Read Biete DÂNNIKNA 1 Bible Online

DÂNNIKNA 1 - Biete bible

DÂNNIKNA 1

¹Hi thuhei hih Jordan sak tiang ramchârah Israelhei an om lâia Mosian Israel murdi zianga a îsîr riziakna bu chu a nit. Anni kha Sefa kôl Jordan phâizôlah khan an om a, kha mun khah kiangtiang Paran khua a om a, kiangtiang Tofel, Laban, Hazerot neh Dizahab khuahei a om a, a kâr taka om a nit.

²Horeb[1] tlâng ata Kades Barnea chu Edom tlângram tiang lampuia fen sûn sômlei sûnkah lam a nit.

³Israelhein Aigupta ram ata an hong suak a kum sômilina, a thla sômleikhatna, a sûn khatnî-ah khan, PUMAPA khan anmani ril ranga thu ai pêk murdi khah Israela richihei ziangah Mosia khan â sîr a.

⁴Hihei hih PUMAPA khan Amor mi, Hesbon kho rêng Sihona kha â nê a, Basan rama Astarot neh Edrei kho rêng Oga khom â nê zoi nunga a nit.

⁵Israel mipuihei khah Jordan nisua tiang Moab ramah an om lâiin Pathian dân neh thupêkhei khah Mosia khan a sîr fia pêk a.

⁶Ani khan, “Horeb tlângah ei om lâiah khan PUMAPA ei Pathian khan a ne sôn a, ‘Hi tlângah hin nin om sôt rai tâk.

⁷Rithôt unla, fe mai ta rei. Amorhei tlângramah neh a kôlvêl ramhei murdi Jordan phâizôl hei, tlângram hei, phâiram hei, sim tiang ram hei, Mediteranean tuipui rikam idênin fe unla; Kananhei ram neh Lebanon tlângram ikhêl Eufratis vadung idênin fe rei.

⁸Ringai ta u, ram chu nangni kî pêk diam tâk a nit; nin chibul Abrahama, Isaka, Jakoba hei neh an richi suanpârhei zianga ṭongrikhâma keimah, PUMAPA ngêiin kî pêk ramah khan fe unla, va lua ta rei,’ a ti,” a ti a.

⁹Mosia khan mipuihei ziangah, “Horeb tlângah ei om lâi ngirah khan nin ziangah, keimah ringotin chu nangni ruai hi ai rik rai a nit.

¹⁰PUMAPA nin Pathian khan nangni ân pung a, atûnah hin nin tam tlia chu rivâna ârsi zâkah nin hong init tâk a nit.

¹¹PUMAPA nin pi neh puhei Pathian khan atûna nêka a bâk sâng itam takkan nangni inpung sela, nangni a înkung angkan ṭhat nangni vur riseh.

¹²Khannisela, ingkan im keima khât bangin nin buainahei nangni ki rêl infel pêk zoi rang a?

¹³Khasikin, ‘Nin nam lâia mi vâr, lungril inei mi, tlia balam ireh mihei rithlang suak unla, nin chunga ruaitu rangin phun ki ti,’ ki ti a.

¹⁴Khante, nangmanin, ‘Ni thil ti chu kin ta rangin ṭha ok a ti,’ itin nin ne sâm a.

¹⁵Khangkan nin nam lâia mi vâr, lungril inei mi, tlia balam ireh mi, nin hong irthlang suak chithei khah nin chungah ruaitun ki siam a, a ṭhen sângka chunga ruaitu, a ṭhen rizaka chunga ruaitu, a ṭhen sômringaka chunga ruaitu, a ṭhen sômka chunga ruaituhein kî siam a nit. Khabanah khan nam tina lupui dang khom nangni kî phun pêk sa a nit.

¹⁶“Kha lâiah khan an ziangah, ‘Nin mihei lâia thubuai kha lei ringaitua pêk unla, nin chipuihei kâra thubuai manih, ram dang nin ompuihei neh kâra thubuai manih kha ifel takkan nin rêl rang a nit.

¹⁷Roirêlnaah thleibîk nin nei rang ni mak a; mi chîn neh mi lian ri-ang natkan nin ngaitua pêk rang a nit. Roirêlna chu Pathian ta a nit. Tute ṭi no rei, nin ta ranga thu khir rai a omin chu ki ziangah hong ithlun nin ta, keiman lei ngaitua ngai ki ti,’ itin thu ki pêk a.

¹⁸Kha lâiah khan thil nin tho rang danghei khom nangni kî pêk a nit.

¹⁹“PUMAPA khan thu a ne pêk lam angkah takin ei tho a. Horeb tlâng ata kha ei suak a, Amorhei tlângram lampuiah ramchâr rizat tak neh inrît tak nin imu khah ei fe thleng riai a, Kades-Barnea ei tlung a.

²⁰Keiman, ‘PUMAPA ei Pathianin a ne ipêk Amorhei tlângram chu nin hong itlung tâk a nit.

²¹Enta u, PUMAPA nin Pathianin ram chu nangni ai pêk diam tâk a nit; fe unla, PUMAPA nin pi neh puhei Pathianin a lei înkung tâk angkah khan hang lua ta rei; ṭi no unla, indôp no rei,’ ki ti a.

