Read Biete LUKA 2 Bible Online

LUKA 2 - Biete bible

LUKA 2

¹Kha lâiah khan, Kaisara Augusta khan Rom.ram op murdia mihei riming riziak riai rangin thu a pêk a.

²Hi riteppui masatak hih Suria ram optu Kurinia a chang lâia a nit.

³Khanchu, mi murdi mahni khua chitah riming riziak rangin an fe tâk a.

⁴Josefa khom, Davida insungkua neh archia mi a nit sikin, Galili ram Nazaret khua rithokah khan, a nupui hual Mari thlîngino rilâ ngitkan riming riziak rangin Judai ram, Davida khua Bethlehem an iti-ah khan an fe tâk a.

⁵

⁶Khante, Bethlehemah an om lâiin nai nei zoron a de tâk a.

⁷Nai lutîr ipa a nei a, puanzêlin a tuam a, khualbûkah an keng khâi no sikin sakhêngah ân zâl a.

⁸Kha ramah khan berapuhein phûlah an bera an ngâk a, zânah an riak a.

⁹Pumapa vântirtôn an ziangah a zuang inlâr a, Pumapa roinpuina vâr khan a zuang el a, rilônthingin an ṭi tak tak a.

¹⁰Vântirtôn khan an ziangah, “Ṭi no unla, ringai rei, Thurchi Ṭha lômiom tak nin ta rang neh mi tin ta rang ki zuang îthlun a nit.

¹¹Vuanah hin Davida khuaah Minringpu, Pumapa Krista a suak tâk.

¹²Nin risin sia theina rang chu, naisen, puanzêla tuam, sakhênga zâl mûng nin ti,” a ti a.

¹³Voikarengin, vântirtôn kôlah khan, rivân mi lômpuihei an zuang om a, Pathian an inpâk a:

¹⁴“Rivân inchung takah khin Pathian chu roinpui takkan om sela, Rinênga ai lôm tak tak miriamhei lâiah ringei lêng riseh,” an ti a.

¹⁵Khante, vântirtônhei kha rivânah an kîr a, an mâk kaneh chu berapuhei khan, “Tho, Pumapan a ne iril thil zuang itlung ien rangin Bethlehemah fêng ei ti u,” an ti a.

¹⁶Khanchu, an fe vak vak a, Mari neh Josefa neh sakhênga zâl naite khah an va mu a.

¹⁷Berapuhei khan an va mun chu naite chungchâng vântirtôn îsîr khah an iril a.

¹⁸Â ria murdi khan berapuhei thu sîr khah arkhêl an ti tak tak a.

¹⁹Mari khan kha thuhei khah lungrila ngaituan a vong mai a.

²⁰Vântirtônin â ril lam angkah takin thil tinrêng an va mu a, an riat sikin berapuhei kha Pathian chôiinrisâng neh inpâk pumin an kîr nôk tâk a.

²¹Khante, a sertan rang nî sûn iriat a hong tlukin chu, sungah ân zir ma renga vântirtôn isak sai, arming Jisua an sak tâk a.

²²Mosia Dân angkan rithârna nî a hong tlukin chu Josefa neh Mari khan naite khah Pumapa zianga lan rangin Jerusalemah an hongpui a.

²³Pumapa Dân thu-ah, “Nai lutîr ipa kangân chu Pumapa ta rang a nit,” iti a nit a.

²⁴Khante, Pumapa Dân angkan vaṭhu bopka manih, pharvali bopka manih, ribôlnan an lan sa rang a nit.

²⁵Kha zoroah khan Jerusalemah mi khatkah, arming Simeona a om a. Kha mi khah mi ṭha, Pathian ingaisak mi tak a nit a, Israelhei inzôktu rang khah a ngâk mai a; a chungah Rithla Rithiang a om a.

²⁶Pumapa înkung Mesia a mu mâkah chu thi no nih itia Rithla Rithiangin a lei îril pial tâk a nit.

