Read Biete DÂNNIKNA 13 Bible Online

DÂNNIKNA 13 - Biete bible

DÂNNIKNA 13

¹“Nin lâiah zânthla manih, rimang phantu manih an hong suak a, risinsiana manih, thil rikhêl manih nangni an inmu a,

²an înpuang angkan risinsiana manih, thil rikhêl manih kha a hong tlung idik a, nin iriat ngai ino, ‘pathian dang zui ei ti u, a sin thông ei ti u,’ nin ziangah an ti khomin,

³khangkana zânthla manih, rimang phantu manih thuhei kha nin ipom rang ni mak. PUMAPA nin Pathian kha nin lungril murdin neh nin ringna murdin lung nin thlung im, lungthlung mak chei im iti riatna ranga PUMAPA nin Pathian khan nangni fiana ranga ai mang a nit.

⁴PUMAPA nin Pathian inung chu zui unla, amah chu ṭi unla, a thupêkhei khah zôm unla, a thusîrhei khah ipom unla, a sinhei tho unla, amah chu nin itûk khap rang a nit.

⁵Khangkana zânthla neh rimang phantuhei kha chu nin that inrimang rang a nit. Aigupta ram ata nangni ṭhui suak a, bôi ata nangni ritlantu PUMAPA nin Pathianin izui ranga thu nangni ai pêk lampui ata khah nangni inpêt ranga PUMAPA nin Pathian chungchânga rihelna thu sîr zânthla neh rimang phantu nin lâia om kha chu nin rithial infâi rang a nit.

⁶“Nen zirpuipa manih, ni naipa manih, ni nainu manih, ni nupui manih, ni rualṭha manih khomin ni chibulhei lai biak ngai ino pathian danghei ibeh rangin nang an ithlêmin zôm no roh.

⁷Nin kôl kianga omhei pathian manih, ram ilah taka omhei pathian manih, rinêng chunga om mi dang pathian rêng rêng ibeh rangin nangni an ithor khomin,

⁸khangkana mihei khan nangni an ithlêm inlîr rang ni mak a, an thu khom nin ringai pêk rang ni mak. Anni khah lunginkham no unla, ithupa inzôk khom nin tum rang ni mak.

⁹Khahei khah nin that ngêt rang a nit. Nangman kut tlâk masa tak ni ta; khanung, mipui murdîn kut an itlâk rang a nit.

¹⁰Lungin nin dêng that rang a nit. Bôi nin nitna, Aigupta rama rithoka nangni ṭhui suaktu PUMAPA nin Pathian ziang ata nangni inpêtna ai zong a nit.

¹¹Khanchu, Israel mi murdîn riang an ta, ṭîng an ta; nin lâiah khangkana siatna rêng rêng khah tutên tho tlak khâi no nih.

¹²“PUMAPA nin Pathianin nin omna ranga nangni ai pêk khuaheiah nin om a,

¹³nin nam lâi ata mi chanlamboi ṭhenkah an hong suak a, an omna khopuia mihei khah nin iriat ngai ino pathian danghei chubai iûn rangin an ṭhui inrimang iti thu thang nin riatin chu,

¹⁴iṭha takkan inrivêl unla, thu dik a lei nit a, khangkana thil porinche itho khah nin lâiah an om ngêt iti nin riat infelin chu,

¹⁵kha khuaa mihei khah khandaiin nin that rang a nit; a sunga mi om murdihei neh an ranhei khom khah nin that riai rang a nit.

¹⁶An neinun murdi khah hong choih vang nin ta, khopui kotsuaah khan nin bûm rang a nit. Khanchu, kha khua neh an neinun murdi khah PUMAPA nin Pathian zianga hâlrivâm thillanin nin hâl inrivâm vang rang a nit; thil ichim ribuk ipông pai ni kumkhua tâng a ta, tutên inding nôk khâi no nih.

¹⁷Kha inrimang vang rang muna thil khah îte nin lâk rang ni mak; khanchu, PUMAPA khan a ningthikna natinsat tak khah iṭhuai a ta, lung nangni inkham a ti. Nin chungah lungkhamlianna nei a ta, nin chibulhei zianga a înkung tâk angkan nangni a înpung rang a nit.

¹⁸PUMAPA nin Pathian rôl ringai unla, vuaninta a thupêk nangni kî pêk hih zôm unla, a lungdo chu sin rei.