Read Biete LUKA 10 Bible Online

LUKA 10 - Biete bible

LUKA 10

¹Kha rizoiah khan Pumapan mi dang sômsarikah inikah [7] a zen a, a fena rang kho tinah neh mun tinah lei ife masa rangin a bop bopin a tir a.

²An ziangah, “Bu ât rang a tam a; khannisela, â tikbûm rang lak mi an roi a. Khasikin, a bu tikbûm ranga mi tir rangin bu neitu ziangah ngên rei.

³“Fe unla, iniahei lâia berate om angkan nangni kî tir a nit hih.

⁴Sumkok manih, cholite manih, pheikok manih chôi no rei; lampuiah khom tute chibai bûk no rei.

⁵Nin tlung in ikipah ‘Hi inah hin thlangamna om riseh,’ ti bak ngai rei.

⁶Kha inah khan thlangamna ringaiinnah mi a lei omin chu nin thlangamna chibai khah a chungah om sela, an om non chu nin chibai kha nin ziangah hong kîr nôk riseh.

⁷Nin tlung inah khan om mai unla, nangni an ipêk murdi fah unla, in rei, sinithotu chu thalo mûn rup a nit. In dang dangah tlung lôr duai duai no rei.

⁸“Khante, khua nin lutna kipah nangni an lei lômin chu, nangni an ipêk kangân chu fah unla,

⁹kha khuaa dam inohei khom indam unla, an ziangah, ‘Pathian Ram chu nin ziangah a zuang tlung tâk,’ ti rei.

¹⁰Nin lûtna khuahei khan nangni an lei ngaisak non chu nin rot malamin an tualah,

¹¹‘Nin kho vâivut kin kea kop tena khom nin chungah kin îthing nôk vang a nit hih. Nikhomsela, Pathian Ram nin ziangah a zuang tlung tâk iti chu lei reh rei,’ nin ti pêk rang a nit.

¹²Nangni ke ril, Pathian Roirêl Nikhuaah khan chu kha khuahei tuang rang nêkan chu Sodom khua tuang rang chu a zâi om ual a ti.

¹³“Nangmah Korazin, ni chung ân khôk vang na! Nangmah Bethsaida khom ni chung ân khôk vang na! Nangmania sinrikhêl ithohei khah Tura neh Sidon khuaah itho ni sela chu borapuan isilin rivut riphulin an sual rilet tâng an ti.

¹⁴Roirêl Nikhuaah khan nin tuang rang nêkan chu Tura neh Sidon tuang rang chu a zâi om ual a ti.

¹⁵Nangmah khom Kapernaum, rivân idêna inpâk nî nit rang mani? Dûkmuna pai iṭhul kêng nî nit rang.

¹⁶“Tutu nin thu ringai chu ki thu ringai an nit; tutu nangni heng chu keima ne heng an nit; khante, keimah ne hengtu khan chu ne tirtu heng an nit,” a ti a.

¹⁷Khante, sômsarikah inikahei kha râiifân takkan an hong kîr nôk a, “Puma, ramrilihei khom ner ming sikin kin thu an zôm,” an ti a.

¹⁸Jisuan a sâm a, “Rivân ata iṭêk angkana Soitana zuang iṭul khah kî mu a nit.

¹⁹Ringai rei, irûlhei neh imuang âinuvêthei chunga lôn theina neh irâlhei sirde theina ritha nangni kî pêk a nit hih, iten nangni innah tlak no nih.

²⁰Khanniseh, ramrilihei nin thu thua an om sikah hin lôm no rei, rivânah nin riming riziak a nit sikin lôm rei,” a ti a.

²¹Kha lâi takah khan Jisua chu Rithla Rithiangin lômnan a sip a, “Epa, rinêng neh rivân Pumapa, nangman mi vârhei neh mi thiamhei ziangah hi thu hih ni thup khap a, mi inmôlhei ziangah nen puang sikin lômthu nang ke sîr; a nit, Epa, amakhah ni lungdo neh ni nuamlam tak a nit.

