Read Biete DÂNNIKNA 23 Bible Online

DÂNNIKNA 23 - Biete bible

DÂNNIKNA 23

¹“Mi â serru koi manih, â sertluan itan manih chu PUMAPA mihei ribûm lâiah an ṭang rang ni mak.

²“Zâinai kha PUMAPA mihei ribûm lâiah an ṭang rang ni mak a; rikhûk sôm idênin an richihei kha PUMAPA mihei ribûm lâiah an ṭang rang ni mak.

³“Amon mihei neh Moab mihei kha an richi suanpâr rikhûk sôm idên rak ten khomin PUMAPA mihei ribûm lâiah an ṭang rang ni mak.

⁴Aigupta rama rithoka nin hong suak lâiah khan bu neh tui nangni an pêk nuam no sik neh vâni nangni sâm ranga Mesopotamia rama Pethor khuaa Beora naipa Balaama an iruai sikah khan.

⁵Khannisela, PUMAPA nin Pathian khan Balaama thu khah ipom nuam mak a, PUMAPA nin Pathian khan lung nangni a thlung sikin vânisâmna kha ṭhatvurna nangni a închang pêk tâk a nit.

⁶Khasikin, nama nin iding sungkah anmani neh hin ringeina siam no unla, an inṭumna rang khom tiklâi khomin nin ngaitua pêk rang ni mak.

⁷“Edom mihei chu nin thîm rang ni mak, nin suapuihei an nit. Aigupta mihei khom kha nin thîm rang ni mak, an ramah khan nin lei iom tâk a nit.

⁸An richihei khah rikhûk ithumka tena rithokin chu PUMAPA mihei ribûm lâiah khan an ṭang rang a nit.

⁹“Nin irâlhei idoia nin va riakna munah khan thil ṭhano tinrêng ata nin rithiar infâi rang a nit.

¹⁰Nin lâiah tukhom zânah rimang hoi no sika richi thil isuaka porinche nin omin chu riabuk putiang sûn thluanin a om rang a nit, riabukah khan a lût rang ni mak.

¹¹Kholoi ni tlâk rangto tiang tui risil a ta, ni tlâk nungin riabukah khan a hong lût nôk rang a nit.

¹²“Riabuk putiang rithiarna rang mun bîk nei nin ta, amakhan nin fe ngai rang a nit.

¹³Nin mangrua rangin thil rizum[5] chôi nin ta, nin va ṭhungna rangah khan choih inthûk nin ta, amakhan nin rithiar zoiin chu ipil nin vur nôk ngai rang a nit.

¹⁴PUMAPA nin Pathian kha riabukah khan nangmani vêng inzôk rang neh nin irâlhei nangni innê rangin a zuang om mai ngai a; khasikin, nin riabuk khah nin inrithiang rang a nit; khanonchu, nin lâiah thil inim mûng a ta, nangni ai mâkrak rang a nit.

¹⁵“Bôi, a pu ziang ata lâizâm itho a, nin zianga hong iro an omin chu nin tir ikhîr nôk rang ni mak.

¹⁶A nuamna tak khua, a irthlang takah khan nin lâiah a om sa rang a nit; nin nuam nin lo rang ni mak.

¹⁷“Israel mi tute, ipa khom, nupang khom, Tempila nochizuar an chang rang ni mak.

¹⁸Nochizuar man manih, mi porinche man manih khah ṭonginkung len nan PUMAPA nin Pathian inah nin chôi rang ni mak, khangkana Tempil nochizuar kha PUMAPA nin Pathian ringaiin thil porinche tak a nit.

¹⁹“Â pung rizûlin nin suapuihei lâkai nin inritâng rang ni mak; tangka manih, bu manih neh thil dang rêng rêng, â pung rizûlin nin chipuihei nin inritâng rang ni mak.

²⁰Ram dang mihei chu â pung rizûlin inritâng thei nin ti. Khannisela, nin chipuihei chu â pung rizûlin nin inritâng rang ni mak; khanchu, nin va lua rang rama nin kut sintho murdiah khan PUMAPA nin Pathianin ṭhat nangni ai vur rang a nit.

²¹“PUMAPA nin Pathian ziangah ṭong nin inkungin rivuak loiin nin tho zel rang a nit; PUMAPA nin Pathian khan nangni ai ṭhîng ngêt rang a nit a, nin ta rangin sual a hong init rang a nit.

²²PUMAPA zianga ṭonginkung ino hi sual ni ual mak;

²³khannisela, nin lung suaka nin înkung tâk kha nin inkung lam takkan nin tho ngêt rang a nit.

²⁴“Mi Grep rikulah nin fen nin nuam dôrkah nin fâk thei a; khanniseh, nin bêma thunin nin chôi rang ni mak.

²⁵Mi loiah, bu bilah nin lôn lâiin a vui kha ichunin nin fâk thei a; khanniseh, kôidan nin ât rang ni mak.