Read Biete LUKA 19 Bible Online

LUKA 19 - Biete bible

LUKA 19

¹Khante, Jisuan sûn pâlin Jeriko khua a lût a.

²Amakhan mi khatkah, arming Zakaia a om a; ani khah siadôltuhei ruaitu a nit a, miriam richong tâk a nit.

³Jisua khah ingkana mi manih[17] iti imuh rang a tum a; nikhomseh, miriam dung itôi a nit a, mipui tam rai sikah khan mu thei mak a.

⁴Khanchu, mipui maton tiang â tlân a, Jisua mu rangin theichâng kungah a lui a, kha lampui khah Jisuan a hong irô rang a nit a.

⁵Kha mun khah Jisuan a hong tlungin chu a hang tang a, a ziangah, “Zakai zuang ṭum vak vak roh, vuanah hin ni inah kî tlung rang a nit,” a ti a.

⁶Khante, rimot takkan a zuang ṭum a, ilôm takkan a inah â thlun tâk a.

⁷Mipui kha thil imuhei murdi khan, “Mi sual ina tlung rangin a fe tâk rêk soh,” an ti a, an chiar a.

⁸Khante, Zakaia khah â ding a, Pumapa ziangah khan, “Ringai ta, Pumapa, ki neinun arzâtkah inrianghei pêng ki ta; khante, tu thil khom dik ino takka ki lei ilâk pêk a omin chu a bâk ilikan tuak nôk ki ti,” a ti a.

⁹Jisuan a ziangah, “Vuanah hin hi inah hin saninringna a tlung tâk, hi mi khom hih Abrahama richi a nit a.

¹⁰Miriam Naipa hih armanghei izonga saninring rang piala zuang a nit,” a ti a.

¹¹Khante, a thu sîr an ringai mai lâiah khan Jerusalem khom a nai tâk sik neh Pathian Ram zuang ilang zel ranga an tûng sikin ṭongrikhek â sîr tâk a.

¹²Hi thu hih â sîr a, “Mi lian khatkah, a rêng changna rang chungchângah ram ilah takah ife a tum a. Ani khah hong ikîr nôk rang a nit a.

¹³A fe rangton chu â somhei sômkah a koi a, rângkachak tangka khatkah [18] a pêk seng a, an ziangah, ‘Ki thang sungin lei inrivai rei,’ a ti a.

¹⁴Khante, a ram mihei khan an nel a, ‘Hi mi hih kin rêng rangin nuam mang ung e,’ iti rangin â nungah palâi an inrizûl thal a.

¹⁵“Khante, rêng an inchang zoiin chu a hong kîr nôk a, rângkachak tangka ai pêk â somhei khah an lei inpung zâk ridon rangin a koibûm a.

¹⁶Amasatak kha a hong a, ‘Epu, ni ne ipêk rângkachak tangka khah sômkan ken pung,’ a ti a.

¹⁷A ziangah, ‘Ni thôn ṭhat, isom iṭha ni nit, thil iroicheka chungah iiam ni om sikin kho sômka chungah ulian nang inchang ki ti,’ a ti pêk a.

¹⁸Isom â nikna khom khan, ‘Epu, ni ne ipêk rângkachak tangka khah ringakan ken pung,’ a ti a.

¹⁹Khante, kha ziang khomah khan, ‘Nang khom khua ringaka chungah ulianin om roh,’ a ti pêk a.

²⁰“Khante, a dang khom a hong a, ‘Epu, en ta, ni ne ipêk rângkachak tangka kha, mâihuai puanin ke fûn a, kî rê ṭian a nit.

²¹Mi khir tak ni nit sikin nang kî ṭi a nit. Nî sia no khom ni lâk ngai a, nî tu no khom ni ât ngai a,’ a ti a.

²²“Ani khan isom ziangah, ‘Isom pualoi, ni ṭong nâk nâkin thiamno nang a închang a nit. Mi khir tak ki nit a, kî sia no khom ki lâk ngai a, kî tu no khom ki ât ngai nî riat na?

²³Khangkah a nitin teh, ithôm ki sum hih a pungna ngai inah khan ni lei sia no? Khanoseh, ki hong nôkah hin â pung neh ki hong imu rang pial kêng ai nit,’ a ti a.

