Read Biete DÂNNIKNA 11 Bible Online

DÂNNIKNA 11 - Biete bible

DÂNNIKNA 11

¹“PUMAPA nin Pathian chu lungthlung unla, a thumâkhei, a dânhei, a roirêlhei, a thupêkhei murdi zôm mai rei,

²PUMAPA chungchâng, nangmani ngêiin nin iriathei khah remai rei. Kha thil iretuhei khah nin naihei ni mak a, nangmani ngêi hi nin nit. PUMAPA nin Pathian thununna natinsatziahei kha nin mu a, a roinpuizia hei, a sinthotheizia hei, a kut râtzia hei,

³a sinrikhêl hei, a thiltho hei, Aigupta ram sunga Aigupta rêng Faroa chungah neh a ram sung murdia ai tho hei,

⁴Aigupta sipaihei, an sakor neh an tâli chunga a thiltho hei, nangni an rizûl lâia Tuipui Sena ân rinîk dân hei, an rimang tâk tlia hei nin riat riai a.

⁵Hi mun nin hong tlung ma, ramchârah nin om lâia nin chunga a sintho dânhei nin riat riai a.

⁶Reubena nama Eliaba naipahei, Dathana neh Abirama hei chunga a sintho dân hei; rinêngin a bâi a âng a, Israel murdihei mitmuah, anmani neh an insungkuahei neh an puan inhei neh an ran ṭhui murdi â lem riai dânhei â mua, â retuhei nin nit.

⁷A nit, PUMAPA thil roinpui tak tak tho murdi khah mit ngêia mutuhei chu nangmani khah nin nit.

⁸“Vuaninta nangni kî pêk dânhei murdi hih nin zôm rang a nit; khanchu, hong rât nin ta, nin va lua rang ramah khan lût nin ta, va chuan thei nin ti.

⁹Dût neh khuaitui luangna ram, nin pi neh puhei neh an richihei ziang khoma ipeh ranga PUMAPAN ṭongrikhâmna nangni a lei înkung pêk tâk ramah khan om sôt thei nin ti.

¹⁰Nin va chuan rang ram chu, nin hong suakna Aigupta ram, rikul sungah chimu nin tu a, zâltak isonga tui nin buak ngaina angkah kha ni mak e.

¹¹Nin va chuan rang ram chu, itlânghei, neh phâiheia sip a nit a, vân ruatui dong tamna ram a nit.

¹²PUMAPA nin Pathian ienkol ram a nit a; PUMAPA nin Pathian mit chu kum ithara rithoka kum mong idênin ai fûk mai ngai a nit.

¹³“Khanchu, vuaninta nangni kî pêk thupêkhei hih zôm rei; PUMAPA nin Pathian chu lungthlung unla, nin lungril murdi neh nin ringna murdin a sin tho rei.

¹⁴Nin ramah ruatui khah a zoro takah, ruatui tla masa neh ruatui nungkhôn khah nangni pêng a ta, khanchu, buhei, uainhei, riakhei invâng thei nin ti.

¹⁵Nin ranhei fâk rang khom nin ramah loisûlhei om a ti. Nangmani rang khom ifarua nei nin ta, ikhop takkan om nin ti.

¹⁶Ridîn rei; khanonchu, nin lungril khah ilêmin om a ta, pêt nin ta, Pathian danghei sin ithon, chubai ûn duai nin ti.

¹⁷Khangkan a nitin chu PUMAPA khah nin chungah a ning thik a ta, rivân chu khâr a ta, rua insûr no nia, rinêng khan irâ isua no nia; khanchu, PUMAPA nangni ipêk ram iṭha tak ata khah nin irmang zel rang a nit.

¹⁸“Hi thupêk hei hih nin lungrilah vong mai unla, nin riatmaina rangin nin ibânah khuap unla, nin ichalah khim rei.

¹⁹Khahei khah nin naihei inrisei nin ta, nin inah nin iṭhung lâi hei, lampuiah nin lôn lâi hei, nin zâl rangin hei, nin thoi nung hein nin isîr mai rang a nit.

²⁰Khante, nin kotbâi ngul hei, nin dâikot khârheiah nin riziak rang a nit.

²¹Khanchu, PUMAPA nin Pathianin nin pi neh puhei ipeh ranga ṭongrikhâma a înkung ramah khan nangmani neh nin naihei damsung sûn kha insei nîng a ta, rinêng hi rivânin arkhû sungkah chu kha ramah khan om mai nin ti.

²²“A thupêk nangni kî pêk murdi hih ṭhatnemringai takkan zôm rei: PUMAPA nin Pathian chu lungthlung unla, a thupêk angkan om unla, amah itûn richel ngit rei.

²³PUMAPA khan nin matonah hi nam murdihei hih nangni ûm isua pêk a ta, nangmani nêka roinpui ual neh ritha nei ual namhei ram chu chuan nin ti.

²⁴Nin kephaa nin ichuang kangân chu nin ram ni thiai mai a ta, nin ram hualsung chu sim tiang ramchâra rithokin mâr tiang Lebanon tlâng idên nîng a ta. Sak tiang Eufratis vadunga rithokin thlang tiang Mediteranean tuipui idên nîng a ti.

²⁵Tute nangni lei idan thei rêng rêng om no nih. PUMAPA nin Pathianin nin zianga a înkung tâk angkah khan nin fena ram murdia mihei khan nangmani ṭin, rilônthingin in-om a ti.

²⁶“Ringaita u, vuanah hin nin makungah ṭhatvurna neh vânisâmna kî sia a nit;

²⁷Vuaninta nangni kî pêk PUMAPA nin Pathian thupêkhei hih nin zômin chu ṭhatvurna nîng a ti.

²⁸Khannisela, PUMAPA nin Pathian thupêkhei kha nin zôm no a, nin iriat ngai ino pathian danghei chubai iûn ranga nin pêtin chu vânisâmna nîng a ti.

²⁹Khante, nin va chuan rang ram kha PUMAPA nin Pathianin nangni a ṭhui inlût tikin chu, Gerizim tlângah ṭhatvurna hi inpuang nin ta, vânisâmna kha Ebal tlângah nin inpuang rang a nit.

³⁰Kha tlânghei khah Jordan râl tlâk tiang pang Jordan phâia om Kananhei ram, Morea thing iser saso kung omna tlâng, Gilgal kho kôl, ni tlâk tianga om a nit.

³¹PUMAPA nin Pathianin nangni ai pêk ram va chuan rangah khan Jordan dung chu nin irkan rang tâk a nit a; kha ram khah nin va chuana nin om tikin,

³²vuaninta nangni kî pêk dânhei murdi hih iṭha taka zôm rangin nin ridîn rang a nit.