Read Biete LUKA 6 Bible Online

LUKA 6 - Biete bible

LUKA 6

¹Sabatnî voikah chu bupui mun ipâlin an thleng a, a kôilômhei khan buvui an chun a, an kutin an inuai infâi a, an bâr a.

²Farisai ṭhenkahei khan, “Ithôm sabatnî-a tho no rang ei Dânin ai ti teh nin itho?” an ti a.

³Jisuan anni khah a sâm a, “Davida neh a mihein an vonṭâm lâia an itho khah nin itep ngai ino mani?

⁴Pathian inah a lût a, Pathian ranga lan, thiampuhei fâk rang banga Dânin ai phal ibai khah a lâk a, a fâk a, a mihei khom a înfâk sa thu kha?” a ti a.

⁵Khante, Jisuan an ziangah, “Miriam Naipa hi Sabatnî Pumapa a nit,” a ti a.

⁶Khante, sabatnî dang nôkah khan Jisua inkhôm inah a fe a, ân risei a. Amakhan mi khatkah a kut changtianga zeng a om a.

⁷Dân inriseitu ṭhenkahei neh Farisai ṭhenkahei khan Jisua an nô theina rang bi zongin sabatnin ân dam neh ân dam no an lei ridîp ṭian a.

⁸An lunginṭong khah Jisuan a riat a, kut izeng ziangah khan, “Iding inla, matiangah hin hong roh,” a ti a. Khante, ani khah a thoi a, â ding tâk a.

⁹Khanungchu, Jisuan an ziangah, “Ei Dânin im a ne iphal, sabatnî-a mi san im, denginthei im; mi ringna inzôk im, inrimang im, nangni ki irdon a nit,” a ti a.

¹⁰An rêngka khan a en vêl a, khanchu, izengpa ziangah khan, “Ni kut phar roh,” a ti a. A hang phar a, a kut khah a hong dam tâk a.

¹¹Khante, annihei khah an ning a thik tak tak a, Jisua chunga an tho rang dân an ngaitua tâk a.

¹²Kha lâi zoroah khan zânkah chu Jisua kha iṭongṭai rangin itlângah a fe a. Pathian ziangah zan khovârin a ṭongṭai a.

¹³Khante, khua a hong vârin chu a kôilômhei khah a koibûm a, an lâi ata Sômleiinikah a zen a, an rimingin Tirtôn a be a.

¹⁴Simona (Petera an ibe hei), a unaipa Andria, Jakoba neh Johana, Filipa neh Bartholomaia,

¹⁵Mathaia neh Thoma, Alfaia naipa Jakoba neh Simona (Zelota an ibe hei),

¹⁶Jakoba naipa Juda neh ân mantu chang tâk Juda Iskariota hei kha an nit.

¹⁷Khante, Jisua kha Tirtônhei lômin itlâng ata a zuang ṭum nungin, a kôilôm itam takkahei lâiah munrichamah â ding a. Kha munah khan Judai ram murdia rithok hei, Jerusalema rithok hei, tuikhanglian rikam khua Tura neh Sidona rithok heia hong mipui itam takkah an om a.

¹⁸A thu sîr ringai rang neh an natnahei indam ranga hong an nit a; ramrili înbuaihei khom an hong a, an dam a.

¹⁹Mi murdi khan ama tôn rang an tum a, a ziang ata sinthotheina a suak a, mi tin an rêngkan an hong dam khai a.

²⁰Jisuan a kôilômhei khah a en vêl a, “Nangni inrianghei o, nin ham a ṭhat e, Pathian Ram khah nin ta a nit.

²¹Nangni atûna voniṭâmhei o, nin ham a ṭhat e, Nin lai khop rang a nit. Nangni atûna ṭaphei o, nin ham a ṭhat e, Nin la înui rang a nit.

²²“Miriam Naipa sika mihein nangni an theimâk a, nangni an nôl a, nangni an êro a, mi pualoihei nangni an ti tenan chu nin ham a ṭhat rang vang na!

²³Amakhah a hong tlung tikin chu lôm unla, râiifânin lâm rei. Rivânah nin loman ilu tak ai om tam a nit. Nin chunga an tho lam angkah takin an chibulhei khomin zânthlahei chungah an lei itho ngai a nit.

²⁴“Nangni atûna richonghei o, nin chung ân khôk e, Nunkhohoi nin imu zoi tâk a nit.

²⁵Nangni atûna khophei o, nin chung ân khôk e, Iṭâm dangindan nin lai om rang a nit. Nangni atûna nuihei o, nin chung ân khôk e, Peitemin nin lai ṭap rang a nit.

