Read Biete LUKA 23 Bible Online

LUKA 23 - Biete bible

LUKA 23

¹Khante, arbûmhei murdi khah an rêngkan an thoi a, Jisua kha Pilata ziangah an ṭhui tâk a.

²“Hi mi hin kin chihei a ṭhui insual a, Kaisara zianga sia chôi khom a khap a; khabanah, amah zel khom hih Rêng, Mesia ki nit arti a; khasikin, kin iman a nit,” itin an nô a.

³Pilata khan, “Judahei rêng ni nit im?” itin ardon a. Jisuan “A nit ni ne ti tâk khate,” itin a sâm a.

⁴Khante, Pilata khan thiampu lalhei neh mipuihei ziangah khan, “Hi mi thiamno inchang rangin a siatna îte mu mang e,” a ti a.

⁵Khannisela, anni khan, “Rihel ranga mihei ithorin Judai ram kho tinah mi ân risei ngai a, Galili ramah a phut a, atûn chu hi mun ten a hong itlung tâk a nit,” itin an nô ual ual a.

⁶Khante, Pilatan kha ṭong khah a riatin chu Galili mi a nit neh nitno ardon a.

⁷Heroda biala Galili ram mi a nit iti a riatin chu Heroda ziangah a tir tâk a; Heroda khom khah Jerusalemah a om lâi tak a nit a.

⁸Herodan Jisua a lei mun chu a lôm tak tak a, a thurchi a lei riat tâk ngai sikin Jisua mu rang a nuamna khah a sôt tâk a; Jisua sinrikhêl sin imu khom ai sabei a nit.

⁹Khasikin, thu tam takkah Heroda khan ardon a; nikhomsela, Jisuan sâm viat mak a.

¹⁰Thiampu lalhei neh Dân inriseituhei khom kha matiang an hong nâi a, Jisua khah an nô ual ual a.

¹¹Heroda neh a sipaihei khan Jisua kha an musit tak tak a, nuiza siamnan an mang a, zakorfual iṭha tak an inhâk a, Pilata ziangah a tir ikhîr nôk tâk a.

¹²Pilata neh Heroda kha matonah khan chu rimumâka lei iom ngai an nit a, kha nî-a rithokin chu rual an richan nôk tâk a.

¹³Khante, Pilata khan thiampu lalhei, ruaituhei neh mipuihei a koibûm a,

¹⁴an ziangah “Hi mi hih mihei rihel ranga thorin ni be a, ki ziangah nin hong ṭhui a. Khanniseh, atûnah hin nin makung zelah ki enfia a, nin nô lam angkan chu îte â sualna zel mu mang e.

¹⁵Heroda khomin â sualna mu mak sikin ei ziangah a hong itir nôk tâk a nit hih. Ringai rei, thina rang inrup îte hi mi hin ai thonsual omak e.

¹⁶Khasikin, zêp ki ta, isua nôk ki ti,” a ti a.

¹⁷Kalkan Kût ikipah Pilatan mi tâng khatkah a îsua pêk ngai a nit.

¹⁸Mipui lôm khah an ikhêk a, “Hi mi hih that inla, Baraba khah ne sua pêk roh,” an ti a.

¹⁹Baraba khah khopuia rihelna sik neh mi a that sika lung ina tâng a nit.

²⁰Pilata khan chu Jisua sua khah a nuam a, â thar vangin mipuihei ziangah thu â sîr nôk a.

²¹Khannisela, an ikhêk ual ual a, “Krosah hêmde roh, Krosah hêmde roh,” an ti a.

²²Khante, Pilata khan a voithumnan an ziangah, “Im a thonsual na? Thina rang inrup a thonsualna mu mang e; zêp ki ta, isuang ki ti,” a ti a.

²³Khannisela, rôl iring takka khêkin Jisua kha krosa hêmde rangin an ngên ngit a. Khanchu, an ikhêk khan â nê tâk a.

²⁴Pilata khan an ngên lam angkan thu a thlûk tâk a.

²⁵An nuamlam angkan rihel sik neh mi that sika tâng khah â sua pêk a, Jisua kha chu an nuam an ning ilo rangin an ziangah a pêk tâk a.

²⁶Khanchu, sipaihein Jisua kha an ṭhui tâk a; an fe mai lâiin thingtlâng ata hong mi khatkah arming Simona, Kurini kho mi khah an tong a. An man a, kros khah an inriput a, Jisua nungah an inlôn a.

²⁷Mipui lômin an zui a, an lâia nupang ṭhenkahein chu an ṭâ a, an ṭap ngûi ngûi a.

²⁸Jisua khan an tiang a ngat a, “Jerusalem nupanghei o, ne ṭâ no rei, nangmani neh nin naihei ta rangah khan ṭap rei.

