Read Biete LUKA 22 Bible Online

LUKA 22 - Biete bible

LUKA 22

¹Khante, Bairiam Kût, Kalkan Kût an iti ngai khah a hong nâi tâk a.

²Thiampu lalhei neh Dân inriseituhei khan mipui an ṭi sikin inrûkka Jisua an that rang dan an zong tâk a.

³Kôilôm Sômleiinikahei lâia tep Juda Iskariota an iti ngai sungah khan Soitana a lût a.

⁴Khanchu, a va fe a, thiampu lalhei neh ulianhei ziangah Jisua ân man rang tlia a va sîrpui tâk a.

⁵Anni khah an lei lôm ok a, sum ipe an inkung a.

⁶Juda khom khan â ham a, mipui riatno kâra inmanna rang zoron ṭum a zong tâk a.

⁷Khante, Bairiam Kût nikhua, Kalkan Kût berate an that ngai nikhua khah a hong tlung a.

⁸Khanchu, Jisuan Kalkan Kût ruai inrifûk rangin Petera neh Johana khah a tir a.

⁹Khante, anni khan a ziangah, “Takâm inrifûk unlang ni nuam?” an ti a.

¹⁰An ziangah, “Khopui nin lût kaneh, mi bêla tui ichôi tong nin ta, a lûtna inah zui thal rei.

¹¹Khanchu, inchongpu ziangah, ‘Minriseitun, ki kôilômhei neh Kalkan Kût kin fâkna rang chontan khah taktiang im a ti,’ ti rei.

¹²Khanchu, ani khan chuanchung chontan rizat tak, neinun om isa nangni inmûng a ta, amakhan Kalkan Kût ruai chu inrifûk rei,” a ti a.

¹³Khante, an fe a, an zianga a ti lam angkah takin an va mu a, Kalkan Kût ruai chu an inrifûk tâk a.

¹⁴Khante, a fâk zoro a hong nitin chu a Kôilômhei ziangah khalai arkhîl tâk a.

¹⁵An ziangah, “Ki tuang man hi Kalkan Kût ruai hih nangni fapui kî nuam tak tak a nit.

¹⁶Nangni ke ril, Pathian Ramah a tak tak a tlung mâkah chu fah khâi no ning e,” a ti a.

¹⁷Khanungchu, kilât a lâk a, Pathian ziangah lômthu â sîr zoiin, an ziangah, “Amahih lah unla, in rei.

¹⁸Nangni ke ril, atûna rithoka Pathian ram zuang tlung mâkah chu hi uain hih in khâi no ning e,” a ti a.

¹⁹Khanungchu, ibai a lâk a, Pathian ziangah lômthu â sîr zoiin a khoi a, an ziangah a pêk a, “Amahih ki taksa, nin ta ranga pe chu a nit; nin ne riatmaina rangin tho ngai rei,” a ti a.

²⁰Zânbu an fâk zoiin chu khangkah vangin kilât khah a lâk a, “Ama kilât hih Pathian thuthlung thar, ki thisena namindet, nin ta ranga bun suak chu a nit.

²¹“Khannisela, en ta u, nen mantu rang khan hi khalai hih a ne iotpui a nit.

²²Pathian inkung lam angkan Miriam Naipa hih thîng a ti; nikhomseh, ân mantu chung chu a înkhôk a nit,” a ti a.

²³Khanungchu, an lâia tukhôk tak im khangkana tho rang khah ai nit rang tâk itin an ridon risak a.

²⁴Khante, kôilômhei lâiah a tukhôk tak im â roinpui taka be rang iti risêlna a om a.

²⁵Jisuan an ziangah, “Jentail rênghei chu an mihei chungah an inlal tak tak ngai a, richam ineihei lakin chu ‘Mipui rualhei,’ [21] iti riminghei an ribe ngai a.

²⁶Khannisela, nangni chu khangkan ni no tin u, nin lâia â roinpui tak chu â chîn tak angkan om sela, ruaitu tak chu isom angkan om riseh.