²⁷Rithla îruaiin Simeona kha Tempilah khan a fe a. Dân angkana a chunga sin rangin a nu neh a pan naite Jisua kha Tempilah an hongpui a.

²⁸Simeona khan naite khah a lei ipom a, Pathian ziangah lômthu â sîr a:

²⁹“O Pumapa, atûn chu ni ṭonginkung angkan, Ne som hih rithla ringamin ni înfe rang tâk a nit.

³⁰Ni saninringna mi tin mu ranga nî siam kha,

³¹Ki mit ngêiin a mu tâk.

³²Jentailhei zianga ni lungdo inlang rang ivâr neh, Ni mi Israelhei roinpuina rang chu,” a ti a.

³³A nu neh a pa khan naite chungchâng thu Simeona îsîr khah an ringai arkhêl tak tak a.

³⁴Khante, Simeona khan anni chu ṭhat a vur a, a nu Mari ziangah, “Ringai roh, hi naite hih Pathian izen, Israel lâia itam takka rimangna rang neh zôkna rang a nit. Pathian risinsiana mi itam takkahei sêl rang nîng a ti.

³⁵Mi ngaitua rithup inlang a ta, nang khom khandai ingaih angkan ngaisiatnan ne lung sun ikhoi a ti,” a ti a.

³⁶Zânthla khatkah, arming Annii, Asera nama mi Fanuela nainu, itar tak hi a om a. Kum sarikah bang pasal a nei a, kum sômiriatkah ilikah numeiin a om tâk a. Ani khan Tempil kha mah tlak loiin buhei a ngei ngai a; a sûn a zânin Pathian chubai iûnin a ṭongṭai ngai a.

³⁷

³⁸Kha lâi takah khan ani khah a hong a, Pathian ziangah lômthu â sîr a, Jerusalem zôkna ranga Pathian lei ingâktuhei murdi ziangah Jisua thurchi â sîr pêk tâk a.

³⁹Pumapa Dân thupêka, an thotum an tho zoiin chu Josefa neh Mari khah Galili ramah, an khua Nazaretah khan an fe nôk tâk a.

⁴⁰Khante, naite khom khah a hong thuar tîr tîr a, a hong rât tîr tîr a, vârnan a sip a, Pathian ṭhatvurna a chungah a om mai a.

⁴¹Jisua nu neh pa khah kum tin Kalkan Kût imang rangin Jerusalemah an fe ngai a.

⁴²Jisua khah kum sômleiinikah a nitin dân ngai angkan Kût imang rangin an hang fepui a.

⁴³Kût a hekin chu an zuang kîr nôk a, khan Jisua khah a nu neh pa riat loiin Jerusalemah a la châm a.

⁴⁴An lômahei lâia fe nîng a ti an tûng a, sûnkah lam an fe nungin, an suapuihei neh an rualhei lâiah an zong a,

⁴⁵khan lak mu mak a, izong mai pumin Jerusalem tiang an kîr nôk tâk a.

⁴⁶A sûn thum nin chu Tempilah, Juda minriseituhei zianga ṭhungin, an he ringai neh ridonin an va mu tâk a.

⁴⁷A ṭong dân iriakan, a vâr tlia neh a sâm thiam tlia khah arkhêl an ti tak tak a.

⁴⁸A nu neh a pa khan an va mun chu arkhêl an ti a, a nu khan a ziangah, “Tôite, ithôm hingkana ni ne itho? Ni pa neh rithlavâi vîkkan nang kin izong mai tâk kêng,” a ti a.

⁴⁹Ani khan, “Ithôm nin ne izong? Ki pa ina om ngêt rang ki nit iti hih nin iriat ino mani?” itin a sâm a.

⁵⁰Khannisela, a sâmna khah arngai tlia reh mak a.

⁵¹Khanchu, an ziangah Nazaretah a fe a, an thu zômin a om a, a nu khan kha thuhei murdi khah a lungrilah a vong mai a.

⁵²Khante, Jisua kha taksa tiang neh vârna tiang a hong thuar tîr tîr a, Pathian lungkhamna neh Miriam ditsakna a dong mai a.