Read Biete LUKA 1 Bible Online

LUKA 1 - Biete bible

LUKA 1

¹Ei lâia thil zuang itlung, a tîr ata mita mutuhei neh thusîrtuhein an ne îril angkah khan mi tam takkan riziak an tum tâk a.

²Khasikin, Theofil maritiom tak, a bula rithokin tinrêng ifel takkan keimah ngêiin ki sui a,

³ridot thlâmkan ni ta rangin riziak inlang kî ti a nit.

⁴Tiana thurchi nang an lei înriseihei khah â dik tak a nit iti ni riat theina rangin.

⁵Judai ramah Heroda ân lal lâiah khan Abija lôma mi thiampu Zakaria a om a, a nupui khah Arona richia mi Elizabeti a nit.

⁶An ruaika khan Pathian mitmuah mi fel an nit a, sêlna boia Pumapa thupêkhei neh Dân murdi zôm mi an nit a.

⁷Khannisela, Elizabeti kha a ching sikin nai nei mak a, an ruaika khan an ûnlian ok tâk a.

⁸Khante, sûnkah chu an pôl sintho ngai balamin Zakaria khan Pathian maah thiampu sin a tho a.

⁹Thiampuhei tho ngai dân angkan Tempil sunga lûtin, Pumapa mâichâma namhoi ihâltu rang thlasâna an ien chu a chungah a tlâk a.

¹⁰Namhoi a hâl lâiah khan mipuihei chu an rêngkan tualah an lei ṭongṭai a.

¹¹Namhoi hâlna mâichâm changtianga dingin Pumapa vântirtôn khah a ziangah a zuang inlâr a.

¹²Zakaria khan a mun chu rilônthingin a ṭi tak tak a.

¹³Khannisela, vântirtôn khan, “Zakari, ṭi no roh, ni ṭongṭaina khah Pathianin a riat a. Ni nupui Elizabeti khan naiipa nang nei pêk a ta, arming Johana nî sak rang a nit.

¹⁴A zuang suak sikin nangmah neh mi tam takka lungril ilômin râifân a ti.

¹⁵Pumapa mitmun milian nîng a ta, uain neh zu rêng rêng in no nia. A suak nî ata Rithla Rithiangin sip a ti.

¹⁶Israel richihei lâia mi itam takkah Pumapa an Pathian tiang hong ṭhui nôk a ti.

¹⁷Zânthla Elija angkan irât neh ihâi takkan Pumapa matonah fêng a ti. Pahei neh naihei inrimun nôk a ta, helâkloihei chu lungril ifel riputhei angkan inripuh nôk a ta, Pumapa ta rangin mihei chu inrifo diam a ti,” a ti a.

¹⁸Vântirtôn ziangah Zakaria khan, “Amakhah ingkan im ki riat infel thei rang? Kei lak itar ki nit tâk a, ki nupui lak khom â ûnlian ok tak a nit a,” a ti a.

¹⁹Vântirtôn khan, “Keimah hi Pathian makunga ding ngai Gabriela ki nit a, nangmah nang isôn rang neh hi thurchi lômiom nang iril rang piala zuk itir ki nit.

²⁰Ringai roh, hi thu a zoro taka zuang itlung ngêt rang nang ki îril hih ni iam no sikin a zuang tlung tak tak mâkah chu ṭong thei loiin dâirek ni ti,” a ti a.

²¹Mipuihei khan tualah an lei ngâk a, Tempil sungah a om sôt rai sikin an ringai arkhêl a.

²²A hong suak tenan chu an ziangah îte isîr thei khâi mak a, Tempil sungah inlârna ai mu a nit iti an riat tâk a; kutrisin bangin thu â sîr a, ai ṭong thei viat khâi ino a nit.

²³Tempila a sintho zoro bituk a hekin chu a inah a fe tâk a.

²⁴Zoro sôt inote nungah chu a nupui Elizabeti khan nai a vong tâk a, thla ringaka sung chu tual suak mak a.