²⁹Nikhua a hong tlung thiai tâk, mihein ‘Nupang ichinghei, nai vong ngai inohei, nai don ngai inohei chu a hoi pêk vang na!’ la tîng an ti.

³⁰Kha tikin chu mihein itlânghei ziangah, ‘Ne del ta roh,’ la tîng an ta; mualhei ziangah, ‘Ne thup roh’ la tîng an ti.

³¹Thing iringa lua hingkah takin an thon teh, â châr vâng khateh ingka takin im an itho rang tâk?” a ti a.

³²Khante, mi dang inikah, mi sual, ama lôma that sa rangin an ṭhui a.

³³Khante, “Luru” an iti mun khah an tlungin chu amakhan Jisua kha Krosah an hêmde a, mi sual inikahei khom kha â changtiang khatkah, â voitiang khatkah an hêmde sa a.

³⁴Jisuan, “Epa, annihei hih izâ roh, an sintho an iriat ino a nit,” a ti a. Khante, a puansilhei khah thlasânin an risem a.

³⁵Khante, mipui khan idingin an thlîr a. Juda ruaituhei khom khan, “Mi dang ilua mana ân zôk ngai a, Pathian izen, Mesia a nit titakin teh, a khâtin rizôk ta riseh ba!” itin an êng a.

³⁶Sipaihei khom khan an nuiso a, a ziangah, an hong a, uain ithûr an pêk a.

³⁷A ziangah, “Judahei Rêng ni nitin teh ni khâtin rizôk ta roh,” an ti a.

³⁸A chungah khan, “Hi mi hih Judahei rêng a nit,” iti riziak [22] an târ a.

³⁹Mi sual khatkah an îkhâi sa khom khan êro ṭongin a ziangah, “Mesia ni mak chêm a? Zôk inla, keini khom nen zôk sa ta roh ba!” a ti a.

⁴⁰Nikhomsela, khatkah khan a ngo a, a ziangah, “Pathian nî ṭi no mani? Amah neh ri-ang bangka deng an ne înthei hi.

⁴¹Eini ruai hi chu ei sintho man ei mu tum pial ei imu a nit hih; khanniseh, ani hin chu îte thonsualna nei mak e,” a ti a.

⁴²Khanchu, Jisua ziangah, “Jisua, ni ram ni tlung tikin ne reh leng leng roh,” a ti a.

⁴³Jisuan a ziangah, “Thu dik nang ke ril, vuanah hin ki ziangah Paradisah om ni ti,” a ti a.

⁴⁴Khante, sûnlâi dâr sômleiinikah vêl ata kholoi dâr ithumka dênin, inî arliap a, rammual a zîng khap tâk a.

⁴⁵Khanchu, Tempil sung puanzâr khah ân lâina takah a thlêr phat a.

⁴⁶Jisua kha iring takkan â khêk a, “Epa, ker thla ni kutah ki bâng e,” a ti a. Amakhah a ti zoiin chu a thi tâk a.

⁴⁷Khante, sipai rizaka ruitu khan thil omzia khah a mun chu Pathian ân pâk a, “Inkhêl loiin hi mi hih mi fel a nit ngêt,” a ti a.

⁴⁸Kha thil itlung enhoi thlîra thlîr ranga mipui ribûmhei khom khan thil omzia khah an mun chu ngaisiata ṭâng richûm pumin an in tiang an fe nôk tâk a.

⁴⁹Jisua mêlriathei murdi neh Galili ram ata amah hong izuitu nupanghei khan chu ilah taka dingin an thlîr a.

⁵⁰Khante, Judai rama Arimathaia kho mi arming Josefa a om a. Ani khah mi fel, mi maritiom, Pathian Ram zuang itlung rang lei ingâk mi a nit a. Ani khah roirêltuhei lâia khatkah ni khom seh, an thu thlûk dân neh an sintho khah a îzoipui ino a nit.

⁵¹

⁵²Kha mi khah Pilata ziangah a fe a, Jisua ruak khah a va ni a.

⁵³Khanungchu, Jisua ruak khah â ṭhum a, risompuanin a tuam a, tute la zâl ngai nona lung ihol ithlânah ân zal tâk a.

⁵⁴Kha nikhua khah Judahei inrinnî a nit a, sabatnî a irphut lôk lôk tâk a nit.

⁵⁵Galili rama rithoka Jisua hong izuitu nupanghei khom khah Josefa lômin an fe a, ithlân neh Jisua ruak an inzâl dân khah an mu a.

⁵⁶Khanungchu, inah an fe a, namhoihei neh siriak namhoihei an siam a. Khanchu, Dân angkan sabatnî khah an ringam tâk a.