Read Biete MARKA 9 Bible Online

MARKA 9 - Biete bible

MARKA 9

¹Khante, amah ngirin an ziangah, “Thudik nangni ke ril, hintaka om ṭhenkahei hi chu Pathian Ram khah a sinthotheina neh a zuang tlung an mu mâkah chu â thi no rang an om,” a ti a.

²Sûn rukka nungah chu Jisuan Petera, Jakoba neh Johana hei a ṭhui a, itlâng risângah an khât bangin a fepui a. An mitmuah Jisua mêl a hong danglam tâk a.

³A puansilhei khom kha rinênga puan risuh ngaihei rêng rêngin an irsûk înṭek thei tlak ino rang angkah dôrkan a ṭek a, artlêk zap tâk a.

⁴Khanchu, kôilôm ithumkahei khan Jisuan Elija neh Mosia arsônpui lâi an mu a.

⁵Khante, Peteran Jisua ziangah, “Minriseitu, hintaka om hih ei ta rangin a ṭhat; dângdite ithumkah, ni rang khatkah, Mosia rang khatkah, Elija rang khatkah sin kin ti,” a ti a.

⁶An ṭi rai sikin iti rang lile khom an iriat ino a nit.

⁷Khanchu, sûm a zuang zîng a, anmani a zuang rikhû a, sûma rithokah khan ṭong a zuang suak a, “Amahih ki Naipa lungthlungtak a nit, ama ṭong ringai rei,” a ti a.

⁸Khanchu, an hang en vêl zel a, an kôlah khan Jisua banah chu tute mu khâi mak a.

⁹Itlâng ata an zuang ṭum lâiin Jisuan an ziangah, “Miriam Naipa hi mithi lâi ata a thoinôk mâkah chu nin thil mu hih tute iril tlak no rei,” itin thu a pêk a.

¹⁰A thupêk khah an zôm a; nikhomsela, an khâtin chu, “‘Thina rithoka thoinôk,’ iti hih itinâm ai nit,” itin an isîr inrituk ngai a.

¹¹Khante, anni khan Jisua ziangah, “Ithôm Dân inriseituhein ‘Elija zuang bak a ti,’ an iti?” itin an ridon a.

¹²Ani khan an ziangah, “Thil tinrêng siam inrifûk diam rangin Elija chu ai zuang bak ngêt rang a nit. Khannisela, ithôm ‘Miriam Naipa hi la tuang tak tak a ta, inôlin la om a ti,’ iti riziak ai nit hi?

¹³Nikhomsela, nangni ke ril, Elija chu a zuang pial tâk a, a thurchi riziak angkah ngêiah khan mihein a chungah an inuam murdi an itho tâk a nit,” a ti a.

¹⁴Khante, kôilômhei ziang an zu tlungin chu an kôlvêla mipui itam takkahei khah an mu a, Dân inriseituhein an lei risêlpui a.

¹⁵Mipuihei khan Jisua an mu kaneh chu an ringai arkhêl a, a ziang tiang an itlân a, chibai an va bûk a.

¹⁶Jisuan an ziangah, “Anmani neh khan î thurchi tak im nin irsêl kha?” itin ardon a.

¹⁷Mipuihei lâia mi khatkah khan a sâm a, “Minriseitu, ki naipa, ramrili bâiiboi iman ni ziangah ki hong ṭhui a;

¹⁸a manna ikipah â lîr zel ngai a, â suai a thlor a, arkam â rôt a, a khir khap ngai. Ûmisua pêk rangin ni kôilômhei ki ngên a; nikhomseh, thei mak a,” a ti a.

¹⁹Jisuan an ziangah, “Ingkana iamna boi mi nin init rai tâk im na! Itena sôt im nin zianga omin nangni ki ngaitua thei rang? Naipangpa khah ki ziangah hong ṭhui rei,” a ti a.

²⁰Khanchu, a ziangah an hong ṭhui a. Ramrili khan Jisua a mu kaneh naipangpa khah a nuam a lo a; khanchu, rinêngah â lîr a, hong ikûi â kûi a, â suai a thlor a.

²¹Jisuan a pa ziangah, “Hingkana a om phutna hih tikin ta tâk mani?” itin ardon a. Ani khan, “A naipang lâia rithoka tâk a nit.

²²Ramrili hin amah ithat rang itumin voi itam takkah meiah neh tuiah ân lîr tâk a. Ni thei paiin chu lung nen kham inla, ne san roh,” a ti a.

²³Jisuan a ziangah, “Ni theiin chu e; â iamhei ta rangin chu tinrêng ithei a nit,” a ti a.

²⁴Khanchu, naipangpa pa khan iṭap pumin, “Ki iam, khan ki iamna a det thei ualna rangin ne san roh,” itin â khêk suak zel tâk a.