²⁵“Nung insîrah ker ming isia sut rangin Pumapan a ne isan a nit hi,” a ti a.

²⁶Elizabeti nai vong, a thla ruknaah khan chu Pathianin vântirtôn Gabriela kha Galili rama Nazaret khuaah a tir a.

²⁷Rêng Davida richia mi Josefa nupui hual nungâk rithiang Mari ziangah thu a zuang chôi a.

²⁸Mari ziangah insungah a lût a, “Chibai, ditsakbîknu, Pumapa ni ziangah a om, ṭhat nang ai vur tak tak a nit,” a ti a.

²⁹Kha vântirtôn thu zuang ithlun khan Mari lungril ân buai a, im a nitzia tâk itin a ngaitua a.

³⁰Khante, vântirtôn khan, “Mari, ṭi no roh, Pathian ditsakna nî dong a nit.

³¹Ringai roh, nai vong ni ta, nai ipa nei ni ta, arming Jisua sak ni ti.

³²Ani chu mi roinpui nîng a ta, Chungnungtak Pathian Naipa tîng an ti. Pumapa Pathianin a chibul Davida rêngṭhungmunah inṭhung a ti.

³³Jakoba richihei chungah kumkhuakan inlal a ta, a rêng ramin mong nî nei no nih,” a ti a.

³⁴Khante, Mari khan vântirtôn ziangah, “Amakhah ingkam a nit thei ranga? Pasal la nei ino nungâk ithlîng kî nit khate,” a ti a.

³⁵Vântirtôn khan a sâm a, “Rithla Rithiang kha ni chungah zuang a ta, Pathian ritha ni chungah om a ti. Khasikin, naite zuang isuak rang khom mi rithiang, Pathian Naipa an iti rang a nit.

³⁶Khante, ringai roh, nen zirpuinu Elizabeti, â ching an iti ngai khomin a tar nungin naiipa a vong a, atûna thla hih a thla rukna a nit tâk.

³⁷Pathian rangin chu îte thei ino zel omak e,” a ti a.

³⁸Khanchu, Mari khan, “Pumapa somnu ki nit a, ni thu angkah takin ki chungah tlung riseh,” a ti a. Khanungchu, vântirtôn khan a mâk tâk a.

³⁹Kha rizoi kaneh chu Mari khah arsiam a, Judai ram thingtlâng khua khatkah ipanin a fe tâk a.

⁴⁰Zakaria inah a lût a, Elizabeti kha chibai a bûk a.

⁴¹Elizabetin Mari chibai bûkna rôl khah a riat kaneh a phûnga naite kha a châng a, Elizabeti kha Rithla Rithiangin a sip tâk a.

⁴²Khanchu, rôl iring takkan â khêk a, “Nang chu nupang lâia hamṭha tak ni nit a, ni nai vong rang khom mi hamṭha a nit.

⁴³Ingka tliam ai nit tâk ki Pumapa nu teh ki ziangah nî hong tâk hi?

⁴⁴Ni chibai bûkna rôl ki riat kaneh lôm sikin ki sunga naite khom ai châng a nit.

⁴⁵Ni zianga Pumapan thu a ithlun khah ni chungah tlung ngêt a ti ni iam sikin mi hamṭha ni nit,” a ti a.

⁴⁶Khanchu Marin, “Ki ringnan Pumapa a chôiinrisâng a,

⁴⁷Ker thla khom ne saninringtu Pathian chungah ai lôm tak tak a nit.

⁴⁸Â somnu tlômzia hih a riat mai a, Atûn ata chu suanpâr tin tinin mi hamṭha ne tîng an ti.

⁴⁹Sinthothei Pathian khan ki chungah thil roinpui tak a tho tâk a, Arming khom arthiang a nit.

⁵⁰Rualithar ata rual thoithar nôk idênin, Ama ṭituhei ta rangin chu a lungkhamna dâi ngai mak.

