Read Biete LUKA 12 Bible Online

LUKA 12 - Biete bible

LUKA 12

¹Mipui sâng itam takkah risirpol suai suai rang dôrkan an hong ribûm a. Jisuan thu â sîr a, a kôilômhei ziang vângah chu, “Farisai vârrilethei chol ata ridîn rei.

²Tinrêng ihupa om khah lân lang nîng a ta, thil rithup khom ireh suak la nîng a ti.

³Khasikah khan, zân inthima nin itihei khah sûn khovârah inpuang la nîng a ta, chontan sungrila kuar kunga nin iti khah inchunga chuangin tlâng la sam an ti,” a ti pêk a.

⁴Ki rualhei o, nangni ke ril, takpum that zoi nung a, îte lo thei khâi ino kha chu ṭi no rei.

⁵Tûm iṭi rua nangni ril ki ti; taksa that a, khanung khoma dûkmuna nangni pai theitu Pathian khah ṭi rei; a nit, nangni ke ril, Amah bang ṭi rei.

⁶Vasak ringakah tangka [11] inikan an izuar ngai ni mak im a? Pathian khan chu an lâia khatkah te lua ringil ngai mak e.

⁷Nin samzâihei tena khom ai tep riai kêng ai nit. Khasikin, ṭi no rei, vasak itam takka nêkan khom nin ilut ual a nit.

⁸“Nangni ke ril, tutu vântlâng riata ne thlop chu Miriam Naipa khom hin Pathian vântirtônhei makungah thlop a ti.

⁹Nikhomsela, tutu vântlâng riata ne phial ka chu Miriam Naipa khom hin Pathian vântirtônhei makungah phial a ti.

¹⁰“Tukhom Miriam Naipa a sêlna chu izâ nîng a ta; khannisela, Rithla Rithiang â sîrinsiatna chu izâ ni no nih.

¹¹“Khante, nin roi irêl rangin inkhôm inah manih, Ram-optu makunga manih, thuneituhei makunga manih nangni an ṭhui tikin sâm rang dân manih, nin ti rang manih ingaituan ni ilung inkâng no rei.

¹²Nin ti rang chu a zoro takah Rithla Rithiang khan nangni ril a ti,” a ti a.

¹³Mipui lâia khatkan Jisua ziangah, “Minriseitu, ken zirpuipa ziangah kin pa richon ne sem sa rangin ne ti pêk roh,” a ti a.

¹⁴Jisuan a sâm a, “Mala, nin ruaika chungthu rêl rang neh richon nangni sem pêk rangah hin tûm thu ne pe?” a ti a.

¹⁵Khante, an ziangah, “Ridîn unla, rizukna tinrêng ata rivêng rei; miriam ringna hi richongnaa ringat ni mak e,” a ti a.

¹⁶Khante, an ziangah hi ṭongrikhek hih â sîr a, “Richong tak khatkah hi a vângsak a hong inṭum tak tak a.

¹⁷Khanchu, arngaitua a, ‘Ingkan im ki tho rang tâk o? Ki bu neh bâl siana rang nei khâi mang hite,’ a ti a.

¹⁸Hingka hin thông ki ti, ‘Ki fasiar ṭhet ki ta, a nêka lian ualin sin ki ta; amakhan ki bu neh bâl neh ki neinun murdi siang ki ti.’

¹⁹Khanungchu, ker thla ziangah, ‘Rithla, kum itam takka inrup rang thil iṭha ni bûm tâk a; ringam inla, fan la, in inla, ningibei takkan om ta roh, tîng ki ti,’ a ti a.

²⁰Nikhomsela, Pathianin a ziangah, ‘Invêt, vuanzân zel ni ringna nang an ilâk pêk rang a nit. Ni neinun isuahei hi tuheiin im an idong rang tâk?’ a ti pêk a.

²¹Pathian tiang richong loi a, mahni ta rang banga richon ibûm chu khangkah khan nîng a ti,” a ti a.

²²Jisuan a kôilômhei ziangah, “Khasikin, nangni ke ril, nin ringna rang im nin fâk a, nin taksa rang im nin sila nin bom rang lung inkâng no rei.

²³Fâknêk rang nêkan ringna a lut ual a, silbom rang nêkan takpum a lut ual.

²⁴Vaâkhei hih en ta u, bu khom tu mak a, bu khom ât mak, pang khom nei mak a, fasiar khom nei mak e; nikhomsela, Pathianin â fa ngai; nangmani hi ivahei nêkan chu nin ilut ual ok a nit.

²⁵Nangmani lâiah lungkâng sikin tu tak im mahni ringna insôt thei [12] ual a?

²⁶Khangkah te lua nin tho thei non teh, im a dang vâng khateh nin ilung nin înkâng?

²⁷“Lilipârhei thuar dân hi ngaitua ta u, sin zong mak a, puan khom không mak; nikhomsela, nangni ke ril, Solomona lua khom a roinpuina murdia arvo khomin hi pârte khatkah hih ai tluk ino a nit.

²⁸Khaangkan, ram loisûl, vuaninta om, naktûka lungthua hâl nôk rip rang ilua Pathianin khangkah dôran a von teh, nangmani, iamna chînhei o, khahei nêka khan nangni a vo natinsat rang vang na!

²⁹“Khasikin, nin fâknêk rang ingaituan buai no unla, nin ilung khom inkâng no rei.