²⁷Tûm â roinpui ual, khalai rikhîltu khâm, khalai idôtu khâm? Khalai rikhîltu khah ni no nîm a? Khannisela, kei chu nin lâiah isom angkan kî om a nit.

²⁸“Dengthei intak ki tong kârka ne ompuituhei nin nit.

²⁹Ki Pan ram a ne înkung pêk angkah takin kei khomin ram nangni ki înkung pêk a nit.

³⁰Khanchu, ki ramah khan ki dochamah fâng nin ta, in nin ta, rêngṭhungmuna ṭhungin Israel nam sômleiinikahei chungah roi rêl nin ti.

³¹“Simon, Simon, ringai ta, bu tak neh arsi an îṭhâp ngai angkana nangni fia a, â ṭha neh â sia nangni thlei rangin Soitanan phalna a mu tâk.

³²Khanniseh, ni iamna a boi nona rangin nang ki ṭongṭai pêk. Ki tiang mâi ni ngat nôk tikin ni suapuihei nen det rang a nit,” a ti a.

³³Petera khan a sâm a, “Puma, ni zianga lung ina tâng rang neh ithi rang khomin nang izui mai kî huam a nit,” a ti a.

³⁴Jisuan a ziangah khan, “Peter, nang ke ril, ‘Ani khah reh mang e,’ itia voi thumkah ni ne phial mâkah chu vuanzânah hin âr khuang no nih,” a ti a.

³⁵Khante, Jisuan an ziangah, “Sumkok hei, choli hei, pheikok hei, chôi loia nangni ki tir lâiah khan im nin irsam a om?” itin ardon a. Anni khan, “Ite risam mang ung e,” an ti a.

³⁶Jisuan, “Atûn chu sumkok inei khan chôi sela, choli nei khomin chôi ta riseh; khandai nei ino khomin a zakua zuar sela richoh riseh.

³⁷Nangni ke ril, ‘Ani kha mi sual lâiah itep a nit tâk,’ iti Thubu-a riziak khah ki chunga tlung ngêt rang a nit. Ki chungthu riziaka om khah ai tlung idik rang tâk a nit,” a ti a.

³⁸Kôilômhein a ziangah, “Pumapa, en ta, hin khandai inikah chu a om,” an ti a. Ani khan, “Ân rup tâk,” a ti a.

³⁹Khante, khopui ata khah a suak a, a tho ngai lam angkan Oliv tlângah khan a fe tâk a; a kôilômhei khomin an zui a.

⁴⁰A mun a tlungin chu an ziangah, “Thlêmna nin lût nona rangin ṭongṭai rei,” a ti a.

⁴¹Khanungchu, an ziang ata khah lunga dêng phâk tenah a vân fiar a, arkhûk a dil a, a ṭongṭai a.

⁴²“Epa, ni nuamin chu hi dengtheina kilât hih ki ziang ata khâi roh. Nikhomsela, keima richam ni loiin, nangma richam ni riseh,” a ti a.

⁴³Khanchu, rivân ata vântirtôn a ziangah a zuang inlâr a, râtna a zuang pêk a.

⁴⁴Arthla â vâi tak tak a, ṭhatnemringai nôk ualin a ṭongṭai a; arthlân khah thisen angkan rinêngah a far a.

⁴⁵Khante, a ṭongṭai zoiin chu kôilômhei ziangah a hong a, ngaisiatin â sôi rai sika in thlar khah a hong mu a.

⁴⁶An ziangah, “Ithôm nin iin thlar? Thoi unla, thlêmnah nin lût nona rangin ṭongṭai rei,” a ti a.

⁴⁷Khante, Jisua a la ṭong mai lâiin mipui an hong tlung a, Kôilôm Sômleiinikahei lâia ṭang Juda an iti khan ma a hong iruai a, ifôp itumin Jisua khah a hong pun a.

⁴⁸Nikhomsela, Jisuan a ziangah, “Juda, Miriam Naipa hih ifôpin na inman rang nî ti?” a ti a.

