Read Biete MARKA 8 Bible Online

MARKA 8 - Biete bible

MARKA 8

¹Khante, itôiteka nungah chu mipui dang itam takkah an hong ribûm nôk a. Îte ifah rang an nei no sikin Jisuan a kôilômhei a koi a, an ziangah.

²“Mipuihei hih ki ziangah sûn thumkah an om tâk a, îte ifah rang an nei no sikin ke lung a kham tak tak.

³Bu ngeiin an inah ken fen chu lamlâiah ṭâmisôlin rizal an ti, ṭhenkah vâng chu an hongna a lat a,” a ti a.

⁴A kôilômhein a ziangah, “Hi ramchârah hin tûm hi mipuihei vâina rang fâk â mu thei ranga?” itin an sâm a.

⁵Jisuan, “Ibai izâkâm nin inei?” itin ardon a. Anni khan, “Sarikah” an ti a.

⁶Khanchu, mipuihei khah rinênga ṭhung rangin thu a pêk a. Kha rizoin chu ibai sarikah khah a lâk a, Pathian ziangah lômthu â sîr a, a khoi a, mipuihei isem pêk rangin a kôilômhei ziangah a pêk a, a kôilômhein an sem tâk a.

⁷Ingate ichîntekah an nei sa a. Jisuan kha khomah khan lômthu â sîr nôk a, isem rangin a kôilômhei ziangah a pêk tâk a.

⁸Mi tinin an fâk a, an khop seng a, an rêngkan mi sângilikah vêl an nit. An fâk ban rinôi khom khamlu sarikah sar kôilômhei khan an rût insip a. Khanungchu, Jisuan mipuihei â ṭhîn a,

¹⁰ani chu a kôilômhei neh rikuangah an chuang zel a, Dalmanutha ram hualah an fe tâk a.

¹¹Khante, Farisai ṭhenkahei Jisua ziangah an hong a, an rikhalpui a. Amah in-ôk an nuam sikin Pathianin amah â ham iti riat theina ranga risin anmani inmu rangin an chûn a.

¹²Khanniseh, Jisua arniak [9]a, an ziangah, “Ithôm atûn lâia thoitharhei hin risin an izong hi? Nangni ke ril; atûn lâi thoitharhei ziangah hin riat theina zel ipe ni no nih,” a ti a.

¹³Khanchu, anni khah a mâk a, rikuangah a chuang nôk a, varâl tiang a fe tâk a.

¹⁴Kôilômhein ibai ichôi an ringil a, rikuangah khan ibai thliamkah bang an nei a.

¹⁵Jisuan, “Farisahei neh Heroda cholah hin ridîn unla, rivêng rei,” a ti pêk a.

¹⁶Khante, anni khan, “Ibai an nei viat no sika amahih ai ti kêng,” itin an isîr inrituk a.

¹⁷Jisuan an ṭong khah a lei riat a, an ziangah, “Ithôm ibai nin nei no thurchi teh nin îsîr inrituk? Nin lai riat thei tlak ino mani? Nin lungril ai cholol bâk tâk mani?

¹⁸Mit inei chakkan nin imu thei ino mani? Ikuar inei chakkan nin iriat thei ino mani? Nin irngil tâk mani?

¹⁹Mipui sângringakahei ta ranga ibai ringakah kî khoi lâiah khan an fâk bân khamlu izâkâm nin irût insip kha?” a ti a. Anni khan, “Khamlu sômleiinikah,” itin an sâm a.

²⁰Jisuan an ziangah, “Mipui sângilikahei ta ranga ibai sarikah ki khoi lâiah khan teh an fâk bân khamlu izâkâm nin irût insip kha?” a ti a. Anni khan “Khamlu sarikah,” itin an sâm nôk a.

²¹Khanchu, ani khan an ziangah, “Nin lai riat ngir ino mani?” a ti a.

²²Khante, Bethsaida khua an hong tlung a, amakhan Jisua ziangah mitdel an hong ṭhui a, aman ai tôn pêk rangin an ngên a.

²³Jisuan mitdel kut khah â tûk a, kho putiang a fe pui a. A mit â chil pêk zoiin chu a chungah kut arngat a, a ziangah, “Itika ni mu thei tâk im?” itin ardon a.

²⁴Khanchu, ani kha a hang tang a, “Miriamhei ki mu a; nikhomseh, thingkung ilôn angkan kêng ki mu,” a ti a.

²⁵Khanungchu, Jisuan mitdelpa mitah khan a kut arngat nôk a. Kha zoroah khan chu mitdelpa khan a en ngit a, a mit a hong vâr a, thil tinrêng a mun fel thei tâk a.

²⁶Khanchu, Jisuan, “Kho sungah hin lût khâi no roh,” itin he a be a, a in tiang ân fe tâk a.

²⁷Khante, Jisua neh a kôilômhei khah an suak a, Filipi Kaisari kôlvêl khuaheiah an fe a. Lampuiah khan a kôilômhei ziangah, “Mihein tûm a nit an ne ti?” itin ardon a.

²⁸Khante, anni khan, “Ṭhenkan chu ‘Baptistu Johana,’ nang an ti. Mi dangin chu ‘Elija,’ nang an ti. Ṭhenkah nôkin chu ‘Zânthla khatka khôk a nit,’ nang an ti,” itin an sâm a.

²⁹Khante, ani khan an ziangah, “Khateh, nangmanin teh tûm a nit nin ne ti,” itin ardon a. Peteran a ziangah, “Mesia ni nit,” itin a sâm a.

³⁰Khanchu, Jisuan an ziangah, “Ki chungthu hih tute iril tlak no rei,” itin he a be a.

³¹Kha rizoin chu Jisuan a kôilômhei ân risei tâk a, an ziangah, “Miriam Naipa hin thil itam takkah la tuang tak tak a ta, upahei neh thiampu lalhei neh Dan inriseituhein la nôl an ti. That an ta; nikhomseh, sûn thumka nungah chu thoinôk a ti,” a ti a.

³²Kha thu khah ifel takkan â sîr pêk a. Khanchu, Peteran ani khah a khâtin a ṭhui a, a ngo tâk a.

³³Khanniseh, Jisua khah arhêl a, a kôilômhei tiang a ngat a, Petera khah a ngo a, “Soitan, ke nungah lôn roh. Nî ngaitua hih Pathiana rithok ni loiin miriama rithok kêng ai nit,” a ti a.

³⁴Khanchu, Jisuan mipuihei neh a kôilômhei khah a koi a, an ziangah, “Tukhomin ne zui a nuamin chu mahni phialin a kros riputin ne zui riseh.

³⁵Tukhom a ringna inzôk inuam kan ichân a ta, khan, tukhom keima sik neh Thurchi Ṭha sika a ringna chân kan inzôk a ti.

³⁶Mîn rammual hih a pumin nei sela, a ringna chu ichân sela, a ta rangin im arfena? Arfena om tlak mak e!

³⁷Mîn a ringna nei nôkna ranga ai pêk thei îte ai nei ino a nit.

³⁸Tukhomin atûn lâi rualithar, inrê song neh isual takhei lâiah keimah neh ken riseina thu zakpui chu Miriam Naipa khom hin a vântirtôn rithianghei neh a Pa roinpuina sila a zuang tikin kha mi khah izakpui a ti,” a ti a.