Read Biete LUKA 13 Bible Online

LUKA 13 - Biete bible

LUKA 13

¹Kha lâiah khan mi ṭhenkahei an hong a, Galili rama mi, Pathian ziangah ribôlna an lan lâia Pilatan ai that thurchi khah Jisua an hong iril a.

²Jisuan a sâm a, “Galili rama mihei kha, khangkana ithata an iom khah Galili rama mi danghei nêkan an isual ual bîk sika nin isôn mani?

³Ni tlak mak e; nangni ke ril, nangni khom nin sual nin rilet non chu annihei angkan thîng nin ti.

⁴A nitin teh, Siloam inrisâng ichimin ai del that mi sômleiiriatkahei khom khah Jerusalema om murdihei nêkan an isual ual bîk sika nin isôn mani?

⁵Ni tlak mak e; nangni ke ril, nangni khom nin sual nin rilet non chu annihei angkan thîng nin ti,” a ti a.

⁶Khante, Jisuan hi ṭongrikhek hih â sîr a, “Mi khatkan a grep rikulah theipui kung a phun a. Â râ a zu zong a; khanniseh, khatka lua mu mak a.

⁷Khanchu, rikul ienkoltu ziangah, ‘En roh, kum ithumkah sar hi theipui irâ hih ki zong tâk a; khanniseh, khatka lua mu ngai mang e. Rikit roh, ithôm mun ai lua mai rang,’ a ti a.

⁸Khante, rikul enkoltu khan, ‘Epu, kumkah mâng mâng la om hi riseh, a vêl pumkan rinêng hi tuk ki ta, irînnikna vur ki ti.

⁹Nakumah â râ duaiin chu â ṭha tak nîng a ta, â râ no duaiin chu rikit zel roh,’ a ti a,” itin a sâm a.

¹⁰Sabatnî voikah chu inkhôm inah Jisuan mi ân risei a.

¹¹Nupang khatkah, kum sômlei kum iriatkah ramrilin a mana a înnat tâk a lei om a. Koninṭhok a, iding zat thei ino a nit.

¹²Khante, Jisuan ani khah a mun chu a koi a, “Nupangnu, ni natna ata ni zôk tâk,” a ti pêk a.

¹³A chungah a kut arngat a, voikan â ding tlûnzat thei a, Pathian ân pâk tâk a.

¹⁴Khante, Jisuan sabatnin mi ân dam sikah khan inkhôm in ulianpu khah a ning a thik a, mipuihei ziangah, “Sûn rukkah sin ei thona rang a om, kha sungah khan hong unla, hong dam ta rei ba, sabatnin chu ni no riseh,” a ti a.

¹⁵Pumapa khan a sâm a, “Nangni vârrilethei o, nin serâtchal manih, sakuartung manih, sabatnin nin khumna in ata a rui isûtin tui in-in ranga ṭhui suak ngai ino tûm â om chei u?

¹⁶Hi nupang khom hih Abrahama nainu a nit a; Soitanan kum sômlei kum iriatkah ai khuap tâk hih, sabatnî khomin inzôk rang ni mak im a?” a ti a.

¹⁷Kha thu khah â sîrin chu â râlhei khah mâimôk an rimu a, mipui lakin a sinrikhêl sin sikah khan an lôm a.

¹⁸Jisua khan, “Pathian Ram chu im ai nit? Inêm ken rikhek rang tâk?

¹⁹Anṭam chi rimalkah mîn a lâk a, a loia a irthe angkah hi a nit; a hong ṭoi a, thingkung a hong chang a, â ṭangheiah khan ivahein ribu an isiam ngai angkah hi a nit,” a ti a.

²⁰Jisuan â sîr nôk a, “Pathian Ram chu inêm ken rikhek nôk rang tâk?

²¹Nupangin chol a lâk a, baiphit her sômilikah kha a rêngka a thoi khai mâkah khamlua a inripol angkah hi a nit,” a ti a.

²²Jisua khan mi inrisei thiai mai pumin Jerusalem a pan a, khua lian neh khua chînhei â thlo thiai a.

²³Mi tûnin manih, “Puma, mi iroichekah bang im inzôka om rang?” itin ardon a.

²⁴Jisuan a sâm a, “Inkot richêpa lût rangin zâl tak song rei; nangni ke ril, mi itam takkan ilût tum an ta chu lût thei no nih.

²⁵A inchongpu a thoi a, inkhâr â kal nungin chu tuala dingin inkhâr ikik nin ta, ‘Epu, inkhâr ne ong roh,’ tîng nin ta; ani lakin, ‘Taktianga mîm nin init nangni reh mang e,’ nangni lei tîng a ti.

²⁶Khanungchu, nangmanin, ‘Munkan ei fâk a, ei in a, kin khuahei khomah nen risei ngai kha,’ la tîng nin ta;

²⁷nikhomseh, ani khan, ‘Taktianga mîm nin init nangni reh mang e; nangni mi pualoihei, ki ziang ata ro riai rei,’ nangni la tîng a ti.

²⁸Nangmani putiang ipai suak nîng nin ta, Abrahama hei, Isaka hei, Jakoba hei neh zânthlahei murdi khah Pathian Rama omin mûng nin ta, khatikah khan chu ṭap nin ta, nin ha inritông nin ti.

²⁹Khante, sak neh thlang, sim neh mâr ata mihei hong an ta, Pathian Ram ruaiṭhe chu hong rikhîl an ti.

³⁰Khante, atûna nungita takhei khom masatak la nîng an ta, masatakhei khom nungita tak la nîng an ti,” a ti a.

³¹Kha lâi takah khan, Farisai ṭhenkah an hong a, Jisua ziangah, “Suak inla, hintak ata mun dangah ro ta roh, Herodan nang ithat rang ai tum a nit,” an ti a.

³²Jisuan, “Fe unla, kha sihal khah va ril rei, ‘Vuani neh naktûk ramrilihei ûmisuang ki ta, daminohei indam ki ta, a sûn thumnin ki sin zoi ki ti, a ti,’ itin.

³³Ikhom ni sela, vuani neh atûkah neh atûk nôk idênin kî sin [14] mai rang a nit; Jerusalem putiang zânthla ithat rang dân ni mak e.

³⁴O, Jerusalem, Jerusalem, zânthlahei ithattu, ni zianga Pathianin a hong itirhei lunga lei idêngthattu, ârpuinûn a tehei arthla nuaia ai op bûm ngai angkan ni mihei voi izâkkah iop bûm ki tum a; khan laka nuam mak chei a.

³⁵Khasikah khan nin in [15] chu inram a nit tâk. Nang ke ril, ‘Pumapa riminga zuang chu inpâkin om riseh,’ nin ti mâkah chu ne mu nôk khâi no tin u,” a ti a.