Read Biete LUKA 7 Bible Online

LUKA 7 - Biete bible

LUKA 7

¹Khante, Jisuan mihei ziangah kha thuhei murdi khah â sîr zoiin chu Kapernaumah a fe tâk a.

²Rom.sipai rizaka ruitu som lungthlung tak dam mak a, a thi lôk lôk a.

³Khante, Jisua thurchi a lei riatin chu izuanga â som indam ranga ngên rangin Juda upahei a tir a.

⁴Jisua ziangah an hong a, ṭhatnemringai takkan an ngên a, “Hi mi hih ni ṭangpui rang inrup a nit.

⁵Kin mihei lung ân kham a, kin inkhôm in khom a ne isin pêk a nit,” an ti a.

⁶Khanchu, Jisuan annihei khah a zui tâk a. In a tlung rangton chu sipai rizaka ruitu khan a malhei a tir a, “Epu intak rakkan hong no roh, ki in sung ni lûtna rangin ritluk mak e.

⁷Khabanah keima ngêi khom ni zianga hong rang khomin ritluk mang e. Thu bang inchôi inla, ke som chu dam zel a ti.

⁸Kei khom mi thunuaia om ki nit a, ki nuaiah sipaihei an om a, khatka ziangah, ‘Fe roh’ ki tin chu a fe ngai a, ‘Hong roh’ ki tin a hong ngai a, ke som ziangah khom ‘Hih sin roh’ ki tin a sin ngai a,” a ti a.

⁹Khante, Jisuan amakhah a riatin chu arkhêl a ti a, arhêl a, mipui â zuihei ziangah, “Nangni ke ril, hingka taka iamna hih Israelhei lâiah la mu ngai mang e,” a ti a.

¹⁰A mi tirhei kha inah an hong kîr nôkin chu isom kha idamin an hong mu tâk a.

¹¹Itôika nungah chu Jisua kha khua khatkah Nain khua an iti-ah khan a fe a, a kôilômhei neh mipui itam takkan an zui a.

¹²Khante, kho kul dâikot an tlung rangin chu, mi thi an hong rizôn suak a; a nu khah numei a nit a, a naipa neisun a nit. A khuaa mi itam takka khom an hong sa a.

¹³Khante, Pumapa khan a mun chu khâmnu khah lung ân kham tak tak a, a ziangah, “Ṭap no roh,” a ti pêk a.

¹⁴Khanungchu, a va nâi a, rilâng khah a tôn a, arzôntuhei khah an ngîr tâk a, Jisuan, “Tlangvâl, thoi roh, nang ki ti,” a ti a.

¹⁵Khante, mi thi khah â ṭhung zel a, a hong ṭong tâk a; khanchu, Jisuan a nu ziangah khan a pêk a.

¹⁶Mi murdîn an ṭi tâk a, Pathian an inpâk a, “Ei lâiah zânthla roinpui tak a zuang îlang tâk a nit; a mihei inzôk rangin Pathian a zuang tâk,” an ti a.

¹⁷Jisua thurchi khah Judai ram pumpuiah neh a kôlvêl ram tinah ân thang tâk a.

¹⁸Johana kôilômhei khan Jisua thurchi khah Johana an iril a.

¹⁹Khanchu, Johana khan mi inikah a koi a, Pumapa ziangah, “Â zuang rangah khah ni nit im, mi dang kin lai tûng rang im?” itia ridon rangin a tir a.

²⁰Kha mihei khah Jisua ziangah an hong a, “Baptistu Johanan, ‘A zuang rangah khah ni nit im, mi dang kin lai tûng rang im?’ itia nang ridon rangin ni ziangah a ne hong itir a nit,” an ti a.

²¹Kha lâi takah khan Jisuan mi itam takkah, daminohei, natna tuanghei, ramrili imanhei ân dam a, mitdel itam takkah khom an mit ân vâr pêk a.

²²Khanchu, Johana kôilômhei khah a sâm a, “Fe nôk ta unla, nin thil mu neh nin iriathei hi Johana va ril rei, mitdelhei khah a mit a vâr a, kebâihei ken an lôn a, iphârhei an rithiang a, kuarisêthei khom a ikuar a vâr a, mithihei kâiithoi an nit tâk a, inrianghei ziangah Thurchi Ṭha isîr a nit tâk.

²³Tukhom ne ringla nohei chu mi hamṭha an nit,” a ti a.

²⁴Johana mi tirhei an fe zoiin chu mipuihei ziangah Johana chungchâng Jisuan â sîr tâk a, “Johana ziangah ramchârah nin fe lâiah khan î muh rang im nin itûng? Ithli isêm innîng lâiluang mani?

²⁵Tu en rangin im nin ife? Puan rivuai isila rivo mi mani? Khangkana puan rivuai isil mi neh hoisakfama lênghei chu rêng inah kêng an iom ngai.

