Read Biete MARKA 7 Bible Online

MARKA 7 - Biete bible

MARKA 7

¹Khante, Jerusalema rithoka hong Farisaihei neh Dân inriseituhei Jisua ziangah an hong ribûm a.

²Khahei khan Jisua kôilôm ṭhenkahein kut inima fâk an zong khah an mu a, amakhah farisaihei ti lama kut an risûk no sika a nit.

³Farisaihei neh Judahei murdîn chu an pipuhei thumâk an zui a: balam takkan kut an risûk[7] no zelin chu fâk zong ngai mak a.

⁴Bazâra rithoka an kîr nôk khomin tui an risil bak no zelin chu fâk zong ngai mak e. Thumâk dang itam takkah an îtûk ngit khom a om sa; khahei khah kilâthei, bêlhei, sumsen bêlhei, zâlmunhei infâi rang itihei an nit.

⁵Khasikah khan Farisaihei neh Dân inriseituhei khan Jisua ziangah, “Ithôm ni kôilômhein pipu thumâk zôm loiin kut inimin fâk an izong hi?” itin an ridon a.

⁶Jisuan an ziangah, “Nangni vârrilethei, nin chungthu Isaian a lei îsîr khah a îdik titak a nit: “‘Hi mihei hin an bâi bangin an nen pâk a, Nikhomseh, an lungrilin chu a ne ilat vit a nit.

⁷Thurin angkah takin miriam thupêkhei an risei a, Khasikin, chubai an ne ûnna hih â tlong a nit,’ ai ti kha.

⁸“Pathian thupêkhei nin heng a, miriam inriseinahei khah nin izôm tâk a nit hih,” a ti a.

⁹Khante, amah ngirin an ziangah, “Nangmani thumâk nin zôm theina rangin Pathian thupêkhei heng dân chu nin ithiam titak a nit hih.

¹⁰Mosia khan, ‘Ni nu neh pa ngik roh, tukhom a nu manih, a pa manih vânisâm chu ithat rang a nit,’ itin thu a lei pêk a;

¹¹nangni rêkin chu hingkan nin ti ngai a, mîn a nu manih, a pa manih ziangah, ‘Ni ne mangna rang hih Korban a nit tâk,’ (amakhah ‘Pathian zianga ipe’ tina a nit) a tin chu

¹²a nu manih, a pa manih îte a tho pêk rang phal khâi ngai mak chei.

¹³Hingkana nin thumâk inriseina sikah hin Pathian thu chu nin îthâi inrimang ngai a nit hih. Hingkana sin nin itho a dang khom itam takka a la om sa,” a ti a.

¹⁴Khante, Jisuan mipuihei khah a koibûm nôk a, an ziangah, “Nin rêngkan ki ṭong ringai unla, rethiam rei.

¹⁵Putianga rithoka miriam sunga lût khan chu amah innim thei ngai mak a, miriam sung ata hong isuak hih miriam innim ngai chu a nit.

¹⁶Ikuar nin neiin chu ringai rei,” a ti a. [8]

¹⁷Mipuihei khah iman insungah a lût tenan chu a kôilômhei khan kha ṭong khah irilfia pêk rangin an ngên a.

¹⁸Jisuan an ziangah, “Mi danghei nêkan vâr ual mak chei na. Ite putianga rithoka miriam sunga lûtin chu amah innim thei ngai mak e;

¹⁹a lungril sungah lût loiin a phûngah a lût a, vâikôm fenah a suak nôk ngai sikin amah a înnim thei ino a nit iti hih nin iriat ino mani?” a ti a. (Amakhah Jisuan ifah ngai tinrêng chu arthiang a tina a nit.)

²⁰Khante, amah ngirin, “Miriam sunga rithoka hong isuak khan kêng mi a înnim ngai a nit.

²¹Miriam lungril sungtianga rithokah khan ngaituana sual a hong suak a, kha ngaituana sual khan riditna hei, inruna hei, mi thatna hei,

²²inrêna hei, kuatinkamna hei, sual tinrêng tho nuamna hei, lêmna hei, hurna hei, narsana hei, Pathian sîrinsiatna hei, lârripâkna hei neh intlona hei a hong isuak ngai a nit.

²³Hi sualhei murdi hih sungtianga rithokin a hong suak a, miriam khah a înnim ngai a nit,” a ti a.

²⁴Khanungchu, Jisua khan Galili ram iman Tura ram hualah a fe tâk a. In khatkatah a lût a, tutên an riat rang nuam mak a; nikhomseh, rithup thei mak a.

²⁵Khante, a nainu ramrilin ai man pêk nupang khatkah khom khan Jisua thurchi khah a riat kaneh a hong zel a, a ke bulah â bok a.

²⁶Kha nupangnu khah Jentail a nit a, Suria rama Foiniki huala suak a nit. Kha nupangnu khan a nainu sunga ramrili ûmisua pêk rangin Jisua a ngên a.

²⁷Khanniseh, Jisuan a ziangah, “Naihei khop bak riseh. Naihei fâk rang ilah pêk a, uihei zianga pe chu idik mak e,” itin a sâm a.

²⁸Nupangnu khan a ziangah, “Epu, inih chu a nit; khannisela, docham nuaia uihei khomin naihei bû ṭhul chu an fâk ngai im ki ta,” a ti a.

²⁹Khanchu, Jisuan a ziangah, “Kha ni sâmna ṭongbâi sikah khan fe nôk tan la, ramrili khah ni nainu sung ata a suak tâk,” a ti pêk a.

³⁰Nupangnu khah a inah a fe a, a nainu kha zâlmuna zâlin a va mu a; ramrili khan a lei imâk tâk a nit.

³¹Khante, Tura khua rithokin Jisua a suak nôk a, Sidon khua sirin Dekapoli ram ipâlin Galili dîl a hong tlung nôk a.

³²Mi khatkah kuarisêt, a bâi khom iboi hi a ziangah an hong ṭhui a, a chunga kut ringat rangin Jisua an ngên a.

³³Khanchu, kha mi khah Jisuan mipuihei lai ata a khât bangin a ṭhui a, a kutṭimin a kuarsung â khîk pêk a, â chil pêk a, â lei khom a tôn pêk a.

³⁴Khanungchu, Jisuan rivân tiang ienin arthuak huan a, a ziangah, “Effatha” a ti a. (Amakhah, “Hong ri-ong roh,” itina a nit.)

³⁵Khanchu, â kuarhei a hong ri-ong a, â lei rikhitna khom a hong risût a, ifiang takkan a ṭong thei tâk a.

³⁶Khante, Jisuan mipuihei ziangah tute iril tlak loi rangin thu a pêk a; nikhomseh, a khap natinsat dôrkah thang an inthei ual ual a.

³⁷Â ria murdi kan arkhêl an ti tak tak a, “Thil ai sin tinrêng hih arkhêl vang na! Kuarisêt khom ân vâr pêk a, bâiiboihei khom a înṭong thei hi,” an ti a.