Read Biete DÂNNIKNA 2 Bible Online

DÂNNIKNA 2 - Biete bible

DÂNNIKNA 2

¹“A nungkhônah chu PUMAPA thupêk angkan ei kîr nôk a, Tuipui Sen lampuiah ramchârah ei lût tâk a; Edom tlângram chu isôt takkah ei vêl a.

²“Khanungchu PUMAPA khan a ne sôn a,

³‘Hi tlâng hih nin vêl sôt ok tâk; mâr tiang ipanin rithon ta rei.

⁴Edom tlângram pâl nin ta, Esauva richi nin suapuihei ram khah nin ipâl thleng rang a nit a; anni khan nangni lei ṭi ok an ti.

⁵Khanniseh, annihei risualpui loi rangin ridîn rei, an ram khah kepha tiakkah khom nangni kî pêk ino rang a nit. Seir tlângram khah Esauva richihei dongtum ranga kî pêk tâk a nit,’ a ti a.

⁶An zianga rithokin bu neh tui chu richoh thei nin ti.

⁷“PUMAPA nin Pathianin lam tinrêngah ṭhat nangni a vur ngai tlia khah remai rei. Hi ramchâr rizat taka nin rivâk vêl lâiah khan nangni a donsui a. Hi kum sômilika sungah hin ani chu nin ziangah a om mai a, îte risam viat loiin nin iom a nit.

⁸“Khanchu, ei fe mai a, Seir tlânga om, Esauva richi, ei suapuihei ram khah ipâl thlengin, Elath neh Ezion-Geber ata Tuipui Ithi panna lampui khah ilôiin, mâr sak tiang rikualin Moab ram tiang ei fe tâk a.

⁹“PUMAPA khan ki ziangah, ‘Lota richi Moab mihei khah inbuai no unla, risualpui no rei. An dongtum rangin Ar khopui chu kî pêk tâk a nit; an ram khah nin dongtum rangin nangni kî pêk ino rang a nit,’ a ti a.”

¹⁰(Matonah khan chu Anakhei angkana mi lian neh mi risâng tak, richi rol nam Emim an itihei kha Ar khuaah hin an lei iom ngai a nit.

¹¹Khahei khom khah Anakhei angkah ngira Refaimhei iti an nit a; khannisela, Moabhei khan Emimhei an iti ngai a nit.

¹²Matonah khan chu Edom ram Seir khomah hin Horhei khom an om sa ngai a; khannisela, Esauva richihei hin an ûm isua a, an that a, an mun khah an ilua pêk tâk a nit; Khangkah ngirin Israelhei khomin PUMAPA ram pêka lei iom an irâlhei khah an iûm isua a nit.)

¹³“Khanungchu, PUMAPA thupêk angkan Zered vadung ei rikan a.

¹⁴Kades-Barnea ei mâka rithoka Zered vadung ei rikan sung hi kum sômithumka iriatkah a nit. PUMAPA lei iti tâk angkah khan, kha rikhûka râlkâp mi murdi chu an irmang riai tâk a nit.

¹⁵An rimang riai mâkah chu kha mihei khah PUMAPA khan ai tûr khap a nit.

¹⁶“Khangkan mipui lâi ata râlkâp mi murdi an rimang zoi riai nungin chu,

¹⁷PUMAPA khan ei ziangah,

¹⁸‘Vuanah hin Moab ram chu Ar kho lampuia fen nin ipâl thleng rang a nit.

¹⁹Lota richi Amonhei ram va tlung nin ta, anni khah inbuai no unla, risualpui no rei. Kî pêk tâk an ram kha ichîntekah khom nin dongtumin nangni kî pêk ino rang a nit,’ a ti a.”

²⁰(Hi ram khom hi Refaimhei rama ringai a nit; kha mun khomah khan matonah khan chu Refaimhei an lei om ngai a, Amonhei khan hi mihei hih Zamzumimhei an iti ngai a nit.

