Read Biete DÂNNIKNA 19 Bible Online

DÂNNIKNA 19 - Biete bible

DÂNNIKNA 19

¹“An ram nin lua pêk rang namhei khah PUMAPA nin Pathianin ân rimang a, an ram nin va chuan a, an khuahei nin dong a, an inheiah nin om tenan chu,

²PUMAPA nin Pathianin nangni ai pêk ram kha mun ithumkan ṭhen nin ta, mun khatka tah khan zôkna khopui khatkah chit om a ta, â pan iol a nit rang a nit. Mi tukhomin miriam a that duaiin chu kha khuaah khan itlân lût thei a ta, an lei înzôk rang a nit.

⁴Mi khatkan chângripalin mi dang tu manih, â râl khom nino a that duaiin chu kha mi thattu khah zôkna khopui khatka khôkah khan itlân lût a ta, zôk a ti.

⁵Mi pasal inikah ramah thing ila rangin an fe a, an thing lâknaah a rei iha arthuat a, a champui khah a va dêng that tâk a, khangkana heiah khan mi thattu khah kha khua khatka khôkah khan itlân lût a ta, ai zôk rang a nit.

⁶Khua khatkah bang ni ta sela, a lampui sôt vit a ta, mithi suapui khan a ningthik ritêlin phuba la ranga rizûlin môk phâk a ta, chângripala mi thattu khah ai that rang a nit. Â râl khom nino chângripala ai that a nit sikin kha mi khah ithat inrup lak ni mak a.

⁷Khasikah khan kêng khua thumkah ibîk rangin nangni kî ti a nit.

⁸“PUMAPA nin Pathianin nin pi neh puhei zianga ṭong a lei irkhâm angkana nin pi neh puhei ipe a înkung ram khah nangni a pêk a, PUMAPA nin Pathianin nin ramrî ân rizat tenan chu,

⁹zôkna khopui ithumkah nin bôk sa rang a nit. (PUMAPA nin Pathian chu lungithlung rang neh a lampui izui mai ranga a thupêk murdi, atûna nangni kî pêk hih nin zômin chu kha ram khah nangni pêng a ti.)

¹⁰Khangkan nin tho rang a nit; khanchu, PUMAPA nangni ipêk ramah khan mi ningsiat sin inohei thisen isua no unla, mi ningsiat sin inohei thisen chungah khom rinangna nin nei rang ni mak.

¹¹“Khannisela, mîn a bungtualbôma mi a nel sikin ruang a chuan a, a that a, kha khopui khatka khôkah khan itlân lût thei a ti.

¹²Khangkana thilah khan chu ama omna khua ulianhein koi an ta, ai that tâk suapui, thisen phuba latu rang ziangah khan pêng an ta, ani khan a lei ithat rang a nit.

¹³Lung nin inkham rang ni mak, nin ta ranga ṭhatna rangin Israel nam ata mi ningsiat sin ino thisen isuana khah nin inboi rang a nit.

¹⁴“PUMAPA nin Pathianin nangni ai pêk ram, nin va chuan rang rama matona an lei iphun tâk nin rî richôipuihei ramrî khah nin thon rang ni mak.

¹⁵“Mi a siatna manih, a sualna manih thiamno inchang rangin chu thuretu khatkah bang chu a înrup ino a nit. Thuretu inika manih, ithumka manih bâia rithoka thuhei bangin mi thiamno inchang rang a nit.

¹⁶Thuretu fel ino takin mi tu manih thil thônsuala ân tumin chu,

¹⁷an ruaikan PUMAPA chubai ûnna munah fêng an ta, kha zoroa thiampuhei neh roirêltuhei maah khan an iding rang a nit.

¹⁸Roirêltuhei khan iṭha takkan kha thu khah sui an ta; thuretu khah riatpuitu der a nit a, a chipui khah milaka ai nô a nitin chu,

¹⁹a chipui chunga itho a lei itum angkah takah khan a chungah nin tho rang a nit. Khangkah khan nin lâia thil ṭhano om khah nin inboi rang a nit.

²⁰Khanchu, mi murdi khan riang an ta, ṭîng an ta, hi nungnakanah khom tutên khangkana thil ṭhano rêng rêng kha nin lâiah an itho nôk khâi inoh rang a nit.

²¹Lung nin inkham rang ni mak; ringna sika ringna, mit sika mit, ha sika ha, kut sika kut, ke sika ke a nit rang a nit.