Read Biete LUKA 24 Bible Online

LUKA 24 - Biete bible

LUKA 24

¹A sûn sarinî (Pathiannî) zîng kôlrisam kaneh nupanghei khan namhoi an isiamhei khah ichôiin ithlânah an fe a.

²Thlân kotbâia lung khah inlum paiin an va mu a.

³Khante, an lûtin chu Pumapa Jisua ruak rêng rêng mu khâi mak a.

⁴Amakhan lunginzîngin an iding a, voikarengin mi inikah puan ivâr ri-el isilin an kôlah an zuang ngîr a.

⁵Nupanghei khah rilônthingin, nuaiah an ibok rak a, anni khan an ziangah, “Ithôm mi ring teh mithihei lâiah nin izong?

⁶Hin om khâi mak, kâiithoi a nit tâk. Galili ramah a om lâia nin zianga ai ti khah remai rei.

⁷‘Miriam Naipa hih mi sualhei kutah inman nîng a ta, krosah hêmde an ta, a sûn thumnin kâiithoiin om nôk a ti,’ ai ti ngai khah,” an ti a.

⁸Khanungchu, nupanghei khan a thu sîrhei khah an riat suak nôk tâk a.

⁹Ithlân ata an kîr a, Kôilôm Sômleikhatkahei neh mi danghei chu kha thu khah an iril a.

¹⁰Kha thu hong iril nupanghei khah Mari Magdalini, Joani neh Jakoba nu Mari hei an nit. Anni neh nupang dang an zianga omhei khan tirtônhei khah an îril a nit.

¹¹Khannisela, nupanghei îsîr khah thu chanlamboi an ti a, iam mak a.

¹²Petera kha chu a thoi lik a, ithlânah khan a va tlân a; â khûn a, a vêng a, risompuan rizuat banah chu îte dang mu mak a. Thil om dân khah arkhêl tak tak iti pumin in tiang a fe nôk tâk a.

¹³Kha nikhua takah khan Jisua zui ngai mi inikah kha Emmau khuaa fe rangin an suak a. Kha khua khah Jerusalem ata kilomitar sômleikhatkah vêla la a nit.

¹⁴An ruaikah khan thil itlung murdi khah an isîr a.

¹⁵Khangkana an ṭong a, an isîr lâiah khan amah Jisua ngêiin a hong nâi a, munkan a fepui tâk a.

¹⁶Nikhomsela, a mêl an riat thei nona rangin an mit ân vâi pêk a.

¹⁷Jisuan an ziangah, “Lampuia nin îsîr khah î thurchi mani?” a ti a. Khanchu, mâi ingûi riaikan an ngîr a.

¹⁸Khante, arming Kleopa khan a sâm a, “Nangmah bang hih nîng ni ti na, Jerusalem ithlo lâiah atûnlâia thil itlung thurchi ria no chu na?” a ti a.

¹⁹Ani khan, “Î thil im â tlung?” a ti a. Anni khan, “Nazaret Jisua chunga thil itlung kha; Kha mi khah Pathian neh mi murdi mitmu khomah tinrêngah thu-ah neh sinthoah zânthla rithanei tak a nit a.

²⁰Ani khah kin thiampu lalhei neh ruaituhein ithat rangin an pêk a, krosah an hêmde a.

²¹Keini lakin Israelhei ritlantu rangah kha a nit kin tûng a. Khabanah, khangkana thil tlungna khah vuani hih a sûn thumnî a nit tâk.

²²Kin lôma nupang ṭhenkah, zînga ithlâna va fehein lungzîng an ne sak a.

²³A ruak khah mu loiin an hong nôk a, ‘Vântirtônhei inlâr kin mu a, kha mihei khan a ring nôk tâk an ti,’ an hong ti a.

²⁴Khante, kin lôma ṭhenkahei ithlânah an va fe a, nupanghei ti lam angkah chian an va mu a; khanniseh, amah chu an imu ual ino a nit,” an ti a.

²⁵Khante, Jisuan an ziangah, “Intlohei o, zânthlahei thu sîr tin tin iam thei inoa â sêthei o!

²⁶Mesian khahei rêng rêng khah ituangin a roinpuinaah ai lût rang ni mak im a?” a ti a.

