Read Biete LUKA 16 Bible Online

LUKA 16 - Biete bible

LUKA 16

¹Jisuan a kôilômhei ziangah, “Mi richong khatkan archon enkoltu isom khatkah a nei a, kha mi khan a pu sum khah â chêk itin a pu ziangah an nô a.

²Khanchu, ani khah a koi a, ‘Ni chungchâng thu kî riat hih im a nitzia? Ni sum irâk riziakna bu khah hin hong chôi roh; atûna rithokin sum irâktun ṭang thei khâi no tin,’ a ti pêk a.

³Kha som khan a lungrilin, ‘Ki pu hin ki sinna a nen mâkin teh, im ki sin rang tâk? Rinêng ituk lak rât mang a, kut ido lak teh ke zak a.

⁴Khanchu, ki sin a nen mâk tika mihein an ina an nen om thei rang tlia ki riat tâk,’ a ti a.

⁵Khanchu, a pu sum ritânghei khah khat khatkan a koi a, a masatak ziangah khan, ‘Ki pu sum izâkâm ni irtâng?’ a ti a.

⁶Ani khan, ‘Oliv riak ûm rizakah,’ a ti a. A ziangah, ‘Hi ner tângna lekha hih lan la, iṭhung inla, sômringakan riziak roh,’ a ti pêk a.

⁷Mi dang ardon nôk a, ‘Nangteh izâkâm ni irtâng?’ a ti a. Ani khan ‘Bu dân sângkah,’ a ti a. Ani khan, ‘Hih ner tângna lekha hi lan la, rizariatkan riziak roh,’ a ti pêk a.

⁸Khasikah khan a pu khan sum irâktu vârrilet thiam tlia khah ân pâk tâk a; ivâr naihei nêkan atûnlâi mihei hih rammual thilah chu an ivâr ual a nit.

⁹“Nangni ke ril, rammual richonin rual siam unla, a boi tikin kumtluang inah ilôm lût ni thei nin ti.

¹⁰Tutu iroicheka chunga iamom chu itamka chungah khom iiam a om ngai; tutu iroicheka chunga iamom ino chu itamka chungah khom iamom ngai mak.

¹¹Rammual richona lua iiam nin om non teh, tûm richon tak vâng khateh nangni inkol ngam ranga?

¹²Mi dang ta chunga lua iiam nin om thei non teh, nangmani ta rang khom khah tûm nangni peh ranga?

¹³“Isom khatkan pu inika sin tho thei no nih. Khatkah a nelin khatkah idîng a ta; anitnole, khatkah kha arngaiinnatin chu khatkah musit a ti. Pathian sin neh sum sin inrikop thei no tin u,” a ti a.

¹⁴Khante, Farisai, sum ringai inluhei khan a ṭong murdi khah an riatin chu Jisua kha an nuiso a.

¹⁵Jisuan an ziangah, “Mi mitmuah mi fel angkan nin ilang a; khannisela, Pathianin nin lungril lak a riat a. Miriamhei ringaia thil ilu hih Pathian mitmun chu chanlamboi a nit.

¹⁶“Mosia Dân neh zânthlahei lekhahei khan Baptistu Johana tenah khah â huap a; khanung ata chu Pathian Ram Thurchi Ṭha isîr a nit a, mi tinin ilût an itum tâk a nit.

¹⁷Khannisela, Dân thu sun inhângte boi nêkan rinêng neh rivân iboi ol ual a ti.

¹⁸“Tutu a nupui a mâk a, mi dang a nei nôkin chu a înrê a nit; mi nupui mâk tâk ineitu khom a înrê a nit.

¹⁹“Richongpa khatkah a om a, puan senduk neh risompuan isilin nîn tin hoiinhâi takka lêngin a om ngai a.

²⁰A inkot bulah khan inriang tak khatkah, arming Lazara, pânsia ituam khap kha an inzâl ngai a.

²¹Richongpa docham ata burmal iṭulhei khah ifah rang arzuk a, uihei lakin â pân khah an hong iliak pêk ngai a.

²²Khante, inriangte khah a thi a, rivân ramah Abrahama ṭângchunga om rangin vântirtônhein an fepui tâk a. Richongpa khom kha a thi a, an phûm a.

²³Mithi khuaah dengthei ituangin a om a; a hang tang a, ilah takah Abrahama chu, â ṭângchunga Lazara om neh, a hang mu a.

²⁴Khante, â khêk a, ‘Epa Abraham, lung nen kham inla, Lazara kha, a kutṭim tuiah ichia sela, ke lei indâi rangin ne zuk tir pêk roh, hi meiah hin kî nat tak tak a nit,’ a ti a.

²⁵“Khanniseh, Abrahama khan ‘Ki naipa, nangman chu ni ring lâiin thil iṭha murdi ni dong a, Lazara khan chu thil ṭhano murdi ai dong khah reh ro ba; atûn chu ani khah ihoi takkan a om a, nang chu ina tuangin nî om tâk a nit.

²⁶Khabanah, tutu â nuam khomin hi tiang ata kha tiang an kâi thei nona rang neh kha tiang ata hi tiang an kâi thei nona rangin ei kârah hin rinêng ichat inthûk tak ai om a nit,’ a ti a.

²⁷“Khanchu, richongpa khan, ‘A nitin teh, Epa Abraham, Lazara khah ki pa insungkuaah nê tir pêk rangin nang ki irphat a nit.

²⁸Urêng ipa ringakah ki nei a, hi dengthei tuangna munah hin an hong nona rangin ne zu ril pêk riseh,’ a ti a.

²⁹Abrahama khan, ‘Ni urênghei iril rang teh Mosia neh zânthlahei an nei im ki ta, khahei thu khah ringai riseh,’ a ti a.

³⁰Richongpa khan, ‘Epa Abraham, kha bang ni mak e, mithi lâi ata thoi nôk ngêi hih an ziangah fe sela an sual rilet an ti,’ a ti a.

³¹Khante, Abrahama khan, ‘Mosia neh zânthlahei thu an ôi non chu mithi lai ata thoi nôkhei thu khom taksôn ual no nih,’ a ti pêk a,” a ti a.