Read Biete LUKA 8 Bible Online

LUKA 8 - Biete bible

LUKA 8

¹Itôika nungah khan Jisua kha khua lian neh khua chîn rifangin Pathian Ram Thurchi Ṭha sîrin a lôn a. Kôilôm Sômleiinikahei khan an zui a.

²Nupang ṭhenkah, ramrili iman ata damhei neh an natna ata damhei khomin an zui sa a; khahei khah Mari Magdalini, a sunga ramrili sarikah ai ûmisua pêk hei,

³Heroda sum enkoltu Chuza nupui Joani hei, Sosani hei neh nupang dang itam takkahei an nit. Hi mihei hin anmani sumpuan ngêiin Jisua neh a kôilômhei khah an iṭangpui ngai a nit.

⁴Kho tina rithokin mipuihei Jisua ziangah an hong ribûm a. Jisuan hi ṭongrikhek thu hih imangin thu a lei iril a.

⁵“Mi khatkan bu rît rangin a loiah a fe a, fachi arthe a, a hang rithen chu a ṭhen chu lampuiah a tlâk a, ivahein an fâk rip tâk a.

⁶A ṭhen chu lungpharpha chunga ipilah a tlâk a, imông chu a hong mông a; nikhomseh, ipilin izil a nei no sikin a rôp nôk rip zel tâk a.

⁷A ṭhen chu riling kârah a tlâk a, riling kârah a hong ṭoi a, riling khan a dîp that tâk a.

⁸A ṭhen chu rinêng iṭhaah a tlâk a, a hong thuar a, a bâk rizaka chitin a hong irâ tâk a,” a ti a. Khante, Jisuan a tong ikhârnan, “Riatna ranga ikuar inei kan chu ringai riseh,” itin â khêk a.

⁹A kôilômhei khan kha ṭongrikhek omzia khah Jisua an ridon a.

¹⁰Jisuan, “Pathian Ram rithup riat theina kha nin ziangah chu ipe a nit. Khanniseh, mi danghei rangin chu; en ṭian khom seh an mu infel nona rang neh an ringai ṭian khoma an riat infel nona rangin ṭongrikhek banga sîr pêk a nit.

¹¹“Ṭongrikhek omzia chu hingkan a nit; Fachi chu Pathian thu hi a nit.

¹²Fachi lampuia thla chu thu ringaia retuhei an nit; nikhomsela, an iam nona rang neh inringa an om nona rangin Soitana kha a hong a, an lungrila thu khah a lâk pêk vang ngai.

¹³Lung chung ipila thla chu an thu riat khah ilôm takka pom tâkhei hi an nit; nikhomsela, anmaniah rizung inthûk thla mak a, zoro sôt inote chu an zôm a, an chungah fiana a hong tlung viatin chu an ilîr nôk zel ngai.

¹⁴Riling kâra thla chu thu khah an riat a; nikhomsela, hi ringnuna lungkângna hei, richongna hei neh nunkhohoi rizuknahein a dîp a, an irâ zel min phâk ngai mak.

¹⁵Rinêng iṭhaa thla chu hihei hih an nit, thu an iriat khah lungrilah iṭha takkan an rê a, an zôm a, tuangdiar ngêi ngêia irâ sua tâkhei hi an nit.

¹⁶“Tutên meiser ichokin, bêl inrikhum ngai mak a, zâlmun thuaiah khom seh ngai mak. Â lût kan a vâr an mu theina rangin a siamunah kêng an isia ngai.

¹⁷“Tlâng suak ino ranga rithup îte omak a, ria no rang neh inlang ino ranga thup khom îte omak e.

¹⁸“Nin thu dong dânah ridîn rei, â nei murdi chu peh sâng an ta, â nei ino chu ai nei viat ai sôn khom lah pêk rip an ti,” a ti a.

¹⁹Khante, a nu neh ân zirpuihei khom Jisua ziangah an hong a, mipui sikin a ziang tlung thei mak a.

²⁰Mi ṭhenkan Jisua ziangah, “Ni nu neh nen zirpuihein nang imu nuamin putiangah son nang an ngâk mai,” an ti pêk a.

²¹Khanchu, Jisuan a sâm a, “Pathian thu riaa zômhei hih ki nu neh ki suapuihei chu an nit,” a ti a.

²²Sûnkah chu a kôilômhei neh rikuangah an chuang a, “Dîl râl tiangah son lei kâi rei u,” a ti pêk a. Khanchu, an rithok tâk a.

²³An hei fe lâiah khan Jisua khah a in thlar a. Voikarengin dîlah khan thlipui a hong râng a, an rikuang khah tuiin a sip lôk lôk tâk a, rilônthingin an om tâk a.

²⁴Khanchu, kôilômhei khah Jisua ziangah an fe a, an ithoi a, “Minriseitu, Minriseitu, kin irmang zoi rang tâk kêng,” an ti a. Khanchu, Jisua khah a hong thoi a, thlipui neh tuirisok khah thu a pêk a, a dâi dup tâk a.

²⁵Khante, a kôilômhei ziangah, “Taktiang im nin iamna ai om tâk?” a ti a. Khanniseh, an ringai rikhêlin an ṭi a, “Hi mi hih tûm ai nit hi? Thlipui neh tuirisok khom thu a pêk a, an izôm hi,” an ti a.

²⁶Khante, Jisua neh a kôilômhei khah Galili dîl râl, Gerasin [3] ram an tlung a.

²⁷Jisua kha imuang a suak kaneh chu khosunga mi, ramrili iman khatkan a hong tong a, kha mi khah zoro sôt takkah puansil iboia, inah khom om loia, thlân ipûkheia om ngai a nit a.