⁵¹A bân tharât an chungah a dâng a, Lungrila lârripâkhei chu â chekindar ngai.

⁵²An rêngṭhungmun ata rêng roinpuihei kha a kâi isim a, Ringaiintlôm mihei kha a chôiinrisâng tâk a.

⁵³Voniṭâmhei chu thil iṭha murdin â fân khop a, Richonghei chu kut korongin ân rot tâk a.

⁵⁴Ei chibulhei zianga a ṭonginkung angkah khan, Â som Israelhei isan rangin a zuang tâk a.

⁵⁵Abrahama neh archihei lung ân khamna kha, Kumkhuakan ai riat mai a nit hih,” a ti a.

⁵⁶Mari khah Elizabeti ziangah thla thumkah a châm a; khanchu, a in tiang a fe nôk tâk a.

⁵⁷Elizabeti nai nei zoro a hong tlung tâk a, naiipa a nei a.

⁵⁸A bungahei neh a suapuihei khan Pumapan lung ân khamzia an riat a, an lômpui tak tak a.

⁵⁹Khante, a sûn iriatnin chu naite sertan rangin an hong a, a pa riming riputin Zakaria ngir isak rang an tum a.

⁶⁰Khannisela, a nu khan, “Ni thei no nih, arming chu Johana isak rang a nit,” a ti a.

⁶¹Annihei khan, “Nin suapuihei lâiah khom hi riming riput hih tute la om ngai mak,” an ti a.

⁶²Khanungchu, a pa khah naite riming im a sak nuam itin kut risinin an ridon a.

⁶³Zakaria khan riziakna lekhaphêk a nî a, “Arming chu Johana a nit,” itin arziak a. An rêngkan an ringai arkhêl tak tak a.

⁶⁴Tukvakkan Zakaria khah a hong ṭong thei a, Pathian ân pâk zel tâk a.

⁶⁵An bungtualbômhei murdi khan an ṭi a, kha thurchi khah Judai tlângram mun tinah ân thang tâk a.

⁶⁶Â ria murdi khan, “Hi naite hih ingka takin im a la hong iom rang na!” an ti a. Pumapa ompuina ritha khah a chungah a om mai a.

⁶⁷Johana pa Zakaria kha Rithla Rithiangin a sip a, Pathian thucha â sîr a:

⁶⁸“Pumapa, Israel Pathian chu inpâkin om riseh, A mihei isan rangin a zuang a, ân zôk tâk a.

⁶⁹Â som Davida richia rithokin ei rang saninringtu roinpui a ne pêk tâk a.

⁷⁰Khuansiang ata a zânthlahei zianga a înkung angkah khan,

⁷¹Ei irâlhei neh ne nelhei ata nen zôktu rang kha.

⁷²Ei chibulhei zianga a lungkham inlang rang ai ti, A thuthlung rithiang khah ai riat mai a nit.

⁷³Ei chibul Abrahama ziangah ṭonginkung idet a nei a, Ei irâlhei ata ne saninzôk a,

⁷⁴Ṭi loia a sin ei tho a,

⁷⁵Ei damsunga a mitmuah rithiang neh ifela ei om theina rangin.

⁷⁶A nit, Tôite, nang chu Chungnungtaka zânthla nang tîng an ta, Pumapa lampui isiam rangin a matonah fêng ni ta;

⁷⁷A mihei chu an sualhei izâa omin a saninring iti thu iril ni ti.

⁷⁸Ei Pathian chu khorngaina sip, mi lunginkham thei a nit a; Khasikin, saninringna inî chu ei chungah a ne îsua pêk rang a nit.

⁷⁹Thina dâilîm izînga ṭhunghei murdi rivân ata elinvâr a, Thlangamna lampuia ei kehei nen phêt rangin,” a ti a.

⁸⁰Khante, naite khah taksa neh rithla tiang a thuar tîr tîr a, Israel mipuihei lâiah a hong ilang mâkah chu ramchârah ai om mai a nit.