Read Biete LUKA 20 Bible Online

LUKA 20 - Biete bible

LUKA 20

¹Nikhuakah chu Jisuan Tempilah khan mihei ân risei a, Thurchi Ṭha â sîr pêk lâiah khan thiampu lalhei neh Dân inriseituhei khah upahei neh a ziangah an hong a.

²A ziangah, “Tu richamin im hi sinhei hih nî tho? Tûm richam nang ipe ne ril roh,” an ti a.

³Jisuan a sâm a, “Kei khomin ṭong khatkah nangni ridon ki ti.

⁴Johana baptisma khah Pathian richam im miriam richam im, ne ril rei,” a ti a.

⁵An khâtin an risêl a, “Im ei ti rang tâk? ‘Pathian richam,’ ei ti lakin ‘Ithôm nin iam no,’ ne tîng a ta.

⁶‘Miriam richam’ ei ti lakin hi mipuihei hin lungin ne dêng an ta, Johana khah zânthla a nit ngêt itia an îpom a nit a,” an ti a.

⁷Khanchu, “Tu richam im ai nit, reh mang ung e,” itin an sâm a.

⁸Khante, Jisuan an ziangah, “Kei khomin tu richamin im hi sinhei hih kî tho nangni ril ual bîk no ning e,” a ti a.

⁹Jisuan hi ṭongrikhek hih mihei â sîr pêk tâk a, “Mi khatkan grep rikul a siam a, â enkoltuhei ziangah ṭuan rilo rangin a pêk a, ram dangah isôt takka thang rangin a fe tâk a.

¹⁰Khante, grep rimal zoro a hong nitin chu a dongtum ilah rangin a enkoltuhei ziangah a suak khatkah a tir a. Nikhomsela, rikul enkoltuhei khan a suak khah an lei hêm a, kut korongin an infe nôk a.

¹¹Khante, suak dang a tir nôk a, kha khom khah an lei hêm a, mâimôk an sak bit a, kut korong ngirin an infe nôk tâk a.

¹²A ṭum ithumna ai tir nôk vâng kha chu an lei iphop neng a; rikul putiang an pai isua a.

¹³Khanungchu, grep rikul ineitu khan, ‘Ingkam ki tho rang tâk? Ki naipa lungthlung tak hih tir ki ta, ani chu lei marit ngêt an ti,’ a ti a.

¹⁴Khannisela, rikul enkoltuhei khan an lei mu kaneh chu, ‘Hi mi hih a chongpu naipa a nit. That ei ti u; khanchu, archon hi ei ta nîng a ti,’ itin an inrual a.

¹⁵Khanchu, grep rikul ata an kâi isua a, an that tâk a. Khateh, a chongpu khan rikul enkoltuhei khah im lo tâng a ti?

¹⁶Hong a ta, kha mihei khah that a ta, grep rikul khah enkoltu danghei pêng a ti,” a ti a. Kha thu khah an riatin chu, “Khangkah raiin chu an tho rang ni mak khate,” an ti a.

¹⁷Jisuan annihei khah a en a, an ziangah, “‘In isintuhein lung an îdit ino tak khah, Â kila lung kâmiomtak a chang tâk,’ iti riziak hih im a omzia ai nit?

¹⁸“Tutu kha lung chunga bâ kangân chu rinôi an ta, kha lungin ai del vâng chu rinôi indîchit an ti,” a ti a.

¹⁹Dân inriseituhei neh thiampu lalhei khan, kha ṭongrikhek khah anmani demin a îsîr a nit iti an riat sikin kha mun zelah khan Jisua khah iman an tum a; khannisela, mipui lak an ṭi a.

²⁰Khanchu, zoron ṭum an iruang chak tâk a. Rom.Ram-optu neh a thuneinaah an ithlun theina rangin a ṭong insual iman rangin mi ṭhenka hei, mi ṭha angkana om a, Jisua enthlât rangin an tir a.