²⁶Ne ril ta u, îtak ien ranga nin ife suak mani? Zânthla en rangin na? O a nit; nangni ke ril, ani khah zânthla nêk khoma lian a nit.

²⁷Johana hi a nit, Thubu-a, ‘Pathianin ki tirtôn ni matonah tir ki ta, ani khan ni matonah ni lampui lei siam a ti,’ ai ti kha a nit.

²⁸Nangni ke ril, nupang ata inzir lâiah Johana nêka roinpui ual omak; khannisela, Pathian rama mi chîntak khom Johana nêka khan a roinpui ual,” a ti a.

²⁹Johana thu sîr khah mipuihei khan an riat a; anmani neh a bîkin siadôltuhei khan Pathian lampui dik khah ipomin, Johana baptisma kha an lei ichang tâk a nit.

³⁰Khanniseh, Farisaihei neh Dân inriseituhei khan chu an ta ranga Pathian thil tum khah an nôl a, Johana baptisma kha an ichang nuam ino a nit.

³¹Jisuan, “Atûn lâi rualitharhei hih im an i-ang? Inêm ken rikhek rang tâk?

³²Naipanghei bazâr muna ṭhung a, lôm khatkan lôm dang ziangah, ‘Rineina belem nangni kin tum pêk a, lâm mak chei a, lusûn la kin sak khomin ṭap ual mak chei a,’ itia risam risak angkah an nit.

³³Baptistu Johana a zuang a, bu ngeiin uain khom in mak a, nangmanin, ‘Ramrili nei a nit hih,’ nin ti a.

³⁴Miriam Naipa a zuang a, a fâkin a in a, nangmanin, ‘En ta u, rôlruakpa, uain idu mi, siadôltuhei neh mi sualhei malpa soh,’ nin ti a.

³⁵Nikhomsela, Pathian vârna dikzia chu â hamtuheiah a ilang suak a nit,” a ti a.

³⁶Farisai lâia khatkan bu ne rangin Jisua a fial a, a inah khan a fe a, bu ne rangin â ṭhung a.

³⁷Kha khuaah khan nupang isual khatkah a om a. Jisua kha Farisai inah bu a nêk iti a riatin chu alabastar bûrin siriak namhoi a hong chôi a.

³⁸Jisua nungah, a ke bulah khan iṭap pumin a ngîr a; a mitrithli khan Jisua kehei khah a zung indui a. A samin a kehei a zuk rûk a, a ke khah a fôp a, siriak namhoi khah a buak a.

³⁹Â fialtu Farisai khan a mun chu a lungrilin, “Hi mi hih zânthla dik tak a nitin chu â tôntu nupang isual zia hih riang a ti,” a ti a.

⁴⁰Jisuan a ziangah, “Simon, ṭongbâikah nang iril rang ki nei,” a ti a. Simona khan, “O Minriseitu, ne ril roh,” a ti a.

⁴¹Jisuan a ziangah, “Mi inikan lâkai ipeh ngaitu ziangah sum an ritâng a. Khatkah khan duli rizarngakah, khatkah khan duli sômringakah.

⁴²An tuak thei no sikin â zâ seng seng tâk a. A tukhôk khan im ani khah lungthlung ual a ti?” a ti a.

⁴³Simona khan a sâm a, “A izâ tam ual khan nîng a ti,” a ti a. Jisuan, “Ni tîn dik,” a ti a.

⁴⁴Khanungchu, nupangnu tiang mâi a ngat a, Simona ziangah, “Hi nupangnu hih ni mu na? Ni inah ki hong a, ki ke risûkna rang tui ne peh mak che a, ani hin chu a mitrithlin ki kehei arsûk a, a samin a rûk inhûl a.

⁴⁵Nangman ne fôpin ne lei lôm mak che a, ani hin chu a hong lût ata ki kehei ifôp bâng mak a.

⁴⁶Nangman ki luah riak nen rithu mak che a, ani hin chu ki kehei siriak namhoi ai buak a nit.

⁴⁷Khasikin, nang ke ril, a sual murdi kha izâ a nit tâk a, ani khomin hingka takah hin a lungthlungna a înlang a nit. Khasikin, tukhom izâna chînin chu lungthlungna chîn ân lang ngai,” a ti a.

⁴⁸Khanchu, Jisuan nupangnu ziangah, “Ni sualhei izâ a nit tâk,” a ti a.

⁴⁹A khalai rikhîlpuihei khan, “Hingkana sualhei tena khom izâ thei hih tûm ai nit?” an riti a.

⁵⁰Khante, Jisuan nupangnu ziangah, “Ni iamna hin nang a înzôk a nit, rithlaringam takkan fe ta roh,” a ti a.