²¹Anakhei angkan an lianin an risânga, mi itam tak an nit a, richi rôl an nit. Khannisela, PUMAPA khan ân rimang pêk a; Amonhei khan an ram khah an lâk pêk a, an ilua pêk tâk a nit.

²²Edom tlângrama om Esauva richi Edomhei ta rang khomin khangkah ngirah khan PUMAPA khan ai tho pêk a nit. Horhei kha ân rimang pêk a; khanchu, Edomhei khan an ram khah an lâk pêk a, an lua pêk tâk a, atûn tenan an iom thal tâk a nit.

²³Mediteranean tuipui rikam chu Kret tuihuala rithoka hong mihei khan an ilua mai a nit. Anni khan lei om masa a ram mi Avimhei khah an rûn inrimang a; khanchu, an ram murdi sim mong Gaza khopui idênin an ilâk pêk tâk a nit.)

²⁴“Moab ram ei pâl thleng nungah khan PUMAPA khan, ‘Atûnah hin rithok unla, Arnon vadung kha rikan rei. Hesbona om Amorhei rêng Sihona neh a ram khah nangni kî pêk tâk a nit. Anni chu rûn unla, a ram khah lua pêk ta rei.

²⁵Vuaninta rithokin chu vân nuaia nam tin indôpin siam tâng ki ti. Nin thurchi an lei iriat ringot khomin iṭi rilônthingin mi tin om an ti,’ a ti a.

²⁶“Khanungchu, Kedemot ramchâra rithokin Hesbona rêng Sihona ziangah ringeina thu chôiin mi ki tir a.

²⁷‘Ni ram hih lei pâl thleng rong ung. Lamilianah fe thal thal kin ta, voitiang manih, changtiang manih, khom pêt tlak no ning ung e.

²⁸Kin ifâk kin iin murdi khom a man nang pêng kin ti. Kin inuam tak chu Jordan kin rikan a, PUMAPA kin Pathianin a ne ipêk ram kin lût mâkah chu ni ram ipâl thleng rang hi a nit. Edom rama om Esauva richihei neh Ar khopuia om Moabhei khomin an ram ipâl thleng an ne iphal a nit,’ ki ti a.

³⁰“Khannisela, Sihona khan a ram ipâl thleng ne phal mak a. Ani chu ei inê a, atûna ei ilua mai ram hi ei lâk pêk theina rangin PUMAPA khan a lungril ân khir pêk a, tuklul ilianin ai siam a nit; atûn tenan a ram khah ei idong thal tâk a nit.

³¹“Khanungchu, PUMAPA khan ki ziangah, ‘Ringai roh, Sihona neh a ram chu nang kî pêk rang a nit a; a ram khom lah pêk unla, lua rei,’ a ti a.

³²Khanchu, Sihona neh a mihei murdi chu Jahaz kho kôlah ne doi rangin an hong rithoka;

³³nikhomsela, PUMAPA ei Pathian khan ani kha ei kutah a ne pêk a. Khanchu, amah neh a naipahei neh a mihei murdi chu ei that riai a.

³⁴Kha rualah khan a khua murdi khah ei lâk a, kha khua miriam murdi ipa, nupang neh naipang an rêngkan ei that inrimang vang a, khatka lua ei izua no a nit.

³⁵A khuaa thil ilu murdi neh ranhei murdi chu râllâk thilin ei dongtum rangin ei ilâk riai a nit.

³⁶Arnon phâi monga khua Aroera rithoka kha phâi inlâina khopui iomhei kha Gilead idêna khuahei murdi khah ei ilâk thei ino zel om loiin, PUMAPA ei Pathianin a ne ipêk riai a nit.

³⁷Khannisela, Amon mihei ram kha chu ei inâi ino a nit, Jabok vadung rikama khuahei manih, tlângrama khuahei manih, PUMAPA ei Pathianin a ne khapna mun murdi kha chu ei inâi ino a nit.