Read Biete LUKA 21 Bible Online

LUKA 21 - Biete bible

LUKA 21

¹Jisuan Tempila tholôm bôma mi richonghei tholôm tlâk lâi kha a thlîr mai a.

²Numei inriangte khatkah hin dâr tangka [20] inikah a hong tlâk lâi khom kha a mu a.

³Khanchu, ani khan, “Thudik nang ke ril, hi numei inriangte hin mi dang dang nêka khan ai tlâk intam ual a nit.

⁴Mi danghei hin chu an inei inliap kêng an hong ipêk; khanniseh, ani hin chu a neisunte a nuk itûkna ai pêk let a nit,” a ti a.

⁵Kôilôm ṭhenkahei khan Tempil lung iṭha tak takhei neh Pathian zianga thilpêk an ilanhei enhoizia khah an isîr lâiin Jisuan an ziangah,

⁶“Hi nin imuhei murdi hih, lung richuan rêng rêng khatka lua inchim iloia a om no nikhua la hong tlung a ti,” a ti a.

⁷Anni khan a ziangah, “Minriseitu, amakhah tikin im ai nit rang? A hong tlung rang tik riatnan risinsiana im â om rang?” itin an ridon a.

⁸Jisuan, “Ilêma nin om nona rangin ridîn rei. Ker ming ichingin, mi itam takkan, ‘Keimah hi Krista chu ki nit,’ ‘A zoro â tlung rang tâk,’ itin hong an ta, kha mihei khah zui no rei.

⁹Khante, ridoi rihu neh risual thu nin riat tikin iṭin nin ilung inzîng no rei, amakhah chu â tlung masa ngêt rang a nit, mongna tak chu la tlung zel no nih,” a ti a.

¹⁰Khante, an ziangah, “Nam dang neh nam dang lar doi an ta, ram dang neh ram dang khom lar doi an ti.

¹¹Mun tinah ninupui inîng a ta, ṭâmpui la thlâng a ta, ripui la lêng a ti; rivâna ata thil inrît neh risinsiana rikhêl tak tak la lang a ti.

¹²Nikhomsela, kha thilhei khah a hong tlung maah khan nangni man an ta, an nuam nangni lo an ta, Inkhôm inah nin thu rêl rangin nangni pêng an ta, lung inah nangni khum an ti. Keima sikin rênghei, roirêltuhei makungah nangni ṭhui an ti.

¹³Amakhah nin ta rangin Thurchi Ṭha rilna zoro ṭha nîng a ti.

¹⁴Sâmna rang lei ingaitua bak nang no nih iti lei reh thlâm rei.

¹⁵Nin ridoipuihein an sût thei no rang dôrkan vârna neh ṭong thiamna keiman nangni pêng ki ti.

¹⁶Nin nu neh pahei, nin urênghei, nin suapuihei neh nin rualhei ilua khomin nangni inman an ta; ṭhenkah vâng chu nangni that an ti.

¹⁷Keima sikin mi tinin nangni la nel an ti.

¹⁸Khannisela, nin samzâi khatka te lua rimang no nih.

¹⁹Nikhomsela, idet takkan iding unla; khanchu, nin ringna inzôk nin ti.

²⁰“Khante, sipai lômin Jerusalem an hual nin mu tikin chu â siat rang a nâi tâk iti reh ta rei.

²¹Khatikin chu Judai rama omhei khah tlângramheiah lâizâm tho riseh; khopui sunga omhei khan khopui ata ro sela, tlângrama omhei kha khopui sungah lût no riseh.

²²Thubu-a riziak a tlung idikna rangin kha nikhuahei kha chu, ‘Phuba lâk nikhuahei,’ nîng a ti.

²³Kha nikhuaheiah khan chu nupang nai ivonghei neh nu, naite pom lâihei chu lungkham an om rang vang na! Hi ramah hin dengthei inrît a zuang itlung rang a nit a, hi mihei chungah hin Pathian ningthikna a zuang itlung rang a nit.

²⁴Ṭhenkah khandaia that nîng an ta, a danghei chu ram tinah suaka ṭhuiin om an ti; khante, Jentailhei zoro a tluk mâkah Jerusalem chu Jentailhei isirden om a ti.

²⁵“Khante, inî heiah, ithla heiah, ârsi heiah khin risinsiana rikhêl tak tak la om a ta, tuikhanglian rifôn neh irî vung vung sikin rinêngah khom nam tin lungzîng rilônthingin om a ti.

²⁶Rivâna rithaneinahei khah innîng om a ta, rinêng pumpuia inkhôk zuang itlung rang an ngaituan, mihei chu rithlavâiin rizal neng an ti.

²⁷Khanungchu, Miriam Naipa hi zuang ilang a ta, sinthotheina neh roinpuina rikhêl tak neh sûm lâiah zuang a ti.

²⁸Khante, kha thilhei khah a zuang tlungin chu iding unla, itangin en rei; nin saninringna khah a zuang inâi tâk a nit,” a ti a.

²⁹Khante, an ziangah hi ṭongrikhek hih Jisuan â sîr a, “Theichâng kung neh thingkung dang dang khom hi en ta u.

³⁰A hong cher rinoi nin mun chu kholum a nâi tâk iti nin riat ngai a.

³¹Khaangkan, nangni khomin khahei murdi zuang tlung nin mu tikin chu Pathian Ram chu a zuang itlung rang tâk a nit iti reh zel rei.

³²“Thudik nangni ke ril, kha thilhei murdi khah a zuang tlung mâkah chu atûnlâi mihei hih thi riai no nih.

³³Rinêng neh rivân boi a ta, ki thu chu boi tlak no nih.

³⁴“Ridîn rei, khanonchu, fâk ikhop rai neh zûnrui neh ringlâi vângsak ngaituanan nin ilung sip rai a ta; kha nikhua khan chânga ôk angkan nangni de thut a ti.

³⁵Khangkah ngirin rinêng mun tina om mi murdi chungah khom zuang tlung a ti.

³⁶Kha inkhôk zuang itlung rang khah ituang zoina rang ritha nin nei thei a, Miriam Naipa makungah nin iding theina rangin tiklâi khomin ridînin ṭongṭai mai rei,” a ti a.

³⁷Jisuan sûnheiah khan Tempilah mi ân risei a, kholoiah chu a suak a, Oliv tlângah iriak rangin a fe ngai a.

³⁸Mi murdi khom a thusîr ringai rangin zîngah Tempilah khan an hong ngai a.