²⁸Jisua a mun chu â khêk a, a ke bulah a bok a, iring takkan, “Jisua, Pathian Chungnungtaka Naipa im ne lo rang nî ti? Deng nen thei tlak loi rangin nang kî ngên a nit,” itin â khêk a.

²⁹Jisuan ramrili khah a sung ata suak rangin thu a pêk sikah hingkana ai ti a nit. Voi itam takkah an man a, lung inah an khum ngai a, a kuthei a kehei zingzirin an khuap a; nikhomsela, an khuapnahei khah â sat riai a, ramrili khan ramchâr tiang ai ṭhui ngai a nit.

³⁰Khante, Jisuan, “Im ner ming?” a ti a. Ani khan, “Ker ming chu Tamah” [4] a ti a, a sunga ramrili lût khah an tam sika a nit.

³¹Khante, ramrilihei khan khur mongboia tir loi rangin Jisua an riphat a.

³²Khante, kha tlâng pangah khan vok lôm fâk izongin an om a, ramrilihei khan vokhei sunga lût rangin Jisua an ngên a; ani khan a phal pêk tâk a.

³³Ramrilihei khan kha miriam khah an mâk a, vokhei sungah an lût tâk a. Vok lômhei khah rôlbôkah an itlân a, dîlah an ṭul a, an rinîk riai tâk a.

³⁴Khante, vok ienkoltuhei khan thil omzia an riatin chu an fe a, khosunga mihei neh a kôlvêla mihei kha an va ril a.

³⁵Khanchu, thil omzia en rangin mihei khah an rithok suak a, Jisua ziang an hong tlungin chu, ramrili imanpu khah puan isila, lungril ngaingir riputin Jisua ke bula ṭhung kha an mu a, an ṭi tak tak a.

³⁶Khante, kha thil imutuhei khan ramrili iman hong dam tâk dân khah an lei iril a.

³⁷Gerasin rama mihei murdi khan an ṭi tak tak sikah khan Jisua kha an ziang ata suak rangin an ngên a; khanchu, Jisua kha rikuangah a chuang a, a mâk tâk a.

³⁸Ramrili a sung ata suak, â dam tâk khan Jisua ziangah, “Nang zui ki ti,” a ti a.

³⁹Khannisela, Jisuan, “Ni inah fen la, ni chunga Pathian sintho hih va ril roh,” a ti pêk a. Khanchu, a fe a, khopui sung pumpuiah a chunga Jisuan sin ai tho pêk khah ân puang tâk a.

⁴⁰Khante, Jisua kha dîl râl ata a hong tlung nôk khah mipuihei khan an lei ngâk mai a, an lei lôm a.

⁴¹Khanungchu, kha khuaa inkhôm in ruaitu khatkah, arming Jaira a hong a, Jisua ke bulah â bok a.

⁴²A nainu neisun, kum sômlei kum inika mi, a thi lôk lôk sikin a ina zuang rangin a ngên a. Khante, Jisua chu a fe tâk a, mipuihein an uap tul tul a.

⁴³Khante, nupang khatkah kum sômlei kum inikah sar thi suak inrik a om a, a sumpuan nei murdi dâktorah â hek zoi riai tâk a, tute lakin indam thei mak a.

⁴⁴Mipuihei kârah Jisua nungtiang a hong a, Jisua puan môr a hong tôn a, voikazelin a thi suak khah arngam tâk a.

⁴⁵Jisuan, “Tûm ne tôn?” a ti a. Kei chu ni mang an ti chit a. Khanchu, Peteran a ziangah, “Minriseitu, hi dôra mipuiin nang an iuap hite,” a ti a.

⁴⁶Khanniseh, Jisuan, “Tukhôk manin a ne itôn a nit, keima ata sinthotheina a suak iti ki riat,” a ti a.

⁴⁷Nupangnu khan rithup thei ni khâi mak iti a riatin chu inthing pumin a hong a, Jisua ke bulah â bok a, a tônna bi neh voikazela a dam tâk thu mi murdi makungah â sîr tâk a.

⁴⁸Khanchu, Jisuan a ziangah, “Ki nainu ni iamna hi nî dampui a nit, thlangam takkan fe ta roh,” a ti pêk a.

⁴⁹Jisua khah a la ṭong mai lâiin, Jaira in ata thangkoi a hong tlung a, Jaira ziangah, “Ni nainu a thi tâk, Minriseitu hi inbuai khâi no roh,” a hong ti a.

⁵⁰Jisuan a lei riat a, Jaira ziangah, “Ṭi no roh, iam ngit inla, dam a ti,” a ti a.

⁵¹In a va tlungin chu Petera, Johana, Jakoba, naipangnu nu neh pa banah chu tute a zianga lût phal mak a.

⁵²Khataka om murdi khan naipangnu sûnin an ṭap a. Khannisela, Jisuan, “Ṭap no rei, â thi ni mak e, â in kêng ai nit,” a ti a.

⁵³Khante, naipangnu khah a thi ngêt iti an riat sikin an nuiso a.

⁵⁴Khannisela, Jisuan a kut â tûk a, “Ki naite, hong thoi roh,” a ti a.

⁵⁵Khanchu, a hong ring nôk a, voikan a hong thoi zel tâk a; Jisuan, “Ifah rang peh rei,” a ti a.

⁵⁶A nu neh a pa khan arkhêl an ti tak tak a; nikhomsela, Jisuan a sintho khah tute iril loi rangin thu a pêk a.