Read Biete DÂNNIKNA 10 Bible Online

DÂNNIKNA 10 - Biete bible

DÂNNIKNA 10

¹“Khanungchu, PUMAPA khan ki ziangah, ‘Lungphêk inikah, matona neh ri-ang bangkan suk inla, thingin a bôm siam roh. Itlângah ki ziangah hong inla,

²lungphêk ni îkhoi tâka thu chuang ngir khah lungphêkheiah khan riziak ki ta; khanungchu, a bômah khan ni sia rang a nit,’ a ti a.

³“Khanchu, sitim thingin bôm kha ki siam a, matona neh ri-ang bang lungphêk inikah ki suk a, lungphêkhei khah chôiin itlângah khan ki hang lui a.

⁴Khanungchu, lungphêkheiah khan matona riziak thu chia, itlâng kôla nin ribûm nî-a, itlângsîpa meia rithoka PUMAPAN nin zianga thu a îsîr thupêk sômkah kha arziak a, PUMAPA khan a ne pêk a.

⁵Itlâng ata kha ki zuang ṭum a, PUMAPA thu ne pêk lam angkah takah khan lungphêkhei kha a bôm kî siamah khan ki sia a, atûn tenah hin ai om mai tâk a nit.

⁶“Israelhei kha Jaakan richihei tuikuanga rithokin Mosera-ah an rithon a; kha munah khan Arona khah a thi a, kin phûm a; a naipa Eleazara khan ama thûlin thiampu laltak ai chang tâk a nit.

⁷Khantaka rithokah khan Gudgodaah an fe a; Gudgoda ata kha tui tamna ram Jotbata-ah khan an rithon a.

⁸Kha lâiah khan Levia richihei kha PUMAPA khan Thuthlung Bôm enkoltu rang neh rizôntu rangin a phun a; PUMAPA maa dinga, a sinitho a, ama riminga mipui ṭhat ivur ngaitu inih rangin a serinran a. Atûn tenan amakha an sintum a lai nit mai a nit.

⁹Khasikah khan kêng Levia chihei khan an chipui danghei lâiah dongtum bîk ram an idong ino a nit; PUMAPA nin Pathian iti angkan PUMAPA zianga thil ilan hi an dongtum rang chu a nit.

¹⁰“Matona angkan itlângah khan sûn sômilikah neh zân sômilikah ki om a; kha ṭum khomah khan PUMAPA khan ki thu a ner ngai pêk a, PUMAPA khan nangni a înrimang khâi ino a nit.

¹¹Khanungchu, PUMAPA khan ki ziangah, ‘Thoi inla, mipuihei ma ruai roh; an pi neh puhei zianga ṭongrikhâma anmani ipeh rang ki înkung ram ipan a, va chuan rangin fe mai riseh,’ a ti a.

¹²“Tho ta u, Israel mihei, ringai ta u, PUMAPA nin Pathianin nangmaniah im ai chûn? Thil dang îte ni mak; nin ṭhatna ranga PUMAPA nin Pathian iṭi a, a lampui murdi kha izui a, amah lungithlunga, nin lungril murdia a sin itho a,

¹³a thupêkhei, a dânhei murdi zôm hi a nit. Khahei khah vuanah hin nin ṭhatna rangin nangni kî pêk a nit.

¹⁴Ringai ta u, rivân inchung takhei, rinêng neh a sunga thil iom murdihei hi PUMAPA nin Pathian ta korong a nit.

¹⁵Nikhomsela, nin pi neh puhei lung a thlungzia kha a natinsat sikin nam danghei murdi nêkan nangmani hi nangni a irthlangin, atûn tenan a nam rithlanghei nin hong init mai tâk a nit.

¹⁶Khasikah khan atûna rithokin chu PUMAPA thu zôm unla, tuklul ilianin om khâi no rei.

¹⁷PUMAPA nin Pathian chu, pathianhei Pathian, ruaitu hei Ruaitu, Pathian roinpui tak, ritha nei tak, ṭi inrît iom tak, tute thleibîk nei ngai ino, fâkinrûk khom lah ngai ino a nit.

¹⁸Farahei neh numeihei khah ifel takkan roi a rêl pêk ngai a; eimani angkah ngirin ram dang mihei khom khah lung ân kham a, an fâk rang hei, an silbom rang hei ai pêk ngai a nit.

¹⁹Khasikah khan nin lâia om ram dang mihei khah lunginkham rei; nangni khom Aigupta ramah khan ram dang mi nin lei nit khah.

²⁰PUMAPA nin Pathian chu ṭi unla, ama sin bang nin tho rang a nit. Amah bang itûn richel ngit unla, ama riming iching bangin ṭong nin rikhâm ngai rang a nit.

²¹Amah chu inpâk rei, nin mita nin imu tâk thil roinpui tak neh thil rikhêl takhei nangni thôpêktu hih nin Pathian chu a nit.

²²Nin pi neh puhei kha Aigupta ram an lûtah khan sômsarikah bang an nit a. Khannisela, atûn chu PUMAPA nin Pathian khan rivâna ârsi zâkan nangni a înpung tâk a nit.