana zânthlahei angkana zânthla khatkah a nit,” an ti a.

¹⁶Amakhah Heroda khan a lei riatin chu, “Baptistu Johana, a lu kî tan khah a hong iring nôk tâk a nit,” a ti a.

¹⁷Heroda ngêiin Johana khah ân man a, ikhuap phiarin tâng inah a lei ikhum a nit. Herodan hingkana a thona bi chu a unaipa Filipa nupui, Herodi, aman nupuia ai nei nôk, kha nupang sika a nit.

¹⁸Johana khan Heroda ziangah, “Ni unaipa nupui nî nei hih idik mak e,” itin a lei iril mai ngai a.

¹⁹Khasika khan, Herodi khan Johana a mumâk tâk a, ithat a tum a; nikhomseh, Heroda sikin that thei mak a.

²⁰Herodan Johana khah mi ṭha neh mi rithiang a nit iti a riat sikin a ṭi a, a înzôk ngai a nit. Johana thu sîr a riat ikipah iṭha takkan buai ngai khom seh, a thu sîr ringai khah ai nuam ngai a nit.

²¹Khante, Heroda khan a suak champhaphâk nin mi roinpuihei neh sipai ruaituhei neh Galili rama milianhei ta rangin ruai â ṭhe a, kha nikhuaah khan chu Herodi khan zoron ṭum a mu tâk a.

²²Herodi nainu khah a hong lût a, a lâm a, Heroda neh a ruai rikhîlpuihei khah ân lôm tak tak a. Khasikin, rêng khan naipangnu ziangah khan, “Im â nei nî nuam? Nî nuam tak ne nih roh nang pêng ki ti,” a ti a.

²³Ṭonginkung itam takka neiin a ziangah, “Ikhom ni ne ini kah chu ki ram ritiakah khom nang ipeh rangin ṭong ker khâm,” a ti a.

²⁴Khanchu, naipangnu khah a suak a, a nu ziangah, “Im ki nî rang?” itin ardon a. A nu khan, “Baptistu Johana lu,” a lei ti a.

²⁵Khanungchu, naipangnu khah rimot takkan a fe a, rêng ziangah, “Atûn Baptistu Johana lu khah khêngin ni ne ipêk rangin ki nuam,” a ti a.

²⁶Rêng khah â lung a sôl tak tak a; nikhomseh, a khualmihei makunga a ṭongrikhâmna sikah khan rikhal thei khâi mak a.

²⁷Khanchu, rêng khan vêngtu sipai khatkah a tir zel a, Johana lu khah hong ichôi rangin thu a pêk a. Khante, ani khah tâng inah a fe a, Johana lu khah a va tan a.

²⁸Khanungchu, khêngin a hong chôi a, naipangnu ziangah a pêk a, naipangnu khan a nu a pêk tâk a.

²⁹Kha thu khah Johana kôilômhei khan an riat kaneh chu an hong a, a ruak khah an chôi a, an phûm tâk a.

³⁰Khante, tirtônhei khah Jisua ziangah an hong kîr nôk tâk a, an sintho murdi neh an thu inrisei murdi khah Jisua an iril a.

³¹Mipui ife hong an tam rai sikin Jisua neh a kôilômhei khah bu lua khom ne riman mak a. Khasikin, ani khan an ziangah, “Tho ei khât banga ei om theina rangah fêng ei ta, lei ringam hi rei u,” a ti a.

³²Khanchu, mun infiar ipanin an khât bangin rikuangin an rithok tâk a.

³³Nikhomseh, mipui itam takkan an fe lai an mu a, anmani an nit iti an riat zela, khotina rithokin an itlân a, Jisua neh a kôilômhei khah an lei khâl a.

³⁴Khante, Jisua khah rikuang ata a ṭumin chu mipui itam takkah a mu a, â enkoltu boi bera angkah an nit sikin lung ân kham tak tak a, thu itam takkah ân risei tâk a.

