Read Biete DÂNNIKNA 22 Bible Online

DÂNNIKNA 22 - Biete bible

DÂNNIKNA 22

¹“Nin chipui, Israelhei serât manih, bera manih rimang kha nin mun chu nin dâirek rang ni mak a, a inah nin ṭhui pêk rang a nit.

²Khannisela, â neitu kha nin kôl inâia om a nit non manih, â neitu kha nin riat non manih a nitin chu, nin in tiang ṭhui nin ta, â neitun a hong zong tik tikah nin lei pêk rang a nit.

³Sakuartung rimang nin mun manih, silbom rimang nin rûtin manih, thil inrimang nin imuhei rêng rêng chungah khom khangkan nin tho rang a nit.

⁴“Nin chipui, Israel sakuartung manih, serât manih lampuia lum ibâ nin mun chu nin en ṭian rang ni mak a, nin kâi ithoi ngêt rang a nit.

⁵“Nupangin ipa thlukthlan an rivo rang ni mak a, ipa khomin nupang thlukthlan an rivo rang ni mak e; PUMAPA nin Pathian ringaiin porinche a nit.

⁶“Thinga manih, rinênga manih iva ribu apuinun a te manih, artui manih, a op lâi nin mun, a puinu khah nin man pêk rang ni mak.

⁷A tete kha chu la thei nin ta; khannisela, apuinu chu isua ngêt ngêt rang a nit; khanchu, nin ring nin dam sôt a ta, vângisakin om nin ti.

⁸“In ithar nin sinin, nin inchung kha nin rikul khap rang a nit; khanchu, tu mi khom a tlâk a, a thi duai khomin, a mo phur no tin u.

⁹“Nin grep rikulah khan thei dang nin phun sa rang ni mak. Khanonchu, nin grep irâ neh thei dang irâ, kha rikula vâng murdi khah PUMAPA dongtum ai nit rang a nit.

¹⁰“Serâtchal neh sakuartung munkan ringkol inribâtin rinêng nin intuk rang ni mak.

¹¹“Samul neh risom pat ikhông ripol puan nin ribel rang ni mak.

¹²“Nin puanhei a môr ilikah khan a môrkâi nin siam chit ngai rang a nit.

¹³“Mîn nupui a nei a, nungah chu idi nôk khâi mak a;

¹⁴khanchu, ani khan, ‘Hi nupang hih ki nei a, khan nungâk rithiang a nitna mu mang e,’ itia mualphoi taka a siam a, arming â siat pêkin chu,

¹⁵kha nupang nu neh pa khan kul kotbâiah khan kho ulianhei ziangah nungâk rithiang a nitna rinei zâna puantha thisen ikop khah an hong inlang rang a nit.

¹⁶Nungâk pa khan ulianhei ziangah, ‘Hi mi hih ki nainu ken nei a, atûn chu idi khâi mak a,

¹⁷dik ino takkan, ki nainu hi nungâk rithiang a nitna mu mang e,’ itin mualinphoi takkan a siam a; khannisela, hihei hih ki nainu nungâk rithiang a nitna chu a nit hite tîng a ta; khanchu, kha kho ulianhei maah khan rinei zâna puantha thisen ikop kha ân lang rang a nit.

¹⁸Khanungchu, kha kho ulianhei khan kha mi khah ṭhui an ta, kut tum thông an ti.

¹⁹Israel nungâk rithiang riming â siat sikin tangka sekel rizakah inchôi an ta, a nupangnu pa khah an pêk rang a nit. Kha mi khan nupuiin nei mai a ta, a dam sungin ṭhen thei no nih.

²⁰“Khannisela, kha mi hong iti thu khah â dik a nit a, nungâk rithiang a nitna a hong inlang non chu,

²¹nupang kha a pa kotbâiah ṭhui suak an ta, a omna khua mihei khan lungin an dêng that rang a nit. Israel mihei lâiah thil porinche tak ai tho a nit, kha nupang khan a pa inah a la om lâi, pasal a nei maah khan ipa a lei irmunpui tâk a nit. Khangkah khan Israelhei lâia thil isual porinche tak kha nin rithial inboi rang a nit.

²²“Mi dang nupui ichâipuitu chu a nupang neh an ruaikan ithat rang a nit. Khangkah khan Israelhei lâi ata thil ṭhano kha nin inboi rang a nit.

²³“Nungâk rithiang, mi nupui hual kha, khosungah min a châipuiin chu,

²⁴an ruaikan khopui putiang ṭhui suak nin ta, lungin nin dêng that rang a nit; nungâk kha khosunga om ṭiankan â khêk no sikin a thi rang a nit; ipa kha mi nupui hual riming â siat sikin a thi rang a nit. Khangkah khan nin lâi ata thil ṭhano khah nin inboi rang a nit.

²⁵“Khannisela, nungâk rithiang, mi nupui hual kha min ramkârah zâlrâtin a siatpuiin chu â sehpuitu ipa bang khah ithat rang a nit.

²⁶A nungâk chungah khan chu kut itlâk rang ni mak, thina rang inrup sual îte tho mak e. Hingkana thuhei hi chu mi a bungtualbôm risualpuia that angkah a nit.

²⁷Ipa khan mi nupui hual nungâk khah ramkârah a va tong a, zâlrâta ai siatpui a nit a, kha nungâk khan â khêk a, khan â san rang tute an iom ino a nit.

²⁸“Mîn nungâk rithiang tute ihual ino a mu a, a man a, a châipuiin chu,

²⁹â châipuitu ipa khan nungâknu pa ziangah khan nupui man balam tangka sekel sômringakah a pêk rang a nit. Nungâknu khah a nupui nîng a ta, arming â siat pêk tâk sikin a dam sungin ṭhen thei no nih.

³⁰“Tutên mahni pahei nupui izâlpuiin an pahei mualphoi an sak rang ni mak.