Read Biete DÂNNIKNA 18 Bible Online

DÂNNIKNA 18 - Biete bible

DÂNNIKNA 18

¹“Thiampu richi Levihei khan chu Israelhei lâiah dongtum ram an nei rang ni mak a; PUMAPA zianga meia thillanhei neh thillan dang danghei mîn an hong ilanhei khah ifan an ring rang a nit.

²An chipuihei lâiah anmani tumin ram nei no nia; an dongtum chu PUMAPA înkung angkan amah PUMAPA zianga thillan kha an dongtum chu a nit.

³“Ribôlna hong ilan mipuihei ata thiampuhei dongtum rang chu hihei hih a nit: serâtchal manih, bera manih ilan a nitin chu a dâr neh â biang kiang ruaikah neh a sungkua kha thiampu an pêk rang a nit.

⁴Nin buhei, nin uain hei, nin oliv riakhei vâng masa murdihei khah thiampu nin pêk rang a nit; nin bera mul voi masatakhei nin pêk sa rang a nit.

⁵PUMAPA nin Pathianin ama riminga sinithoa kumkhuaka om rangin nin nam murdi lâi ata Levi namhei hih a irthlang a nit.

⁶“Levia richi, mi tukhom a nuam ngânin chu Israel rama a omna khua tak khôk ata khom, PUMAPAN amah chubai ûnna ranga ai bîk munah khan hong thei a ti.

⁷Amakhan Levia chi mi danghei angkah ngai ngaiin PUMAPA a Pathian rimingin sin tho thei a ti.

⁸Thiampu danghei dongtum dôrkah ifah rua kha a dong sa rang a nit; ama insungmihein an hong ithon chu a khâtin nei thlep thei a ti.

⁹“PUMAPA nin Pathianin nangni ai pêk ram nin va tlung tikah khan, kha muna om namhei thil porinche tho ngaihei khah nin tho rang ni mak.

¹⁰Nin naihei kha ribôlnan nin mâichâma meia hâlrivâm rangin nin lan rang ni mak; khabanah, âien isonghei, thlasân isonghei, dôithiamhei,

¹¹dôiinvêt ithiam hei, ramrili neh riman va ruai isong hei, mithi sôn isong mihei nin lâiah an om rang ni mak.

¹²Hi thil itho song mi murdihei chu PUMAPA ringaiin mi porinche an nit a; khasikah khan kêng hi thil porinche tho namhei khah PUMAPA nin Pathianin nangni ai ûm isua pêk a nit.

¹³PUMAPA nin Pathian maah khan nin ṭhat rikip rang a nit.

¹⁴“Kha nin va chuan rang rama namhei khan thlasân neh ai-en isonghei thu an ipom ngai a; khannisela, nangni chu PUMAPA nin Pathianin khangkana tho khah nangni ai phal ino a nit.

¹⁵PUMAPA nin Pathian khan nin chipuihei lâia mi, keima angkana, zânthla nangni zuang pêng a ti, a thu khah nin ringai rang a nit.

¹⁶“Horeb tlânga nin ribûm nî-ah khan, PUMAPA nin Pathian maah, ‘PUMAPA kin Pathian rôl khah nen reh khâi non la, hi mei natinsat tak hih nen mu nôk khâi no roh, kin ithi rang kêng,’ itin nin ngên a.

¹⁷Khanchu, PUMAPA khan ki ziangah, ‘An ngênna chu â dik a nit.

¹⁸An chipuihei lâia mi nangma angkana zânthla tir pêk ki ta; a bâiah ki thuhei siang ki ta, a zianga thu kî pêk murdi khah an ziangah isîr a ti.

¹⁹Ani khan ker mingin thu sîr a ta, ker minga a thusîr pom ino murdi chu keiman kuttum thông ki ti.

²⁰Khannisela, kî tir nino, ker minga thusîrtu zânthla kha chu ithat rang a nit; pathian danghei riminga thusîrtu zânthla khom kha ithat rang a nit.

²¹“‘Nin lungrilin, zânthla thusîr kha PUMAPA a rithok a nit neh nitno ingkan im kin riat thei rang a?’ nin ti thei; amahih â thlei rang dân chu a nit.

²²Khan, zânthla khan PUMAPA rimingin thu â sîr a, a thil isîr khah a hong tlung idik noa, lo a tluk non chu, amakhah PUMAPA îsîr nino a nit. Kha zânthla khan ama nitna songa a îsîr a nit a, ani khah nin ṭi rang ni mak.