³⁵Khante, kholoi a hong nit tâk a, a kôilômhei khah Jisua ziangah an hong a, a ziangah, “Amahih mun infiar kêng a nit a, inî khom a zuang ok tâk a,

³⁶annihei hih ei kôlvêla loiheia manih, khuaheia manih an fâk rang imani lua an richôk theina rangin infe ta roh,” an ti a.

³⁷Jisuan an ziangah, “Nangmani ngêiin ifah rang peh rei,” a ti a. Khante, anni khan a ziangah, “Ibai duli [6] rizanik man var chon ifâk kin ipêk rang mani?” an ti a.

³⁸Khanchu, Jisuan an ziangah, “Ibai izâkâm nin inei, fe unla, va en ta u,” a ti a. An nei zâk an riat kaneh chu, “Ibai ringakah neh inga inikah,” itin an iril a.

³⁹Khanungchu, Jisuan mipuihei khah a lôm lômin loisûl chunga inṭhung rangin a kôilômhei kha thu a pêk a.

⁴⁰Khaangkan mipuihei khah a rân rânin rizaka lômin neh sômringaka lômin an inṭhung a.

⁴¹Kha rizoiin chu Jisuan ibai ringakah neh inga inikah khah a lâk a, rivân tiang a en a, Pathian ziangah lômthu â sîr a. Khanungchu, ibai khah a khoi a, mipuihei isem pêk rangin a kôilômhei kutah a pêk a. Inga khom khah an rêngka ziangah a sem pêk saa.

⁴²Mi tinin an fâk a, an khop seng a.

⁴³Khante, an fâk bân ibai neh inga khah khamlu sômleiinikah kôilômhei khan an la rût insip a.

⁴⁴Ai vâihei khah mi puitling ringot khom sângringakah an nit.

⁴⁵Khante, mipuihei â ṭhîn lâiin varâl tianga Bethsaida khuah a matona lei ife masa rangin a kôilômhei rikuangah ân chuang a.

⁴⁶Mipuihei â thla zoiin chu ṭongṭaina nei rangin itlângah a fe a.

⁴⁷Zân a hong zîng tenan chu rikuang khah dîl inlâinah a om tâk a, ani chu a khât bangin imuangah a om a.

⁴⁸Khante, ithlîn a no tiang a sêm sikin lunginzîng taka an rikuang zâp khah a mu a; khanchu, zîngah kôlrisam rangto vêlin dîl chunga lônin an tiang a hong pan a, anmani ikhêl a tum a.

⁴⁹Nikhomseh, anni khan dîl chungah a lôn an mun chu ithirthla an sôn a, an ikhêk rak rak a;

⁵⁰an rêngkan an rithla an invâi a. Khanchu, voikarengin Jisuan an ziangah, “Lungringam takkan om rei. Keimah kêng kî nit, ṭi no rei,” a ti a.

⁵¹Khanungchu, an ziangah rikuangah khan a chuang sa a, ithli khah arngam tâk a. Kôilômhei kha an ringai arkhêl tak tak a,

⁵²mi sângringakah a vâina thu omzia diktak khah reh thei mak a, an lungrilin ai man phâk ino a nit.

⁵³Khante, dîl râl an kâiin chu Genesaret ram an tlung a, amakhan an rikuang an thlung a.

⁵⁴Rikuang ata khah an ṭum kaneh chu Jisua a nit iti mihein an lei riat zel a.

⁵⁵Kha ram pumpuia mihei khah an hong itlân sui sui a, a omna an riatna kipah a ziangah dam inohei khah an puantha pumin an hong rizôn a.

⁵⁶Takmun khomah khoteheiah, khopuiheiah, loiheiah khom, Jisua fena kipah chu neinun zuarna munah khom dam inohei an hong ṭhui a, a puan môr ilua itôn thei ranga phal rangin an riphat a; khaangkan â tôn murdi chu an dam khai a.