Read Biete DÂNNIKNA 17 Bible Online

DÂNNIKNA 17 - Biete bible

DÂNNIKNA 17

¹“PUMAPA nin Pathian ziangah ribôlnan demkâina nei serât manih, bera manih khah nin lan rang ni mak; amakhah PUMAPA nin Pathian ta ranga thil porinche a nit.

²“PUMAPA nin Pathianin khua nangni ai pêk sunga om ipân manih, nupangin manih, Pathian nuamno lam ithôn a thuthlung ikhiak sela,

³pathian danghei chubai iûnin an sin a va tho a, PUMAPA nin Pathianin chubai ûn loi rang ai ti, inî hei, ithla hei, ârsi hei khi chubai iûn om ta sela,

⁴khangkana mi kha an om iti nin riatin chu, ṭhatnemringai takkan ridon nin ta, â idik iti ifel takkan nin riat a, khangkana thil porinche tho khah Israelhei lâiah an om nin riatin chu,

⁵kha thil isual ithotu, ipa manih, nupang manih khah kulpui kotbâi putiang ṭhui nin ta, lungin idêng that rang a nit.

⁶Nikhomsela, thuretu inika manih, ithumka manih hein a chung châng thu â dik iti â retu an om bangin kha mi khah ithat rang a nit; thuretu khatkah banga rithokah khan chu ithat rang ni mak e.

⁷Thatna ranga khan thuretuhei khan lungin dêng masa an ta, khanung mipuihei khan an dêng rang a nit. Khangkah khan nin lâi ata khah thil ṭhanohei chu nin rithial inboi rang a nit.

⁸“Mi thisen isua chungchâng chângripal a nit neh nitno thu heiah, sum neh puan chungchâng thu heiah, ritôk rihêm thu heiah, ringo rikhalna thu rêng rêng heiah nin ranga rêl intak rai nin khuaah a hong omin chu, PUMAPA nin Pathianin amah chubai ûnna ranga mun ai bîkah khan fêng nin ta,

⁹Levia chi, thiampuhei neh kha lâia roirêltuhei ziangah khan nin thubuai khah dar nin ta, anmanin thu thlûkna nangni an isiam pêk rang a nit.

¹⁰Khanchu, nangmanin PUMAPA mun bîka rithoka thu thlûkna nangni an siam pêk lam angkah takah khan nin rêl rang a nit.

¹¹Thu thlûkna an isiam khah ipom nin ta, nangni an lei înrisei murdi khah nin zui rang a nit; thu thlûkna nangni an isiam pêk ata kha voitiang manih changtiang manih nin pêt rang ni mak.

¹²PUMAPA nin Pathian makunga sinithoa om ngai thiampuhei neh roirêltuhei thu ipom loi a, tho tên tên kangân chu, kha mi khah ithat rang a nit; khangkan Israel lâia rithokin thil ṭhano khah nin irthial înboi rang a nit.

¹³Khanchu, mi murdîn riang an ta, ṭîng an ta, tho pai pai nôk khâi no nih.

¹⁴“PUMAPA nin Pathianin ram nangni ai pêk nin va tlung a, nin va chuan a, nin va om tenah khan, ‘Ei vêla nam dang murdihei angkah hin rêng nei tâng ei ti u,’ la tîng nin ta;

¹⁵kha tikin chu, nin rêng rang khah PUMAPA nin Pathianin a irthlang a nit ngêt rang a nit; nin nam lâia mi ngêt rêngin nin siam rang a nit. Nam dang, nangmani chipui nino chu nin rêngin siam no rei.

¹⁶Khannisela, rêng khan a sipaihei rang sakor a nei intam rang ni mak a, sakor richoh rangin Aigupta ramah mi a tir rang khom ni mak; PUMAPA khan, ‘Atûna rithokin chu kha tiangah khan nin kîr nôk rang ni mak,’ ai ti a nit.

¹⁷PUMAPA nung a song nona rangin rêng khan nupui a nei intam rang ni mak a; tangka neh rângkachak khom a nei intam rang ni mak.

¹⁸A ram rêngṭhungmuna â ṭhung tenan chu Levia chi, thiampu îkol ngai Dân lekhabu hih lekha dangah inriziak nôk a ta;

¹⁹amakhah â kol mai rang a nit, a damsungin a tep ngai rang a nit; khanchu, PUMAPA Pathian ṭi dân neh a thupêk murdi iamom takka zôm dân hong reh thei a ti.

²⁰Khangkah khan, a lungrilin a chipuihei nêka ṭha ualin ribe no nia, PUMAPA thupêkhei ata pêt tlak no nih. Khanchu, kum isôt takkah inlal a ta, a chi suanpârhei khom Israelhei lâiah rikhûk itam takkah inlal an ti.