Read Biete DÂNNIKNA 21 Bible Online

DÂNNIKNA 21 - Biete bible

DÂNNIKNA 21

¹“PUMAPA nin Pathianin nin lua ranga nangni ai pêk ramah khan kho kôl kiangah ruak lei om ta sela, â thattu lak iria no ni ta sela,

²nin ulianhei neh nin roirêltuhei khah fêng an ta, mithi ruak omna rithoka kôlvêla khuahei kâr rilat dân kha an rikhî rang a nit.

³Khanungchu, a ruak omna rithoka khua nâi tak khuaa ulianhei khan serâtrila, sin ithoa la mang tlak ngai ino rithlang an ta;

⁴kha khua ulianhei khan serâtrila khah tuinâr iring luangna kôlah kâi an ta, rinêng la tukilet ngai nona neh îte la phun ngai nona mun richamah khan serâtrila ring khah an iherkhiak rang a nit.

⁵Levia chi thiampuhei khom kha munah khan an fe sa rang a nit, anni kha mithat thubuai neh ritôk rihêm thubuai rêng rêng â rêl infeltu rang an nit. PUMAPA nin Pathianin ama sinithotu rang neh ama riminga ṭhatvurtu ranga a înkunghei an nit.

⁶Khanungchu, ruak nâina tak kho ulian murdihei khan serâtrila ring an îherkhiak chungah khan an kut risûng an ta;

⁷‘Hi mi thisen hih isua mang ung a, â thattu khom kin iriat ino a nit.

⁸O PUMAPA Aigupta ram ata ni hong iṭhui suak ni mi Israelhei hih izâ roh. Ne ngaidam inla, hi mi ningsiat sin ino miriam thisen mo hi kin chungah bâng no roh,’ an ti rang a nit.

⁹Khangkah khan PUMAPA mitmua thil iṭha thon mi ningsiat sin ino thisen mo kha nin chungah ibâng ai nit ino rang a nit.

¹⁰“Nin irâlhei irûn ranga nin fe suak a, PUMAPA nin Pathianin nin kutah nangni a pêk a, suakin nin ṭhui a,

¹¹suaka nin iṭhui lâiah nupang mêl iṭha, nin mi dit lam tak, nupuia nin inei nuam nin mun chu,

¹²nin inah ṭhui nin ta, a lu voi inkol a ta, a kuttinhei pai a ta,

¹³a silbomhei rithleng a ta, nin inah om a ta, thlaka sung a nu neh a pa sûn a ta; kha rizoiah khan nupuiin nin nei rang a nit.

¹⁴Nungah nin idit khâi no tenan chu â tlongin nin isua rang a nit. Nupui angkan nin lei nei tâk sikin suak enkolin nin enkol rang ni mak a, sum neh puanin nin zuar rang khom ni mak e.

¹⁵“Mîn nupui inikah a nei a, naiipa an nei pêk seng seng a; a nupui idit ino nu nai khah a nupui idit ual nu nai nêka khan a ulian a,

¹⁶a naihei ziangah archon a sem pêk tikah khan a îdit ual nu naipa khah a îdit ual ino nu naipa nêka ulian ualin a siam rang ni mak.

¹⁷A nai ulian ual kha, a nupui idit ual nai ni no khom seh, rangtum inikah a pêk rang a nit. A râtna rithling zung masa a nit a, nai lutîr dongtum kha a dong rang pial a nit.

¹⁸“Mîn naipa tuklulilian tak, rihel ngai nei sela, a nu neh a pa thu ôi iloiin, an isôina ipom nuam no sela;

¹⁹a nu neh a pa khan an kho ulianhei ziangah a kho kulpui kotbâi kôlah an ṭhui rang a nit.

²⁰An kho ulianhei ziangah khan, ‘Hi kin naipa hih tuklulilian tak neh rihel tak a nit a, kin thu khom ôi nuam mak a; sum neh puan ichêk a, inrui ngai mi a nit,’ an ti rang a nit.

²¹Khanchu, khuaa mi murdi khan lungin an dêng that rang a nit; khangkah khan nin lâi ata kha thil ṭhano khah nin rithial inboi rang a nit. Amakhah Israel mi murdîn riang an ta, ṭîng an ti.

²²“Mîn thina rang rak sual a sin a, ithat a nit a, thinglêrah nin ikhâiin chu,

²³a ruak khah thingah khan zântluanin a om rang ni mak, kha nî ngêiah khan nin phûm rang a nit; thinga khâi kangân chu Pathian vânisâm a nit sikin PUMAPA nin Pathianin nin lua ranga nangni ai pêk ram kha nin innim nona rangin ruak khah nin phûm rang a nit.