Read Biete DÂNNIKNA 14 Bible Online

DÂNNIKNA 14 - Biete bible

DÂNNIKNA 14

¹“PUMAPA nin Pathian mihei nin nit a; khasikin, mithi nin sûnin nin takpum nin ri-ât rang ni mak a, nin ichal sam khom nin voi inkol rang ni mak e.

²PUMAPA nin Pathian ta ranga nam rithiang nin nit a, rinêng chunga nam tin tin lâia a dongtum bîk inih ranga PUMAPA irthlang suak chu nin nit.

³“PUMAPA khan rithiang inoa ai be thil porinche rêng rêng nin fâk rang ni mak e.

⁴A sa nin fâk thei rang chu hihei hih a nit: sial hei, bera hei, kêl hei,

⁵sakhi hei, sarângtun hei, sazuk hei, sarza hei, ramkêl hei, ramsial hei, ram bera hei,

⁶sa tinrêng, a ketin riphala, an bu fâk khâi inchip nôk ngai murdi chu fah thei nin ti.

⁷Khannisela, an ketin khom riphal ino, bu khom khâi inchip nôk khâi ngai ino rêng rêng chu nin fâk rang ni mak. Saringsei hei, zupui hei, zusakhi hei nin fâk rang ni mak; an bu fâk chu an ikhâi inchip nôk ngai a, khan an ketin arphal no sikin nin ta rangin â nim a nit.

⁸Vok hi nin fâk rang ni mak. A ketin chu arphal a; khannisela, a bu fâk â khâi inchip nôk khâi ngai no sikin nin ta rangin â nim a nit. An sa nin fâk rang ni mak a, a ruak khom nin tôn rang ni mak.

⁹“Tuia om hihei hih fah thei nin ti: tuizâp neh lip inei murdi chu fah thei nin ti.

¹⁰Khannisela, tuizâp neh lip nei ino murdihei chu fah thei no tin u, nin ta rangin â nim a nit.

¹¹“Iva rithiang murdi chu fah thei nin ti.

¹²Hihei hih chu nin fâk rang ni mak: musimpui hei, simbu hei, mukhâi hei, muduk hei, rimu chi rêng rêng hei, vasatel hei, vaâk hei, osṭik hei, bual iva hei, varingsei hei, peloi hei, dîl iva chi rêng rêng hei, vathitôk hei neh ibâk hei.

¹⁹“Mîringte rithla nei ke lika lôn chi rêng rêng chu â nim a nit a, nin fâk rang ni mak.

²⁰Â vuang thei mîring rithiang chu fah thei nin ti.

²¹“Mîring a tôta thi sa rêng rêng nin fâk rang ni mak. Nin khosunga ram dang mi omhei fâk rangin peh thei nin ta; a nit nole ram dang mihei ziangah zuar thei nin ti. Khannisela, nangni chu PUMAPA nin Pathian ta ranga nam rithiang nin nit. “Kêltete manih, beratete manih kha a puinu dûtin nin suang rang ni mak.

²²“Kum tin nin loia vâng murdi sômka khatkah nin khâi inran rang a nit.

²³PUMAPA nin Pathian ṭina châng nin hong riatmai theina rangin sômka khatkah, nin buhei, nin uainhei, nin riakhei; nin ranhei lâia suak masa takhei khah amah chubai ûnna ranga mun ai bîkah khan ichôiin PUMAPA nin Pathian maah nin fâk ngai rang a nit.

²⁴PUMAPA nin Pathianin amah chubai ûnna ranga mun ai bîk khah nin in ata a lat rai a, PUMAPA nin Pathianin ṭhat nangni ai vur ata nin sômka khatkah thillan khah lampui a sôt rai a, nin chôi thei non chu,

²⁵zuar unla, aman khah lah unla, PUMAPA nin Pathianin amah chubai ûnna ranga mun ai bîkah khan, a suma chôiin nin fe rang a nit.

²⁶Kha sum khah nin lungrila nin inuam tak, sial manih, bera manih, uain manih, zufâng manih nin irzuk tak khah richông nin ta, kha munah khan PUMAPA nin Pathian maah nin insungkua kan fâng nin ta, râiifân takkan nin om rang a nit.

²⁷“Nin khuaa om Levia chihei kha iṭhul ibua tlak no rei; nin lâiah dongtum richon khom îte an inei ino a nit.

²⁸Kum ithumkah a vun kum ikipah kha kuma nin thil invâng murdia sômka khatkah kha bûm nin ta, nin omna khuaah nin sia rang a nit.

²⁹Amakhah nin khuaa om Levia chihei, nin lâia dongtum nei inohei khan fâng an ta; khualmihei, farahei neh numeihei khom khan an fâk rang a nit. Anni khah hong an ta, an nang lam takkan an lâk rang a nit. Khangkan nin thon chu PUMAPA nin Pathianin nin kut sintho murdiah khan ṭhat nangni ai vur rang a nit.