²¹Kha mihei khan a ziangah, “Minriseitu, ni thu sîr neh ni thu inriseihei hi â dik iti kin riat; tute thleibîk iloiin Pathian lungdo thutak nen risei ngai a.

²²Khate, Rom.rêng Kaisara zianga sia kin ichôi hih ei dân a nit im? Ni mak im? Ne ril roh,” an ti a.

²³Khannisela, an lung inṭong ṭha no khah a riat a.

²⁴An ziangah, “Duli pum khah nen en ta u, tu rilim neh tu riming im â chuang hi?” a ti a. Anni khan, “Rom.rêng Kaisara,” an ti a.

²⁵Khanchu, Jisuan, “Khah a nitin teh, Kaisara ta chu Kaisara peh unla, Pathian ta chu Pathian peh rei,” a ti a.

²⁶Khanchu, vântlâng makunga a thu sîra man an itum khah lo an sam tâk a; a sâmna khah arkhêl an ti a, an dâirek tâk a.

²⁷Khante, Sadukai, thoinôkna omak iti ngaihei lâia ṭhenkah Jisua ziangah an hong a.

²⁸Jisua ziangah, “Minriseitu, Mosian, ‘Tukhom nupui nei seh, nai nei loiin thi sela, a unaipa khan kha numei khah ilua nôkin a ulianpa rang richi a nei pêk rang a nit,’ itin arziak a.

²⁹Khateh, urêng pasal sarikah an om a, a ulian takin nupui a nei a, nai nei loiin a thi a.

³⁰Â nikna khan a lua nôk a,

³¹â thumna khomin a lua nôk a; khaangkan pasal sarikahei khan an lua korong a, nai nei loiin an thi riai a.

³²A nungkhôn takah chu nupangnu khom khah a thi tâk a.

³³Khante, thoinôknaah khan kha nupang khah tu nupui tak im ai nit rang tâk? An urêngkah lakin nupuiin an nei chit a,” itin an ridon a.

³⁴Jisuan a sâm a, “Hi rammuala mihei hih nupui pasal an rinei ngai a;

³⁵khannisela, rammual la hong iom ranga thoinôknaa ṭang inrupa behei kha chu nupui pasal rinei khâi no nih.

³⁶Vântirtônhei angkan om an ta, ithih khom thi thei khâi no nih. Thina ata an thoinôk tâk sikin Pathian naihei ni tâng an ti.

³⁷Mosia khomin ifel riaikan mithi kâiithoi thu khah sûlribuk ikângah khan Pumapa chu, ‘Abrahama Pathian, Isaka Pathian, Jakoba Pathian’ itin â sîr a.

³⁸Ani chu iringhei Pathian a nit a, mi thihei Pathian ni mak. Ama ta rangin chu mi murdi an iring khai a nit,” a ti a.

³⁹Khante, Dan inriseitu ṭhenkahein, “Minriseitu, ni sâm indik,” an lei ti a.

⁴⁰Khanungchu, îte ridon ngam khâi mak a.

⁴¹Jisuan “Mesia hi Davida naipa ingkana an itîm ai nit?

⁴²Davida ngêi khan Lapui bu-ah, “‘Pumapa khan ki Pumapa ziangah, Ke changtiang iṭhung roh;

⁴³Ne râlhei ni ke chuangnan ki siam mâkah chu,’ a ti a.

⁴⁴Davida ngêi khomin ani khah, ‘Pumapa’ a tin teh, ingkan im Mesia khah Davida nai a nit thei rang,” a ti a.

⁴⁵Vântlâng riatin a kôilômhei ziangah khan,

⁴⁶“Dân inriseituhei ata ridîn rei. Anni khan zakorfual ihâka lêng an nuam ngai a, bazâr muna chibai ritu an ringaiinnat a, inkhôm inah ṭhungmun ihoi neh ruaiṭhe bualah mun iṭha an irngen ngai a nit.

⁴⁷Numei sum an fâk a, mi lêmnan isôt tak takka ṭongṭai an song ngai a; khahei khah an kuttum tuang inrik tak tak a ti,” a ti a.