Read Biete DÂNNIKNA 16 Bible Online

DÂNNIKNA 16 - Biete bible

DÂNNIKNA 16

¹“Abib[4] thla a hin PUMAPA nin Pathian ta rangin Kalkan Kût nin mang ngai rang a nit. Abib thla a hin a nit, PUMAPA nin Pathian khan Aigupta ram ata zânah nangni ai ṭhui suak a nit.

²Amah chubai ûnna ranga PUMAPA mun bîkah khan, nin sial manih, bera manih, kêl manih, PUMAPA nin Pathian ziangah Kalkan Kût rangin nin lan rang a nit.

³Ibai chol ipol neh hi sa hih nin fâk rang ni mak. Nin damsung kârkah Aigupta ram ata nin suak nî khah nin riatmai theina rangin sûn sarika sung ibai chol pol ino, ituang entîrna ibai khah nin fâk rang a nit. Aigupta ram ata rimot takka nin hong suak rangtoa nin ifâk angkah khan nin fâk rang a nit.

⁴Nin ram sung rêng rêngah sûn sarika sung chu, chol rêng rêng nin insungah a om rang ni mak. A sûn khatnî kholoia nin thillan, sa nin ithat kha, kha zân zelah khan nin fâk zoi ngêt rang a nit.

⁵“PUMAPA nin Pathianin nangni ai pêk rama nin omna kho sungah Kalkan Kût ribôlna khah nin lan rang ni mak.

⁶PUMAPA nin Pathianin amah chubai ûnna ranga mun ai bîk bangah khan nin Kalkan Kûtna rang kha, kholoi ni tlâk rangto, Aigupta ram nin hong mâk zoro angkana khan nin lan rang a nit.

⁷PUMAPA nin Pathianin amah chubai ûnna mun ai bîkah khan but nin ta, nin fâk rang a nit, atûk zîngah chu nin puan in tiang kîr nôk thei tâng nin ti.

⁸Sûn rukka la om sung khom khah bairiam ringot nin fâk rang a nit, a sûn sarinî-ah khan chu PUMAPA nin Pathian ta ranga inkhômpui rithiang nei nin ta, îte sin nin tho rang ni mak e.

⁹“Nin bu ât phutnî-a rithokin hapta sarikah tep nin ta,

¹⁰khanchu, Pôl Kût nin mang rang a nit. PUMAPA nin Pathianin ṭhatvurna nangni ân dong lam angkah takin nin învâng lâi ata amah chôiinrisângna rangin mahni lungdoa thillan khah nin lan rang a nit.

¹¹Khante, PUMAPA nin Pathianin amah chubai ûnna ranga mun ai bîkah khan nin naihei, nin bôihei, nin khuaa om Levia chihei, nin lâia om ram dang mihei, naifarahei, numeihei neh khan PUMAPA nin Pathian maah râiifân takkan ruai nin iṭhe rang a nit.

¹²Aigupta ramah khan bôi nin lei nit tâk iti nin riatmai rang a nit; hi dânhei hih ridîn takkan nin zôm rang a nit.

¹³“Nin rîzôlah buhei nin zâp zoi a, nin sômkhur ata nin grephei khom nin sôm zoi riai tenan chu sûn sarika sung Dângdi Kût nin mang rang a nit.

¹⁴Nangmani neh nin naihei, nin bôihei, nin khua om Levia chihei, ram dang mihei, naifarahei, numeihei neh khan râiifân takkan ruai nin iṭhe rang a nit.

¹⁵PUMAPA nin Pathianin mun ai bîkah khan PUMAPA nin Pathian chôiinrisângin sûn sarika sung ruai nin iṭhe rang a nit. PUMAPA nin Pathianin nin thil tho murdia neh nin kut sintho murdiah ṭhat nangni a vur sikin râifânin nin lôm rang a nit.

¹⁶“Kum tin nin lâia ipa murdihei chu PUMAPA maah, PUMAPA nin Pathianin amah chubai ûnna rang mun ai bîkah khan ṭum ithumkah an hong ilang ngai rang a nit; Kalkan Kût, Pôl Kût neh Dângdi Kût a hin. PUMAPA maah kut khorongin nin hong rilang rang ni mak e.

¹⁷Mi tinin PUMAPA nin Pathianin ṭhatvurna nangni ân dong lam angkah takin nin thei lam lam nin pêk rang a nit.

¹⁸“PUMAPA nin Pathianin nangni ai pêk khua murdiah nin nam dung izuiin roirêltuhei neh ruaituhei nin riphun chit rang a nit; annihei khan thleibîkna boiin mipuihei roi ifel takkan an rêl pêk rang a nit.

¹⁹Dik ino takkan roi an rêl rang ni mak; tute ditsak bîk an nei rang ni mak; fâkinrûk rêng rêng an lâk rang ni mak; fâkinrûk khan mivârhei mit ân del pêk ngai; mi dikhei chung thu khom dikino takkan a înrêl ngai a nit.

²⁰PUMAPA nin Pathianin nangni ai pêk ram khah iring idamin nin chuan a, nin om mai theina rangin â dik neh â fel bang khah nin zôm rang a nit.

²¹“PUMAPA nin Pathian mâichâm nin siamna kôlah khan Aseri rilim, thing nin phun rang ni mak.

²²Mirmil chubai ûnna rangin lung khom nin phun rang ni mak; khahei khah PUMAPA khan ai nel a nit.