Read Biete DÂNNIKNA 20 Bible Online

DÂNNIKNA 20 - Biete bible

DÂNNIKNA 20

¹“Nin irâlhei idoi ranga nin suak a, sakorhei, tâlihei, nin nêka tam sipai nin mun nin ṭi rang ni mak; Aigupta ram ata nangni ṭhui suaktu PUMAPA nin Pathian chu nin ziangah ai om a nit.

²Ridoi nin phut maah khan thiampu kha hong sela, sipaihei ziangah khan,

³‘O Israelhei, ringai rei, vuanah hin râltuk bualah nin ife rang a nit a. Nin irâlhei khah ṭi no unla, indôp no unla, lungdong lunginzîngin om no rei.

⁴PUMAPA nin Pathian chu nin ziangah om mai a ta, nêna nangni pêng a ti,’ ti riseh.

⁵“Khanungchu, ruaituhei khan mipuihei ziangah, ‘In ithar isina la lan ino nin om im? Â om nin omin chu a inah kîr nôk riseh; khanonchu, ridoinaah va thi duai a ta, mi dangin a in khah lan duai an ti.

⁶Grep rikul isiam a, â râ lar mal phâk ino nin om im? Â om nin omin chu a in tiang kîr nôk riseh; khanonchu, ridoinaah va thi duai a ta, mi dangin rimal duai an ti.

⁷Nupui ihuala la nei ino nin om im? Â om nin omin chu a in tiang kîr nôk riseh; khanonchu, ridoinaah va thi duai a ta, mi dangin a nupui hual khah nei duai an ti,’ itin inpuang riseh.

⁸“Khabanah khan ruaituhei khan mipuihei ziangah, ‘Iṭi rilônthing nin om im? Â om nin omin chu a in tiang kîr nôk riseh; khanonchu, mi danghei lungril khom indôpin siam duai a ti,’ itin inpuang sa riseh.

⁹Khante, ruaituhein sipaihei ziangah thu an inpuang zoiin chu maruaitu rang, a pôl pôla ruaituhei an phun rang a nit.

¹⁰“Khopui va rûn ranga nin va nâiah khan mihei khah nin kuta hong ripeh rangin thu nin pêk masa rang a nit.

¹¹A ṭhat an ti a, an dâikotpui an iong a, nin kutah an ripêkin chu kha khua mi om murdihei khah nin suak chang an ta, ni sin ithotun nin mang rang a nit.

¹²Khannisela, an ripêk nuam noa, nangni lei idoi an rithlangin chu an khua khah sipaiin nin hual khap rang a nit.

¹³Khanungchu, PUMAPA nin Pathianin nin kutah nangni a pêk tenan chu kha khuaa ipa murdi khah khandaiin nin that riai rang a nit.

¹⁴Nupanghei neh naipangtehei, ranhei neh khuaa thil iom rêng rêng kha chu nin ta rangin nin lâk rang a nit. PUMAPA nin Pathianin nangni ai pêk nin irâlhei ata râllâk thil murdi kha nin mang rang a nit.

¹⁵Nin chuan rang rama khopui ni no, ram ilavita khua murdihei nin lâk tikin khom khangkah khan nin tho rang a nit.

¹⁶“Khannisela, PUMAPA nin Pathianin nangni ai pêk ram sunga khuahei nin rûnin chu rithuak inei murdi nin that infâi vang rang a nit.

¹⁷PUMAPA nin Pathianin thu nangni ai pêk angkan Hit mihei, Amor mihei, Kanan mihei, Periz mihei, Hiv mihei, Jebus mihei kha nin inrimang vang rang a nit.

¹⁸An pathian chubai ûnnaa an itho ngai thil porinche murdihei kha nangni an inrisei nona rangin nin that riai rang a nit; khanonchu, PUMAPA nin Pathian chungah thil nin ithonsual duai rang a nit.

¹⁹“Khopui ila nin tum a, kha khua khah isôt takah nin hual khomin khantaka theikunghei kha chu nin iphûr rang ni mak. Â râ khah fah unla, a kung chu iphûr no rei, thingkung kha chu nin irâl ni mak e.

²⁰Â râ fah ngai ino thinghei kha chu iphûr thei nin ta, irâlhei khua chu nin lâk ma khomin nin irâlhei doina mangrua rangin mang thei nin ti.