³⁰Hihei hih rammual mihei murdi ibuaipui tak a nit; nin Pan hihei hih nangni khomin nin inang a nit iti ai riat riai a nit.

³¹Ama ram chu zong masa unla; khanchu, khahei kha chu nangni peh sa riai a ti.

³²“Pôl iroitehei o, ṭi no rei, ram nangni pe hih nin Pa lômlam tak a nit.

³³Nin neinun murdi zuar unla, inrianghei peh rei. Rivânah, inruhei fe thei khâi nonaah, ithimin a fâk isiat thei khâi nonaah khan, sumkok seh thei khâi inohei, richon ṭiam thei khâi inohei nin ta rangin inrifûk rei.

³⁴Nin richon omna kipah nin lungril khom om a ti.

³⁵“Nin puan isilin, nin kong ikhitin, nin meiser ichokin, tiklâi khomin inrin ṭiankan om rei.

³⁶Isom, an pu rinei ruaiṭhe ata zuang inkhâr â kik kaneh iong zel ranga lei ingâk ṭianhei angkan om rei.

³⁷Isom, an pu zuanga intûng ṭiana om ai muhei chu mi vânnei an nit. Thudik nangni ke ril, ani chu risiam a ta, anni khah khalai rikhîl rangin inṭhung a ta, aman innê a ti.

³⁸Zânlâia manih, ârkhuana manih, a zuanga, khangkana isom inrin ṭiana om ai muhei chu mi vânnei an nit.

³⁹Hih remai rei, inru hong rang zoro inchongpun reh sela chu a in inrok no nih.

⁴⁰Khasikin, nangni khom inrin ṭiankan om rei, Miriam Naipa hih nin tûngno lâi takin zuang duai a ti,” a ti a.

⁴¹Petera khan, “Puma, hi ṭongrikhek hih keimani bang im ni ne îril, mi murdi khom im?” a ti a.

⁴²Pumapa khan a sâm a, “Isom iamom neh ivâr tak kha tûm nîng a ti? A pu khan a insung icharêl a, isom danghei ruaitu neh an fâk isem pêk ranga a uliana ai siam tak khah a nit.

⁴³A pu a hong a, khangkana lei itho isom a hong imu khah mi vânnei a nit.

⁴⁴A dik takin nangni ke ril, kha som tak khah a pu khan a neinun ikoltun siam a ti.

⁴⁵Khannisela, kha som khan â lungrilin, ‘Ki pu hi la zuang zel no nih,’ itin isomnuhei isompahei khah lei hêm sela, ifa iinin lei inrui mai sela,

⁴⁶kha som khan ân rin no nikhua, ân tûngno kâr takin a pu khah zuang a ta, a pu khan bong inikan ridên a ta, mi iamom inohei rangtum indong a ti.

⁴⁷Isom, a pu nuamlam ireh chakka sin nuam ino neh intûng ino chu inah takka kuttum itho nîng a ti.

⁴⁸Khannisela, riat no sika tôkmol fâkna rak rang thil thonsual chu idam ualka kuttum itho nîng a ti. Tutu itam takka an ipêkhei ziangah itamkah iphût nîng a ta, itam takka an înkolhei ziangah itamkah isabei nîng a ti.

⁴⁹“Rammuala ihâltlût ranga zuang ki nit, atûn khom kâng zel ta seh ki ti vang na!

⁵⁰Baptisma chang rang ki nei, amakhah a kîm ki sua mâkah chu ki ning ar-îp vang chu!

⁵¹Rammualah hin ringei inlêng ranga zuang manih nin ne iti mani? Ringeina inlêng rang ni mak, inṭhendarna inlêng ranga zuang kêng kî nit.

⁵²Atûna rithokin insungkua khatka om mi ringakah inṭhen an ta, ithumkahei khan inikahei khah doi an ta, inikahein ithumkahei khah doi an ti.

⁵³Pahein an naipahei doi an ta, naipahein an pahei doi an ti; nuhein an nainuhei doi an ta, nainuhein an nuhei doi an ti; tarpihein an imoihei doi an ta, imoihein an tarpihei doi an ti,” a ti a.

⁵⁴Jisuan mipuihei ziang khomah khan, “Tlâk tiang sûm a hong zîngin chu ‘rua sûr rang kêng’ nin ti a, isûr khom a sûr ngêt ngai.

⁵⁵Khante, sim ithli a hong râng nin riatin chu ‘â lum rang kêng’ nin ti a, ilum khom a lum ngêt ngai.

⁵⁶Nangni vârrilethei o, rinêng neh rivân nin en a, kho om rangzia nin riatthiam thei a; khannisela, ithôm atûnlâi zoro omzia nin riatthiam thei no?

⁵⁷“Â dik neh â dik ino khah ithôm nangmani khâtin nin ithlei thei no?

⁵⁸Mîn roirêlmunah nang a hêkin chu roirêlmun nin tlung maah khan kha mi khah ringeina siampui roh. Khanonchu, roirêltu makungah nang kâi a ta, roirêltu khan manmihei kutah nang pêng a ta, tâng inah nang khum an ti.

⁵⁹Nangni ke ril, nang an richôna poisa [13] khatkah te khom ni pêk riai mâkah chu nang isua tlak no nih,” a ti a.