²⁵Khante, mipuiin an hong nâi tîr tîr khah a mun chu Jisuan ramrili khah a ngo a, “Nangmah ramrili kuarisêt neh bâiiboi, naipangpa sung ata hong isuak a, a sungah lût nôk tlak khâi loi rangin thu nang kî pêk a nit,” a ti a.

²⁶Khanchu, ramrili khah â khêk rak a, naipangpa khah a nuam a lo bit zoin chu a suak tâk a. Khante, naipangpa khah ithi angkah dôrin a om a, mi tam takkan chu “Â thi tâk a nit,” an ti a.

²⁷Khanniseh, Jisuan a kutah â tûk a, a kâiithoi a; khanungchu, a hong iding tâk a.

²⁸Khante, Jisua kha inah a lût tenan chu a kôilômhei khan a ziangah, “Ithôm keimanin chu kin ûmisua thei no?” itin mi riat loiah an ridon zâi a.

²⁹Jisuan an ziangah, “Hingkana hi chu ṭongṭaina [10] ti non chu îte dangin ûmisua thei ni mak e” itin a sâm a.

³⁰Jisua neh a kôilômhei khah kha mun ata an suak a, Galili ram ipâlin an fe a. Jisuan a omna tutên an iriat rangin nuam mak a;

³¹a sik chu kôilômhei khah thu înrisei ai nei a nit; an ziangah khan, “Miriam Naipa hih miriamhei kutah imanin om a ta, that an ti. Nikhomseh, sûn thumka nungah chu thoinôk a ti,” a ti a.

³²Khanniseh, a thu inrisei omzia khah reh mak a, ardon lak khom ngam ual mak a.

³³Khante, Kapernaum an hong tlung a, in sungah an lût tenan chu Jisuan a kôilômhei ziangah, “Lampuiah khan îthu tak im nin irsêl kha?” itin ardon a.

³⁴Lampuiah khan, “Ei lâia hin tûm â roinpui tak rang?” iti thu an irsêl a nit sikin anni khan an isâm ino a nit.

³⁵Khanchu, Jisua khah â ṭhung a, Kôilôm Sômleiinikahei khah a koi a, an ziangah, “Tukhom ân chung tak ini nuamin chu ân nuai tak ichangin mi murdi som a nit ngêt rang a nit” a ti a.

³⁶Khanchu, naipangte a hei kâi a, an lâiah ân ding pêk a, a kua a, an ziangah,

³⁷“Tukhom ker ming sika hingkana naipangte khatkah khom ilôm chu keima ne lom an nit; khante, tukhom keima ne lôm chu ne tirtu lôm a nit,” a ti a.

³⁸Johana khan a ziangah, “Minriseitu, mi khatkah ner minga ramrili ûmisua kin mu a, ei lôma mi a nit no sikin kin hong ikhap a nit,” a ti a.

³⁹Jisuan an ziangah, “Khap no rei, tute ker minga sinrikhêl isin a, ne sîrinseh thei omak e.

⁴⁰Tukhom ne kal ino chu ei tianga ṭang a nit.

⁴¹Thu dik nangni ke ril, tukhom keima mi nin nit sika tuisik kilâtkah khom nangni in-in chu kha mi khan a loman dok tlak no nih.

⁴²“Tukhomin hi ne iamhei lâia mi chîntak khatkah khom ân bân chu a ringah bunôilung ilianpa inlin tuikhanglianah iṭhul sela a ta rangin ṭha ual a ti.

⁴³Khasikin, ni kutin nang ân bân chu, tan zel roh. Kut inika neia Gehena [11] mei ram thei ngai inoa fe nêkan chu kut ibûla ringnaa lût ni ta rangin a ṭhat ual.

⁴⁴Kha munah khan chu ringe khah thi khâi ngai mak a, mei khom ram khâi ngai mak e.

⁴⁵Khante, ni ke khomin nang ân bân chu tan zel roh. Ke inika neia Gehena ipaia nî om nêkan chu ke bûla ringnaa lût ni ta rangin a ṭhat ual.

⁴⁶Kha munah khan chu ringe khah thi khâi ngai mak a, mei khom ram khâi ngai mak e.

⁴⁷Khante, ni mit khomin nang ân bân chu, ikhel pai roh. Mit kiang ruaika neia Gehena ipaia om nêkan chu mit kiangka neia Pathian Rama lût ni ta rangin a ṭhat ual.

⁴⁸Kha munah khan chu ringe khah thi khâi ngai mak a, mei khom ram khâi ngai mak e.

⁴⁹“Ribôlna chu ichi alin ai thâr ngai angkan mi tinrêng meiin ithâr la nîng an ti.

⁵⁰“Ichi hih a ṭhat; nikhomsela, a dong nungin teh ingkan im nin in-al nôk rang? “Nangmani lâiah khan rualrichanna ichi nei unla; khanchu, ringei irkan om rei,” a ti a.