²⁴Khante, a kôla dinghei ziangah khan, ‘A rângkachak tangka khah lah pêk unla, rângkachak tangka sômka neitu khah peh rei,’ a ti a.

²⁵Khante, anni khan a ziangah, ‘Epu, ani khan chu rângkachak tangka sômkah a nei khate,’ an ti a.

²⁶Ani khan an ziangah, ‘Nangni ke ril, tutu â nei kangân chu ipe intam ual nîng a ta, â nei ino chu a neisunte khom ilah pêk rip nîng a ti.

²⁷Khante, hi ke râl, an rêng ranga ne nuam inohei hi, hong ṭhui unla, ki makungah that rei,’ a ti a,” a ti a.

²⁸Kha thu khah â sîr zoiin chu Jerusalem ipanin ma â sâk a,

²⁹Oliv tlânga om Bethfage neh Bethani kho kôl a tlungin chu kôilôm inikah a tir a.

³⁰“Ei matona khuaah son fe unla, khua nin va lûtin sakuartung tete rithlung, tute la chuangna ngai no mûng nin ta; sût unla, hin hong kâi rei.

³¹Mihein, ‘Ithôm nin isût tâk?’ itin nangni an ridonin chu, ‘Pumapan [19] ai nang a nit,’ ti rei,” a ti a.

³²Khanchu, a mi tirhei khah an fe a, Jisuan an zianga a ti lam angkah takin tinrêng an va mu a.

³³Sakuartung tete khah an sûtin chu â neituhei khan, “Ithôm nin isût?” an ti a.

³⁴Khante, anni khan, “Pumapan ai nang a nit,” an ti a.

³⁵Jisua ziangah an hong kâi a, sakuartung chungah khan an puanhei an dâp a, a chungah Jisua kha an inchuang tâk a.

³⁶A fena lampuiah khan an puanhei an dâp thiai a.

³⁷Khante, Jerusalem tlung ranga Oliv tlâng rilet rangin chu a kôilômhei murdi khan sinrikhêl an imu murdi sikah khan an lôm a, rôl iring takkan an ikhêk a, Pathian an inpâk a.

³⁸“Pumapa riminga hong Rêng chu inpâkin om riseh; rivânah ringei lêng sela, Chungnungtak Pathian chu roinpuin om riseh,” an ti a.

³⁹Khanungchu, mipui lâia Farisai ṭhenkan chu Jisua ziangah, “Minriseitu, ni kôilômhei hi idâirek rangin iril roh,” an ti a.

⁴⁰Jisuan anni khah a sâm a, “Nangni ke ril, hihei hih an dâirekin chu hi lunghei tena lua hih an îkhêk rang a nit,” a ti a.

⁴¹Khante, khopui a hong nâi teng tâk a, khopui a hang mun chu, a ṭâ a.

⁴²“Thlangamna thu hi vuani tena luah hin nî riat ni ta sela chu o! Khan laka teh mu thei khâi mak che a.

⁴³Zoro hong tlung a ti, ne râlhein ni kulpui bulah ipil inpôngin nang hual khap an ta, kil tina rithokin nang doi an ti.

⁴⁴Ni sunga ni mihei neh nang inrimang chit an ta; ni sungah lung richuan rêng rêng zua no nih; nang inring ranga Pathian zuang lâi ni riat no sikin khahei khah ni chungah ai tlung rang a nit,” a ti a.

⁴⁵Khante, Jisua kha Tempilah a va lût a, neinun izuarhei khah a ûmisua a.

⁴⁶An ziangah, “‘Ki in chu ṭongṭaina in tîng an ti’ iti riziak a nit a, nangmani rêkin chu inru pûkin kêng nin isiam tâk hi,” a ti a.

⁴⁷Jisuan nîn tin Tempilah ân risei ngai a. Thiampu lalhei, Dân inriseituhei neh vântlâng ruaituhei khan amah ithat rang an tum a.

⁴⁸Nikhomsela, mipuihein a thu ringai an chim thei no sikin an tho rang dân an iriat thei ino a nit.