²⁶“Mi tinin nangni an inpâk tenan chu nin chung ân khôk rang vang na; khangkah khan an chibulhei khomin zânthla lemhei an lei înpâk ngai a nit.

²⁷“Ki thu ringaituhei o, nangni chu nin irâlhei lungthlung unla, nangni neltuhei kha an ṭhatna rang tho pêk rei.

²⁸Vâni nangni sâmtuhei kha ṭhatvur unla, an nuam nangni lotuhei kha ṭongṭai pêk rei.

²⁹Ni mâi ibêntu ziangah kiangtiang khom do pêk sa roh. Ni puan nang ilah pêktu khan ni zakua khom a lâk rang khap no roh.

³⁰Mîn thil nang an nin chu peh roh, ni ta an lâk khomin ni khâi no roh.

³¹“Ni chungah min tho seh ni nuamlam angkah takin mi chungah khom tho roh.

³²“Mi lung nangni thlunghei bang lung nin thlungin te, ingkan im ṭhatvur nin dong ranga? Mi sualhei khomin anmani lungithlungtuhei chu lung an thlung ngai.

³³Nin chunga sin iṭha thohei chungah bang sin iṭha nin thon teh, ingkan im ṭhatvur nin dong ranga? Mi sualhei khomin khangkah takah khan an itho ngai kêng ai nit.

³⁴Imu nôk ni tûng theinahei ziang bangah thil nen ritângin teh, ingkan im ṭhatvur ni dong ranga? Mi sualhei khomin imu nôk rangin chu mi sualhei an înritâng ngai kêng ai nit.

³⁵Nin irâlhei kha lungthlung unla, a chungah thil iṭha tho pêk rei. Imu nôk tûng khâi loiin inritâng rei. Khanchu, loman ilian mûng nin ta, Chungnungtak Pathian naihei nîng nin ti. Ani khan chu lômna châng ria nohei neh mi sualhei khom lung a înkham ngai a nit.

³⁶Nin Pan mi lung a înkham ngai angkan nangni khomin mi lung inkham rei.

³⁷“Mi sêl no unla, isêlin om no tin u. Mi dem no unla, idemin om no tin u. Mi izâ unla; khanchu, izâ nîng nin ti.

³⁸Peh unla; khanchu, ipe nîng nin ti. Tiknem pêkin, naminridên ngitkan, soiinîngin, ilêt rakkan nin dong thei loi dôrkan nin kutah ipe nîng nin ti. Mi nin rita pêkna ngirah khan Pathianin nangni rita pêk a ti,” a ti a.

³⁹Jisuan an ziangah hi ṭongrikhek hih a ril a, “Mitdelin mitdel ngir iruai thei ngai mak, â ruaiin chu an ruaikan khurpadukah ṭul rim an ti.

⁴⁰Ân riseitu nêkan arseitu khah lian ual mak a; khanniseh, arseitu khom arsei zoi tikin chu ân riseitu angkah ni tâng a ti.

⁴¹“Ithôm mahni mita thingtum iom khah reh loia ni suapui mita rinimte om khah nî mu hi?

⁴²Mahni mita thingtum iom khah mu loia ni suapui ziangah, ‘Suapui, ni mita rinim khah nang lei kêl pêk rong,’ ingkan im nî ti thei? Vârrilet, ni mita thingtum iom khah kêl bak inla; khanchu, ni suapui mita rinimte kêl isua rang iom khah mun fel thei ni ti.

⁴³“Thingkung iṭha â râ seh mak a, thingkung isia khom â râ ṭha ngai mak e.

⁴⁴Thingkung chu â râa rithokin ireh thei a nit. Tutên riling bukah theichâng rimal ngai mak a, tûnpôl kungah khom grep irâ rimal ngai mak e.

⁴⁵Mi ṭha khan chu a lungsunga thil iṭha a sapsua ngai a, mi sualin chu a lungsunga thil isiahei a sapsua ngai; lungsunga sipliam kha kêng bâiin a îsîr suak ngai.

⁴⁶“Ithôm ki thu zôm loiin, ‘Puma, Puma,’ nin ne iti?

⁴⁷Tukhom ki zianga hong a, ki thu ria a, zômtu chu tûm ai ang nangni ril ki ti.

⁴⁸Kha mi kha chu a in sin rinêng inthûk vitka choih a, lungpui chunga a lungphûm iphûm angkah a nit. In kha tuiilianin hong suk khom seh, innîng thei ngai mak a; idet ngitka sin a nit sikin.

⁴⁹Khannisela, tukhom ki thu riaa, zôm ino chu lungphûm iboia ipil chunga in isintu angkah a nit; in kha tuiilianin a hong suk a, a chim zel a, a chim dân chu ai natinsat a nit,” a ti a.