²²“Ki pan thil tinrêng a ne pêk tâk. Naipa hi Pa banah chu tutên reh mak a; Pa khom hi Naipa neh an zianga Naipan ân puang nuamnahei banah chu tutên reh mak e,” a ti a.

²³Khante, Jisuan kôilômhei tiang a ngat a, inrûkkan an ziangah, “Hi thilhei nin imu hih nin râlvân a ṭhat vang na!

²⁴Zânthlahei neh rêng itam takkahei khomin nin thil muhei hih â mu an nuama chu an imu no a nit; nin iriathei hih â ria an nuama chu an iriat ino a nit,” a ti a.

²⁵Voikah chu Dân inriseitu khatkah hi Jisua rinak rangin a hong a, a ziangah, “Minriseitu, kumtluang ringna neina rangin im ki sin rang?” a ti a.

²⁶Jisuan a sâm a, “Thubu khan im a ti? Ingkan im nin itep ngai?” a ti a.

²⁷Khanchu, ani khan, “‘Pumapa ni Pathian chu ni lungril murdin, ni ringna murdin, ni râtna murdin, ni lunginṭong murdin lung ni thlung rang a nit. Nangmah lung ni irthlung angkan ni bungahei lungthlung roh,’ a ti,” itin a sâm a.

²⁸Jisuan a ziangah, “Ni sâm indik, khangkan tak sin inla, ring ni ti,” a ti pêk a.

²⁹Khannisela, Dân inriseitu khan thiam ichang inuamin, Jisua ziangah, “Tuhei im ki bungahei?” a ti a.

³⁰Jisuan a sâm a, “Mi khatkah, Jerusalem ata Jeriko khuah a zuk fe a, lampuiah suammihei a tong a, a silbomhei khah an khek pêk vang a, an itôk bit a, ithi lôk lôkkan an mâk rak tâk a.

³¹Khante, kha lampuiah khan thiampu khatkah a zuk fe a, kha mi khah a mun chu lam dang tiang a pial tâk a.

³²Khangkah ngirin, Levia richia mi khatkah khomin kha mun khah a zuang tlung a, ani khah a mun chu lam sîr tiang a pial tâk a.

³³Khante, Samari mi khatkah inzin khan kha mun khah a hong tlung a, ani khah a mun chu lung ân kham tak tak a.

³⁴A ziang a va pan a, a sâbehei khah siriak neh uain a buak a, a tuam pêk tâk a; ama sakuartung chungah ân chuang a, khualbûkah a fepui a, a donsui tâk a.

³⁵Atûkah chu tangka inikah a sap a, khualbûk enkoltu khah a pêk a, ‘Lei donsui inla, hi bana ni thâmna murdi chu ki hong kîr nôk tikah nang tuak ki ti,’ a ti a.

³⁶“Khateh, kha mi ithumkahei lâia a tu tak khâm suammi tongtu bungahei inih rangin ni iam,” a ti a.

³⁷Dân inriseitu khan, “Lunginkhamtu tak khah,” itin a sâm a. Jisuan, “Fen la, nang khom khangkah takah khan va tho roh,” a ti pêk a.

³⁸Khante, Jisua neh a kôilômhei an inzin malamin, khua khatkah an lût a, nupang khatkah arming Marthi khan a inah â thlun a.

³⁹Inzirpui khatkah Mari an iti kha a nei a. Mari khan Pumapa ke bula ṭhungin a thu sîr arngai a.

⁴⁰Marthi kha chu thlâihei isinin a buai tak tak a; khanchu, a ziangah a hong a, “Puma, ken zirpuinun ki khât banga châng ranga a ne imâk hih a ṭhat nî ti mani? Ne hong isan rangin ti pêk roh,” a ti a.

⁴¹Khante, Jisuan, “Marthi, Marthi, thil itam takkah ni ngaitua a, nî buai kêng ai nit.

⁴²Khanniseh, thil khatkah bang kêng â nang ai nit, Mari khan thil dik arthlang a, isut rang ni khâi mak e,” a ti a.