²²“Khannisela, ki ziangah nin hong riai a, ‘A ramhei va enthlât a, kin fena rang lampui neh a khua omdânhei ne hong iril nôk rangin mi tir bak ei la,’ nin ti a.

²³“Kha thu khah thu ṭha tak nîng a ti, ki ti a; khanchu, nam tina mi khatkah chit, mi sômleiinikah ker thlang suak a.

²⁴Khanchu, an rithok a, tlângramah an fe a, Eskol phâi idênin an va fe a, an va enthlât riai a.

²⁵Kha rama thei an imuhei khah an hong chôi a, thurchi an ne hong ithluna, ‘PUMAPA ei Pathianin ram a ne ipêk chu ram iṭha tak a nit,’ an ti a.

²⁶“Khannisela, fe nuam mak chei a, PUMAPA nin Pathian thupêk ata nin rihel a.

²⁷Nin puan in sungheiah nin riphun a, ‘PUMAPA khan a ne nel sikin an ne that ranga Amorhei kuta peh rangin Aigupta ram ata a ne hong iṭhui suak a nit.

²⁸Îtho rang im kin ife rang? Kin iṭi a nit. Mi kin itirhei khan kha rama miriam iomhei khah eini nêkan an lian a, an dung arsâng ual a, khuahei khah khua lian rivân isun dap dap kulpui inei a nit. Anak richihei khom kin mu sa, itin an ne ril,’ nin ti a.

²⁹“Nikhomsela, keiman, ‘Kha mihei khah ṭi no rei.

³⁰PUMAPA nin Pathianin nin ma iruai a ta, nin mitmua Aigupta rama nangni ai tho pêk murdi angkah khan anni chu nangni doi pêk a ti.

³¹Ramchâra nin thang sung khomah khan lamthluanin nangni â ruai a, pân a nai ai puak ngai angkan hi mun idênin PUMAPA nin Pathian khan nangni a puak ithlunzia khah nin mu khate,’ ki ti a.

³²Nikhomsela, khaten ki ti nung khomin, nin riabuk siamna mun rang nangni zong pêk a, nin lampui nangni inmuh rang zânah meia, sûnah sûma nin ma ruaitu PUMAPA nin Pathian khah iam ngam mak chei a.

³⁴“PUMAPA khan nin riphun irî khah a lei riat a, a ning a thik a; khanchu,

³⁵‘Hi rikhûk insual taka mihei hin chu khatka lua khomin an pi neh puhei ipeh ranga ṭong ki irkhâm ram iṭha tak khah lût tlak no nih.

³⁶Jefunea naipa Kaleba bangin lût a ti. Ani khan chu a ne iam ngit sikin a va irfang ram khah amah neh a naihei pêng ki ti,’ a ti a.

³⁷Nangmani sikin ki chungah khom PUMAPA khah a ning a thik a, ‘Nang khom kha ram khah lût no tin e.

³⁸Nuna naipa Josua, nang risanpui ngai hi chu lût a ti; ani hih ithor inrât roh. Ani hin Israelhei chu kha ram khah a înlua rang a nit,’ a ti a.

³⁹“Khanungchu, PUMAPA khan ei rêngka ziangah, ‘Nin naihei naipangte te, atûna sia neh ṭha la ria no, râllâkin nin irâlhein man an ti nin iti nin naihei hih lût an ta; anni khah ram chu pêng ki ta, lua an ti.

⁴⁰Khannisela, nangni chu nin inung tiang zur kual nôk unla, Tuipui Sen lampuiah ramchârah khan fe rei,’ a ti a.

⁴¹Nangmani khan ki ziangah, ‘PUMAPA chungah kin lei îsual tâk a nit. Nikhomsela, atûnah hin hang fêng kin ta, PUMAPA kin Pathianin thu a ne pêk lam angkah takin hang doi kin ti,’ nin ti a. Khanungchu, râlthlukin nin rithluk chit a, tlângram hang irûn khah thil iol te rangin nin ringai a.

⁴²“Khannisela, PUMAPA khan ki ziangah, ‘Fe no sela, hang doi tlak no riseh. An ziangah om no ning a, an irâlhein an lei ithat inrimang rang a nit,’ iti iril roh a ne ti a.

⁴³Kha thu khah nangni ke ril a; nikhomsela, ipom mak chei a. PUMAPA thupêk khah nin phial a, tlângram irûn rangin nin hang fe tâk a.

⁴⁴Khanungchu, kha tlângrama om Amorhei khan nangni an lei doi a, ikhuai mi rizûl angkan nangni an lei rizûl a, Horma dênin nangni an rizûl a, Edom tlângramah khan nangni an înê tâk a nit khah.

⁴⁵Nin zuang kîr nôkin chu PUMAPA ziangah nin ṭap a; nikhomsela, PUMAPA khan nin ṭap khah ringai nuam khâi mak a, â kuar khom nin tiang ai sung nuam khâi ino a nit.

⁴⁶“Khanungchu, Kades-Barneaah khan isôt takkah ei om tâk a.