Read Biete LUKA 5 Bible Online

LUKA 5 - Biete bible

LUKA 5

¹Sûnkah chu Jisua Genesaret dîl rikamah â ding a, Pathian thu ringai rangin mipuihein an ineng suai suai a.

²Vakôla rikuang inika om khah a mu a, inga mantuhein an lên risûk kâra an imâk a nit.

³Rikuang khatkah, Simona rikuang bîkah khan a chuang a; a ziangah vakôl ata inritol viat rangin a ngên a. Khanchu, rikuanga ṭhung pumin mipuihei khah ân risei tâk a.

⁴Thu â sîr zoiin chu Simona ziangah, “Ilî inthûkna tiang rikuang infen la, inga man rangin nin lênhei dêng rei,” a ti a.

⁵Simona khan, “Puma, zân isôtkah kin dêng a, îte man mah ung e; nikhomsela, nangma thun lênhei dêng nôk ki ti,” itin a sâm a.

⁶An zuk dêngin chu inga itamkah ân hum tâk a, an lênhei khom a ṭet lôk lôk tâk a.

⁷Khanchu, a hong isan rangin rikuang danga om an lômahei khah kutin an zâp a. Anni khah an hong a, rikuang inikah kha rinîk lôk lôk rang dôrkan an thun insip seng seng a.

⁸Khante, Simon Petera khan thil omzia a mun chu Jisua ke bulah khan rikhûk idilin â bok a, “Puma, ne marak roh, mi sual ki nit hih,” a ti a.

⁹Amah neh a malhei khan inga an man intamzia khah arkhêl an iti a nit.

¹⁰Simona champui, Zebedaia naihei Jakoba neh Johana khomin arkhêl an ti tak tak a. Khante, Jisuan Simona ziangah, “Ṭi no roh, atûna rithokin miriam man tâng ni ti,” a ti pêk a.

¹¹An rikuanghei khah vakôlah an hong kâiisua a, thil tinrêng imah riaiin Jisua an zui tâk a.

¹²Nikhua khatkah chu Jisua kha khua khatkatah a om lâiin, mi khatkah, iphâr ituam hin Jisua khah a mu a, lingisikin â bok a, “Puma, ni nuamin chu ni nen rithiang thei,” itin a ngên a.

¹³Jisuan â ban a, a tôn a, “Ki nuam, hong rithiang ta roh,” a ti a. Voikarengin â phâr khah a hong dam zel tâk a.

¹⁴Khante, Jisuan a ziangah, “Tute iril no roh; khannisela, thiampu vân en inla, ni dam tâk iti mihein an riat theina rangin Mosia thupêk angkan rithârna rangin ribôlna thil lan roh,” a ti pêk a.

¹⁵Khannisela, Jisua thurchi khah ân thang ual ual a, mipuihei kha a thu sîr ringai rang neh an natnahei indam pêk rangin a ziangah an hong ribûm zut zut a.

¹⁶Nikhomsela, ani chu fianrial munah a fe a, a ṭongṭai ngai a.

¹⁷Sûnkah chu Jisuan mi ân risei a. An lâiah khan Galili neh Judai ram kho tina rithoka neh Jerusalema rithoka hong Farisaihei neh Dân inriseituhei khah an om sa a. Mi indamna rangin Pumapa ritha kha Jisua chungah a om a.

¹⁸Kha lâiah khan mi ṭhenkan izeng khatkah, a zâlmun pumin an hong rizôn a; Jisua makunga inzâl an tum a.

¹⁹Nikhomsela, mipui tam sikin lût thei mak a; khanchu, inchungah an luipui a, inchung khah an lâi a, khantak ata khan a zâlmun pumin Jisua makung takah khan ruiin an zuk iṭhul a.

²⁰Khante, Jisuan an iamzia a mu a, a ziangah, “Mala, ni sualhei izâ a nit tâk,” a ti pêk a.

²¹Khante, Dân inriseituhei neh Farisaihei khan, “Hingka taka Pathian sîrinsia hih tûm ai nit? Pathian bang ti no khan tûm sual izâ thei,” itin an risôn a.

²²Khanchu, Jisuan an thu sîr khah a riat a, an ziangah, “Ithôm khangkana thil nin ingaitua?

²³‘Ni sualhei izâ a nit tâk,’ iti neh ‘Thoi inla ken lôn ta roh,’ iti hih a im â ti a ol ual?

²⁴Rammualah hin Miriam Naipa hin sualhei izâ theina a nei iti nangni inlang pêk ki ti,” a ti a. Khanchu, izengpa ziangah khan, “Thoi inla, ni puantha lan la, ni inah fe ta roh,” a ti pêk a.

²⁵Voikazelin an mitmuah a thoi lik a, a zâlna puantha a lâk a, Pathian inpâk pumin a in tiang a fe tâk a.

²⁶An rêngkan ringai rikhêlin an ṭi a, Pathian an inpâk a, “Vuani chu hingka taka thil rikhêl ei imu hih,” an ti a.

²⁷Khanungchu, Jisua kha a suak a, siadôlna ofisa ṭhung, siadôltu khatkah arming Levia khah Jisuan a mu a, a ziangah, “Ne zui roh,” a ti pêk a.

²⁸Khanchu, Levia khah a thoi a, tinrêng iman a zui tâk a.

²⁹Khante, Levia khan a inah Jisua rangin ruai a ṭhe a; khanchu, siadôltuhei neh mi dang itam takkan khalai an hong rikhîlpui a.

³⁰Khante, Farisai ṭhenkahei neh Dân inriseitu ṭhenkahei khan Jisua kôilômhei ziangah an riphun a, “Ithôm siadôltuhei neh mi sualhei ziangah nin ifâkin nin iin ngai,” an ti a.

³¹Jisuan an ziangah, “Mi damhein dâktor nang mak a, mi inṭophein kêng an inang.

³²Mi felhei rilam ranga zuang ni mang a, an rilet theina ranga mi sualhei rilam ranga zuang kêng kî nit,” a ti a.

³³Mi ṭhenkan Jisua ziangah, “Johana kôilômhein chu bu ngeiin an ṭongṭai ngai a, khangkah khan Farisai kôilômhei khomin an tho ngai a; khannisela, ni kôilômhein chu an fâkin an in mai ngai a?” an ti a.

³⁴Jisuan an ziangah, “Rineina ruaiṭheah moiineitu a om sungah khan imoi iṭhuituhei khah bu nin înngei thei rang mani?

³⁵Khannisela, moineitu khah an ziang ata ṭhui pai nikhua la tlung a ta, kha tikin chu la ngei an ti,” a ti a.

³⁶Jisuan an ziangah hi ṭongrikhek khom hih â sîr a, “Tutên puan ithar isânin puan ilui pô ngai mak, pô ta ngân sela, â thar kha chanlamboia an isân îsiat nîng a ti; puan ithar lek neh â lui lak kha rime tlak no nih.

³⁷Uain ithar khom tutên savun peng iluiah thun ngai mak, thun ta ngân sela, uain ithar khan savun penghei khah mût ikhoi a ta, ibua vang a ta, savun penghei khom khah siang a ti.

³⁸Khasikin, uain ithar chu savun peng ithara thun rang a nit.

³⁹Tutên uain ilui in nungin chu uain ithar in nuam ngai mak e, ‘Uain ilui chu a tui ual,’ an ti ngai,” a ti a.