Read Biete LUKA 17 Bible Online

LUKA 17 - Biete bible

LUKA 17

¹Jisuan a kôilômhei ziangah, “Ibânahei hi om ino thei ni mak e; nikhomsela, ibâna in-omtu chung chu ân khôk vang na!

²Hi mi chîntehei lâia khatkah khom inbâ nêkan chu ân bâtu ringah khan bunôilung inlin tuikhanglianah iṭhul sela, a ta rangin ṭha ual a ti.

³“Ridîn rei, ni suapuiin ni chungah sual a sinin chu ril roh, ân sîrin chu izâ roh.

⁴Sûnkatah ni chungah voi sarikah thil thonsualin voi sarikah, ‘ken sîr tâk,’ itin ni tiang a hong ribatin chu ni lei izâ rang a nit,” a ti a.

⁵Tirtônhein Pumapa ziangah, “Puma, kin iamna nen det pêk ual roh,” an ti a.

⁶Pumapa khan, “Anṭam ru tiakah iamna nin neiin chu hi theiârlung kung ziangah hin, ‘Hong riphâi inla, tuikhanglianah rithon roh,’ tîng nin ta nin he ringai zel a ti.

⁷“Khante, nin lâia tukhôk hin manih isom a nei a, rinêng ituka fe manih, bera hôla fe manih, iṭuan a hong tlung kaneh, ‘Hong inla, bu khêng hong ot zel roh,’ tûm a lei iti rang chei ua?

⁸Khanêkan, ‘Ki bu khêng ne do pêk bak inla, puan vong inla, ki nêk zoi mâkah ne ngâk roh, kha rizoiin nang chu ni nêk rang a nit,’ tûm â ti no rang chei u?

⁹Isomin thu a zôm sikin tûm a ziangah lômthu sîr ngai?

¹⁰Khangkah khan nangni khom thupêk murdi nin sin zoi riai nung khomin ‘Isom takritâi ino kin nit, kin sintum pial khah kin isin chak a nit hih,’ nin ti rang a nit,” a ti a.

¹¹Khante, Jisua Jerusalem a pan malamin Samari neh Galili ramrî a ro a.

¹²Khua khatkah a lût rangin iphâr sômkah a tiang an hong a.

¹³Ilah takah an iding a, “Jisua, Minriseitu, lung nen kham roh,” an ti a.

¹⁴Anni kha Jisuan a mun chu an ziangah, “Fe unla, thiampuhei ziangah var en rei,” a ti pêk a. Khangkana an fe lâiah khan lampuiah chu an dam tâk a.

¹⁵An lâia khatkan chu a dam tâk iti a riat kaneh rôl iring takka Pathian inpâk pumin a hong kîr nôk a.

¹⁶Jisua ke bula bokin lômthu â sîr a. Ani khah Samari mi a nit.

¹⁷Jisuan, “Mi sômkah â dam nin nit a, a dang ikuakkahei khah takâm an iom tâk?

¹⁸Ithôm hi nam dang mi bang hih Pathian inpâk ranga a hong ikîr nôk?” a ti a.

¹⁹Khanchu, Jisuan a ziangah, “Thoi inla, fe ta roh, ni iamna hi nî dampui a nit,” a ti pêk a.

²⁰Farisai ṭhenkahein Pathian Ram zuang tlung rang zoro an ridon a. Jisuan, “Pathian Ram chu imuh theiin zuang tlung no nih.

²¹Tutên, ‘En ta u, hin kêng a om,’ manih, ‘Son kêng a om,’ manih ti no nih. Ringai rei, Pathian Ram chu nin lâiah hin ai om a nit,” itin a sâm a.

²²Khante, a kôilômhei ziangah khan, “Miriam Naipa ringlâi sûnhei hih sûnkate lua nin mu nuam nikhua la om a ti; khannisela, mu khâi no tin u.

²³Mîn nin ziangah, ‘En ta u, soteh soh’ manih, ‘En ta u, hiteh hih,’ manih la tîng an ta; nikhomseh, ien rangin fe suak no rei.

²⁴Miriam Naipa zuang nî chu, rivânah khothlâr arlek a, kôlkung ata kôlkung idêna ai vâr ngai angkah hin nîng a ti.

²⁵Khannisela, kha matonah khan atûnlâi mihei hin heng an ta, thil itam takkah a lai tuang bak rang a nit.

²⁶“Nova hun lâia thil omdân angkah khan Miriam Naipa zuang nôk nikhuaah khom la nîng a ti.

²⁷Nova, rikuangah a lût nikhua dênah khan mihei khan an fâkin an in a, nupui pasal an rinei a; tui a hong lian a, an rêngkan a înrimang riai tâk a nit.

²⁸Khangkah ngirin Lota dam lâi khomin mi tin an fâkin an in a, an richôk a, an zuar a, thil an phun a, in an sin a.

²⁹Nikhomsela, Sodom khua ata Lota a suak nin chu rivâna rithokin mei neh kât a sûr a, an rêngkan ai that riai a nit.

³⁰Miriam Naipa zuang nôk nin chu khangkah khan la nîng a ti.

³¹Kha nikhuan chu inchunga omin neinun ilah rangin ṭum no riseh. Khangkah ngirin loia om khomin inah hong kîr no riseh.

³²Lota nupui remai rei.

³³“Tutu a ringna inzôk itum kan ichân an ta, tutu a ringna chân kan inzôk an ti.

³⁴“Nangni ke ril, kha zânah khan chu zâlmun khatkatah mi inikah zâl an ta, khatkah chu iṭhui nîng a ta, khatkah chu ima nîng a ti.

³⁵Nupang inikan fâng suk an ta, khatkah chu iṭhui nîng a ta, khatkah chu ima nîng a ti.

³⁶Mi inikah loiah om an ta, khatkah chu iṭhui nîng a ta, khatkah chu ima nîng a ti,” a ti a.

³⁷Khante, kôilômhei khan, “Pumapa taktiang im?” an ti a. Jisuan, “Saruak omna kipah vasatelhei khom om an ti,” a ti a.