Read Biete DÂNNIKNA 15 Bible Online

DÂNNIKNA 15 - Biete bible

DÂNNIKNA 15

¹“Kum sarika dan ikipah lâkai nin înritânghei khah nin izâ rang a nit.

²Izâ rang dân chu hingka hi a nit: Israel mi rêng rêngin a Israel champui lâkai inritâng sela, kum sarina kum mongah chu â zâ rang a nit a; a lâkai khah a ṭhîng nôk rang ni khâi mak; PUMAPA ngêiin a lâkai ritâng khah a înboi pêk tâk a nit.

³Nam dangin nin lâkai an irtâng chu ṭhîng thei nin ta; khannisela, nangmani mihein nin lâkai an lei irtâng chu nin thîng rang ni mak.

⁴“PUMAPA nin Pathianin nin chuan ranga nangni ai pêk ramah khan ṭhat nangni ai vur ngêt rang a nit.

⁵PUMAPA nin Pathian thu nin zôm a, vuaninta nangni kî pêk, a thupêk murdi hih ṭhatnemringai takka nin zômin chu mi inriang rêng rêng om no tin u.

⁶PUMAPA nin Pathian khan nangni a înkung pêk angkan ṭhat nangni vur a ta, nam itam takkah lâkai inritâng nin ta; khannisela, nangmanin chu ritâng no tin u. Nam itam takka chungah thu nei nin ta; khannisela, nangmani chungah khan chu thu nei no nih.

⁷“PUMAPA nin Pathianin nangni ai pêk rama nin kho sunga om sa, nin chipuihei lâiah inriang an omin chu nin chipui inriangte chungah khan nin lungril inkhir no unla, nin tik inseh no rei.

⁸Khanêkan chu an chungah khan riphal unla, an risamnaah khan an nang lam angkan lâkai nin inritâng rang a nit.

⁹‘Ngaidam kum, kum sarina khah a hong itlung rang tâk,’ itin nin suapui inriangte khah mumâkin, îte peh nuam iloiin, nin lungrilah dik ino taka ngaituana om loi rangin ridîn rei; khanonchu, ani khan nin chunga a nuarna thu PUMAPA ziangah ithlun duai a ta, nin ta rangin thiamno changna nîng a ti.

¹⁰Lungril iphal takkan peh unla, lungril inmûr khapkan peh no rei; khangkan nin pêkin chu PUMAPA nin Pathianin nin sintho murdiah neh nin kutsintho murdiah ṭhat nangni ai vur rang a nit.

¹¹Nin ramah khan nin chipui Israel mi inriang chu an iom mai rang a nit a; khasikin, an chungah nin tik inthlâi ngêt rangin thu nangni kî pêk a nit.

¹²“Nin chipui Israel mi, ipa manih, nupang manih bôi rangin nin ziangah a hong rizuarin chu, kum irukkah nin sin a tho zoiin chu a kum sarina kumah khan chu nin isua rang a nit.

¹³Nin isua tenah khan kut korongin nin isua rang ni mak.

¹⁴PUMAPA nin Pathianin ṭhatvurna nangni a îndong berahei, buhei, uainheia rithokin tik ithlâi takkan nin sem rang a nit.

¹⁵Aigupta ramah khan bôi nin lei nit tâk a, PUMAPA nin Pathianin nangni a irtlan a nit iti kha nin riat mai rang a nit; khasikah khan a nit, atûnah hin hi thu hih nangni kî pêk a nit.

¹⁶“Khannisela, nin bôi khan nangmani neh nin insungkua a kan sik neh nin iduam sikah khan nangni mah loia nin zianga om mai a nuamin chu,

¹⁷nin inkotbâia ṭhui nin ta, â kuar iver nin ta; khanchu, a dam sung chu nin bôi ai nit rang tâk a nit. Khangkah khan nin bôinu khom kha nin tho rang a nit.

¹⁸Bôi isua khah thil intak okin ringai no rei. Kum irukka sung rilofa sin bâkinikah ai sin tâk a nit. Khangkan tho unla, PUMAPA nin Pathianin nin sinthona kipah ṭhat nangni vur mai a ti.

¹⁹“Nin sial neh bera suak masatak achal murdihei chu PUMAPA nin Pathian ta rangin nin pêk rang a nit; serâtchal suak masatak kha sin ithoa nin mang rang ni mak a, nin bera khom suak masatak kha a mul nin voi rang ni mak.

²⁰Kum tin PUMAPA nin Pathian maah, amah chubai ûnna ranga mun ai bîkah khan nin insungkua kan nin fâk rang a nit.

²¹Khannisela, a ke bâi manih, a mit idel manih, demkâina nei tak kangân chu PUMAPA nin Pathian ziangah ribôlnan nin mang rang ni mak.

²²Khangkana demna omhei kha chu nin insungah nin fâk rang a nit a; sakhi sa, sazuk sa nin ifâk angkan mi rithianghei neh rithiang inohei khomin hi sa hi chu nin rêngkan fah thei nin ti.

²³Khannisela, a thisen chu nin fâk tlak rang ni mak; tui angkan rinêngah nin bun paih rang a nit.