Read Biete LUKA 15 Bible Online

LUKA 15 - Biete bible

LUKA 15

¹Sûnkah chu siadôltuhei neh mi sual itam takkah a thu sîr ringai rangin Jisua ziangah an hong a.

²Farisaihei neh Dân inriseituhein, “Hi mi hih mi sualhei a lôm a, munkan fâk khom a zongpui ngai,” itin an riphun a.

³Khante, Jisuan an ziangah hi ṭongrikhek hih â sîr a.

⁴“Nangni lâiah khatka khôk hin bera rizakah nei unla, an lâia khatkah rimang sela, phûlah sômikuakkah kuakkahei khah imarakin, armang khah a mu nôk mâkah zong no nîm a?

⁵A mu nôkin chu ilôm takkan a dârah hong riput a ta,

⁶in a hong tlungpuiin chu a rualhei neh a bungahei koibûm a ta, ‘Ki bera rimang khah ki mu nôk tâk a; tho, ne lômpui rei,’ tîng a ti.

⁷Nangni ke ril, khangkah takah khan mi fel sômikuakkah kuakkah rilet nang khâi inohei nêkan chu mi sual khatka rilet chungah khan rivân mihei lômna a irsâng ual rang a nit.

⁸“Khante, nupang khatkan duli [16] sômkah nei sela, khatkah inrimang sela, meiser ichokin a in phît a ta, a mu nôk mâkah takritâi takkan ai zong rang ni mak im a?

⁹A mu nôk tenan chu a chamhei neh a bungahei koibûm a ta, an ziangah, ‘Ki sum rimang kha ki mu nôk tak a; tho, ne lômpui rei,’ tîng a ti.

¹⁰Nangni ke ril, khangkah takah khan mi sual khatka rilet chungah khan Pathian vântirtônhei an ilôm ngai a nit,” a ti a.

¹¹Jisuan a la sîr mai a, “Mi khatkah hin naipa inikah a nei a;

¹²a naipang ual khan a pa ziangah, ‘Epa, richon ki dongtum rang chu atûn ne peh ta roh,’ a ti a. Khanchu, an pa khan archon khah a naihei ziangah a sem pêk tâk a.

¹³Sûn itôiteka nungah chu a nai naipang ual khan a dongtum murdi khah a lâk riai a; ram ilah takah a fe tâk a, amakhan nuam ninga lêngin a sum â hek tâk a.

¹⁴Khante, a sum â hek zoi riai tenan chu kha ramah khan ṭâmpui a tlâk a, îte ifah rang nei khâi mak a.

¹⁵Khanchu, kha rama om mi khatkah a var bêl tâk a, ani khan vokhei ienkol rangin a loiah a tir a.

¹⁶Khante, vokbuhei khah ifah rangin arzuk tak tak a, tute lakin îte ifah rang peh mak a.

¹⁷“Khante, arriat suak kaneh chu, ‘Ki pa inah rilo mihei bu ne zoi loi rakka nei an tamtlia kaneh kei lakate hin voniṭâmin kî thi rang na!

¹⁸Thoi ki ta, ki pa ziangah fêng ki ta, a ziangah, Epa, Pathian chungah neh ni chungah ki îsual tâk a nit.

¹⁹Ni naia be rang khomin ritluk khâi mang, ni zianga rilo mi khatka angkan ne mang ta roh,’ tîng ki ti, a ti a.

²⁰“Khanchu, a thoi a, a pa ziangah a fe tâk a. Ilah taka a la om lâiin a pa khan a hei mu a, â lung a kham tak tak a, â tlân a, â kol a, â riam a.

²¹Khante, a naipa khan, ‘Epa, Pathian chungah neh ni chungah ki îsual tâk a nit, ni naia be rangin ritluk khâi mang e,’ a ti a.

²²Khannisela, a pa khan â somhei ziangah, ‘Rimot takkan zakua ṭhatak khah hang lah unla, inhâk rei, a kutṭimah kutsabit inbun unla, a keah pheikok inribun rei.

²³Serâtchaltuai vâiinthâi khah hang kâi unla, that rei; ilôm takkan ruai iṭhêng ei ti u.

²⁴Hi ki naipa hih a thi a, a hong iring nôk tâk a nit; armang a, ei imu nôk tâk a nit hih,’ a ti a. Khanchu, lômna ruaiṭhe an phut tâk a.

²⁵“Kha lâi takah khan a nai ulian ualpu chu loiah a om a, in a hong tlung rangin chu belem irî neh lâm rihu khah a riat tâk a.

²⁶Khanchu, isom khatkah a koi a, ‘Ithôm im a omzia tâk?’ itin ardon a.

²⁷Khante, ani khan, ‘Ni unaipa, inah a hong kîr nôk a, â ring â dama a mu nôk sikin ni pa khan lômnan serâtchaltuai vâiinthâi khah a that a, ruai a iṭhe a nit,’ a ti a.

²⁸Khanchu, a ning ân thik a, inah khan lût nuam khâi mak a. A pa kha a va suak a, insunga lût rangin a va thlêm a.

²⁹Khannisela, a pa ziangah khan, ‘Ringai roh, hi ten kum sung hih ni ta rangin suak sinin ki sin a, ni thu khom zôm loiin om ngai mang a; khan, im ni ne pêk ngai a? Ki malhei neh ruaiṭhena rangin kêlte lua khom ne peh ngai mak cheh.

³⁰Khannisela, hi ni naipa, nochizuarhei zianga ner chon ichêk zoitu hi a hong nôkin chu serâtchaltuai vâiinthâi ni lei ithatpui hih,’ a ti a.

³¹Khante, a pa khan a ziangah, ‘Ki naipa, nang chu ki zianga om mai ni nit a, kî nei murdi hih ni ta kêng ai nit.

³²Khannisela, ni unaipa hi chu â thi tâk kha a hong iring nôk tâk a nit, armang tâk kha ei imu nôk tâk a nit hih; khasikin, râiifân takkan ei lôm rang pial a nit,’ a ti pêk a,” a ti a.