⁴⁹Khante, a zianga kôilôm iomhei khan thil hong itlung rang khah an mun chu a ziangah, “Puma, kin khandai mang kin tîm?” an ti a.

⁵⁰Khante, an lâia khatkah khan Thiampu Laltak isom khah a sât a, â kuar changtianga khah a sât iṭhul pêk a.

⁵¹Nikhomsela, Jisuan, “Ân rup tâk,” a ti a. Kha mi kuar khah a tôn pêk a, ân dam tâk a.

⁵²Khanungchu, thiampu lalhei, Tempil ulianhei, upahei, ama man ranga honghei ziangah khan Jisuan, “Suammi man rang angkan khandai neh tôkmol ichôiin nin hong irthok kêng na?

⁵³Nîn tin Tempilah nin lâiah ki om a, ne man mak chei a; nikhomsela, atûn izîng thuneinan roi a rêl lâi hih nin sin tho zoro chu a nit,” a ti a.

⁵⁴Khante, Jisua khah an man tâk a, Thiampu laltak inah an ṭhui a. Petera khan ilah takka tah a zui a.

⁵⁵In rikul sung tualah khan mei an sêm a, mei iua ṭhung rikhîlhei lâiah khan Petera khom a va ṭhung a.

⁵⁶Mei kôla an iṭhung lâi khah isom nupang khatkah hin a mu a, a en ngit a, “Hi mi khom hih Jisua zianga om ngai khah a nit,” a ti a.

⁵⁷Khanniseh Petera khan, “Nupangnu, ani khah reh ngai mang e,” itin a phial a.

⁵⁸A nakan ualah chu mi dang khatkah hin Petera khah a hong mu a, a ziangah, “Nang khom an lâia mi ni nit hih,” a ti a. Khannisela, Petera khan, “Miriam, kei chu ni tlak mang e,” a ti a.

⁵⁹Khante, dârkâr khatkah vêl nungah khan mi dangin, “Hi mi khom hih Jisua zianga om ngai a nit hite, Galili mi kêng ai nit,” a ti ngit a.

⁶⁰Khannisela, Petera khan a sâm a, “Miriam, nî ti khah kî riat tlak ino a nit,” a ti a. Voikarengin, a la ṭong mai lâi takin âr a khuang tâk a.

⁶¹Khanchu, Pumapa khah arhêl a, Petera khah a en a. Khanchu, Petera khan, Pumapan a zianga, “Vuanzân âr khuang man voi thumkah ne phial ni ti,” ai ti pêk khah a riat suak a.

⁶²Khanchu, Petera khah putiang a suak a, a ṭap ngûi ngûi tâk a.

⁶³Khante, â mantuhei khan Jisua khah nuiza siamnan an mang a, an itôk a.

⁶⁴A mâi an hup pêk a, “Ti roh, tûm nang ihêm ni iam?” itin an ridon a.

⁶⁵Êrona ṭong ṭha no tak tak a chungah an tho a.

⁶⁶Khante, khovâr kaneh chu vântlâng upahei, thiampu lalhei, Dân inriseituhei khah an ribûm a; an roirêlnaah khan Jisua kha an hong ṭhui a,

⁶⁷a ziangah, “Ne ril roh, Mesia ni nit im?” an ti a. Jisuan, “Nangni ril khom inlang iam no tin u.

⁶⁸Ṭong nangni ridon inlang khom ne sâm no tin u.

⁶⁹Nikhomsela, atûn ata chu Miriam Naipa hih Pathian Tinrêngthothei changtiang iṭhung tâng a ti,” a ti a.

⁷⁰An rêngka khan, “Khate, Pathian Naipa nî nit na?” an ti a. Ani khan a sâm a, “A nit nin ne ti tâk khate,” a ti a.

⁷¹Khanchu, “Ite riatpuitu dang nang khai mak e, eimani zelin ai ti ei riat tâk,” an ti a.