²⁷Khanchu, Mosia lekhabu ata phutin zânthlahei lei irziak Thubuheia ama thurchi riziakna murdi khah anmani a rilfia pêk a.

²⁸Khante, an fena rang khua khah an hong nâi tâk a; Jisua kha chu la fe mai rang angkan a om a.

²⁹Nikhomsela, bâiin an itûk a, “Kin ziangah om ta roh, sûn khom ân nung tâk a, inî khom â thla rang tak kêng,” an ti a. Khanchu, an zianga om rangin a fe tâk a.

³⁰Khante, an ziangah khalai rikhîl rangin â ṭhung a, ibai a lâk a, ṭhat a vur a, a khoi a, an ziangah a pêk a.

³¹Khanungchu, an mit a hong vâr a, a mêl an riat infel tâk a; nikhomseh, an mitmu ata armang zel tâk a.

³²Anni khan, “Lampuia a ne ṭongpui lâia Thubu-a thuhei a ne rilfia pêk lâiah khan ei lungril mei ikâng angkan om mang mêm a?” itin an risôn a.

³³Khanchu, voikarengin an thoi a, Jerusalemah an kîr nôk zel tâk a; Kôilôm Sômleikhatkahei neh an rualhei lei ribûm khah an va mu a.

³⁴“Pumapa chu a thoinôk titak; Simona ziangah khom ân lâr tâk,” an lei ti a.

³⁵Khante, inikahei khom khan lampuia thil itlung neh ibai a khoi a, amah Pumapa an riat infel tâk dânhei kha an isîr tâk a.

³⁶Khante, mi inikahei khan kha thu khah an la sîr mai lâiin, voikarengin Pumapa ngêi khah an lâiah a zuang iding a, an ziangah, “Nin chungah thlangamna om riseh,” a ti a.

³⁷Ân rît an ti a, an ṭi tak tak a, rithla an imu an sôn a.

³⁸Khannisela, ani khan an ziangah, “Ithôm khangkah dôra nin iṭi? Ithôm nin lungrilah ringlana nin inei?

³⁹Ki kuthei, ki kehei hih en ta u, keimah ngir khah ki nit hih. Ne tôn unla, en rei; nin ne mu lam angkah hin rithlan taksa neh ru nei ngai mak e,” a ti a.

⁴⁰Khante, khah a ti zoiin chu a kuthei, a kehei ân en a.

⁴¹An lôm rai sikin tak la sôn zel thei mak a, arkhêl an ti tak tak sikin ani khan an ziangah, “Hintaka ifah rang nin nei im?” a ti a.

⁴²Inga suang isa tlinkah an pêk a.

⁴³A lâk a, an mu chungah khan a fâk tâk a.

⁴⁴Khante, an ziangah khan, “Nin ziangah ki om lâiah khan hi thuhei hih nangni ke ril ngai kha, Mosia Dân lekhabuah hei, zânthlahei lekhabuah hei, Inpâkna la bu-ah hei ki thurchi riziak murdi chu a hong itlung idik rang a nit, itin nangni ki lei iril ngai kha,” a ti a.

⁴⁵Khanchu, Thubu-a riziakhei an riat theina rangin an lungrilhei â ong pêk tâk a.

⁴⁶An ziangah, “Hingka hin riziak a nit: Mesia khan a tuang ngêt rang a nit a, sûn thumka nungah mithi lâi ata thoinôk a ti.

⁴⁷Ama rimingin riletna neh sual izâna thurchi Jerusalem ata nam tin ziangah isîr nîng a ti.

⁴⁸Kha thil murdihei riatpuitu nin nit.

⁴⁹Khante, ki Pa înkung khah keimah rengin nin chungah zuk tir ki ti; nikhomsela, chungtianga rithoka sinthotheina nin chungah a ṭum mâkah chu khopuiah nin om mai rang a nit,” a ti a.

⁵⁰Khante, khopui ata Bethani dênin a ṭhui a, amakhan â bân a phar a, ṭhat a vur a.

⁵¹Khangkana ṭhat a vur lâi takah khan anni khah ân ṭhenpui a, ani chu rivânah iṭhuiin a om tâk a.

⁵²Khante, chubai an ûn a, ilôm takkan Jerusalemah an kîr nôk a,

⁵³Tempilah khan Pathian zianga lômthu sîrin an zoro murdi an mang ngai a.