Read Biete LUKA 18 Bible Online

LUKA 18 - Biete bible

LUKA 18

¹Khante, sabei indong loia an ṭongṭai mai rang a nit iti inriseina rangin hi ṭongrikhek hih Jisuan â sîr a;

²“Khua khatkatah hin roirêltu khatkah, Pathian khom ṭi no, miriam khom ṭi no a om a.

³Kha khua ngirah khan numeinu khatkah a om a, ‘Ker doipui neh kin thubuai ne rêlinfel pêk roh,’ itin a ziangah a fe ṭian ṭian a.

⁴Zoro sôt iankah chu roirêltu khan lan bei mak a, khan, nungah chu a lungrilin, ‘Pathian neh miriam ṭi no khom inlang,

⁵hi numeinu hin chakal a ne sak mai a; khasikin, lei rêlinfel pêk rong, a nitnon chu hingkan hong mai a ta, nungah chu a ne la înrizêl rang kêng,’ a ti,” a ti a.

⁶Khante, Pumapa khan a la sîr mai a, “Roirêltu fel ino thu sîr khah reh rei.

⁷Khasikin, a sûn a zâna ama samtuhei ṭapna khah Pathian khan ngaitua infel pêk no nîm a? Anmani san rangin a irvuak rang mani?

⁸Nangni ke ril, anmani ditsakin rêlinfel pêk zel a ti. Khannisela, Miriam Naipa hin a zuang tikin rammualah iamna zuang mûng a tîm?” a ti a.

⁹Mahnia ki ṭhat riti a, mi dang imusit ngai mihei ziangah hi ṭongrikhek hih â sîr a.

¹⁰“Mi inikah Tempila ṭongṭai rangin an fe a. Khatkah chu Farisai a nit a, khatkah chu siadôltu a nit.

¹¹Farisai khah a khâtin â ding a, a ṭongṭai a, ‘O Pathian, kei chu mi danghei angkana mi lep ngai, iamom ino, inrê mi khom ki nit no sikin lômthu ke sîr a. Hi siadôltu angkan khom ki nit no sikin lômthu ki îsîr a nit.

¹²Hapta tin sûn nikah bu ki ngei ngai a, kî nei murdi sômka khatkah nang ki pêk ngai a,’ a ti a.

¹³Siadôltu kha chu ilah takah â ding a, rivân ilua tang ngam loiin, â ṭâng richûmin, ‘O Pathian, lung nen kham roh, mi sual ki nit,’ a ti a.

¹⁴“Nangni ke ril, a masapu ni loiin hi mi hih Pathian mita thiam ichangin a inah a fe tâk a. Tutu om iliankah tlôm an ta, om itlômkah chu inlutin om an ti,” a ti a.

¹⁵An chungah a kut arngat rangin mi ṭhenkan an naitehei Jisua ziangah an hongpui a. Amakhah kôilômhein an lei mun chu an lei ngo a.

¹⁶Khannisela, Jisuan naipangtehei khah a ziangah a koi a, an ziangah, “Naipangtehei ki ziangah hong riseh, khap no rei; Pathian ram chu hingkana mihei ta kêng ai nit.

¹⁷Thudik nangni ke ril, tutu naipangten Pathian ram ai lôm angkana lôm inon chu a sungah lût tlak no nih,” a ti a.

¹⁸Juda ruaitu khatkan Jisua ziangah, “Minriseitu ṭha, kumtluang ringna ki nei theina rangin im ki tho rang?” a ti a.

¹⁹Jisuan a ziangah, “Ithôm iṭha ni ne iti? Pathian banah chu tute â ṭha omak e,

²⁰Thupêkhei khateh ni riat im ki ta, inrê no roh, mi that no roh, iruh no roh, milakin mi nô no roh, ni nu neh ni pa ngîk roh, itihei hih,” a ti a.

²¹Ani khan, “Kha thupêkhei murdi khah chu ki naipangte ata kî zôm tâk ngai a nit,” a ti a.

²²Khante, Jisuan amakhah a riatin chu a ziangah, “Lam khatkah ni lar sam; nî nei murdi zuar inla, a sum khah inrianghei sem pêk roh; khanchu, rivânah richon nei ni ti. Khanungchu, hong inla, ne zui roh,” a ti pêk a.

²³Kha thu khah ani khan a riatin chu arngai a siat ok a, miriam richong tak a nit sikin.

²⁴Khante, Jisuan arngai a siat ok iti a mun chu, “Richonghei ta rangin Pathian Rama lût ân tak rang vang na!

²⁵Pathian rama miriam richong ilût nêkan iṭhim ikuara saringsei ilût ol ual a ti,” a ti a.

²⁶A thu sîr lei ringaituhei khan, “Khangkan a nit inteh, tûm inzôk inih thei ranga?” itin an ridon a.

²⁷Jisuan a sâm a, “Miriam ranga thei ino hih Pathian rangah chu ithei a nit,” a ti a.

²⁸Khanungchu, Petera khan, “En ta, kin in neh loi imarakin nang kin zui a,” a ti a.

²⁹Jisuan “Thudik nangni ke ril, tutu Pathian Ram sika in manih, nupui manih, urênghei manih, nu neh pa manih, naihei manih imarak kangân chu atûna ring lâi ngêiah hin

³⁰a nêka tam ual mu ngêt an ta, zoro la hong ranga kumkho ringna khom mûng an ti,” a ti a.

³¹Khante, Kôilôm Sômleiinikahei khah Jisuan a ranin a ṭhui a, an ziangah, “Ringai ta u, Jerusalemah ei ife rang a nit; amakhan, Miriam Naipa chungchâng thu zânthlahei lei irziak khah tlung rikip a ti.

³²Jentailhei kutah lan an ta; anni khan êro an ta, mualinphoi takkan musit an ta, ichil an ti.

³³Itông an ta, that an ti; nikhomseh, sûn thumka nungah thoinôk a ti,” a ti a.

³⁴Khannisela, Kôilômhei khan kha thu khah arngai tlia reh mak a; kha thu omziahei khah an ta rangin chu thu rithup a nit sikin Jisua thu sîr khah an iriat thei ino a nit.

³⁵Khante, Jisua kha Jeriko khua a hong tlung rangin chu mitdel khatkah hi lam kôlah a lei iṭhung a, kut a lei do a.

³⁶Mipui rihu a riatin chu, “Im ai nit tâk?” iti ardon a.

³⁷“Nazaret Jisua a hong ithleng a nit,” an ti pêk a.

³⁸Khan zel â khêk a, “Jisua, Davida Naipa, lung nen kham roh,” a ti a.

³⁹Mipui matianga fehei khan an ngo a, idâirek rangin an ti khomin matona nêka ring ualin â khêk a, “Davida Naipa, lung nen kham roh,” a ti a.

⁴⁰Khante, Jisua khah a ngîr a, a zianga hong iṭhui rangin â ril a. A kôlah an hong ṭhuiin chu a ziangah,

⁴¹“Im nang sin pêk inlang nî nuam?” itin ardon a. Ani khan, “Puma, imuh thei ki nuam,” a ti a.

⁴²Khanchu, Jisuan, “A nitin chu mu thei ta roh, ni iamna hi nî dampui a nit,” a ti a.

⁴³Khanchu, voikazelin a mu thei tâk a. Pathian inpâk pumin Jisua a zui sa tâk a. Mi murdîn amakhah an mun chu Pathian an inpâk tâk a.