Read Biete DÂNNIKNA 24 Bible Online

DÂNNIKNA 24 - Biete bible

DÂNNIKNA 24

¹“Mîn nupui a nei a, khan nungah chu a chungah thil imanih a riat sika a mit a tlung khâi non chu rimâkna lekha riziak a ta, pêng a ta, a in ata a tir isua rang a nit.

²Kha nupang khan pasal dang a va nei nôk a,

³kha a pasal nungitah ual khom khan idi nôk khâi mak a, rimâkna lekha arziak a, a pêk a, a in ata tir isua nôk sela, a nitnole, a pasal â nikna kha thi ta sela,

⁴a îkhomah khan a pasal masa khan kha nupang khah a nei nôk rang ni mak a, a ta rangin â nim tâk a nit. Nupuiin a nei nôkin chu PUMAPA ringaia thil porinche ai nit rang a nit. PUMAPA nin Pathianin nangni ai pêk rang ramah khan khangkana sual porinche kha nin tho rang ni mak.

⁵“Nupui nei zoi phing chu ridoinaah a fe rang ni mak a, vântlâng sina rimang rang khomin iphût rang ni mak, kumka sung chu izâ rang a nit; khanchu, a ina omin kumka sung chu a nupui neh râiifân takkan an om rang a nit.

⁶“Mi, lâkai nin inritângin siakhamin a bunôina lung nin irên pêk rang ni mak, mi ringna rên pêk nin init rang a nit.

⁷“Tukhom a chipui Israel mi iru a, bôia siam manih, zuar manih ireh suak a nitin chu kha mi rutu khah ithat rang a nit. Khangkah khan nin lâi ata thil ṭhano kha nin inboi rang a nit.

⁸“Iphâr rî rivoi nin oma a nitin chu Levia chi thiampuhein itho rang an iti khah ridîn takkan nin tho rang a nit; anmani zianga thu kî pêk angkah takin nin tho rang a nit.

⁹Aigupta ram ata nin hong suakna lama Miriami chunga PUMAPA nin Pathian thiltho khah remai rei.

¹⁰“Nin bungtualbômhei thil nin inritângin a siakham rang, thil va lah rangin a inah nin lût rang ni mak.

¹¹Putiang iding nin ta, nin înritângtu khan a siakham kha nangni a hong pêk rang a nit.

¹²Mi inriang tak a nitin chu a puan siakham kha zânah nin dôn pêk ngit rang ni mak.

¹³Inî a tlâkin chu nin pêk nôk rang a nit; zânah ama puan ngêi isil a, a zâl theina rangin nin pêk nôk rang a nit. Khanchu, nin chungah lôm a ta, PUMAPA nin Pathian khom nin chungah lôm a ti.

¹⁴“Nin zianga rilofa mi inriang neh risamhei kha nin chipui Israel mi manih, nin khuaheia om ram dang mi manih khom ni sela an thalo khah nin irên pêk rang ni mak.

¹⁵An thalo kha sin an tho nî sûn ni tlâk ma ngêiin nin pêk ngai rang a nit; mi inriang an nit a, kha an thalo bangah khan an lungril an isia ngai a nit. Nin pêk non chu nin chungah nuar a ta, PUMAPA isam a ta, thil isual itho nin ichang rang a nit.

¹⁶“An naihei thil thôn sual sikah khan an pahei ithat rang ni mak a; an pahei thil thôn sual sikah khan an naihei khom ithat rang ni mak. Mi tin mahni sual sik bangin ithat rang a nit.

¹⁷“Ram dang mihei neh naifarahei roi khah dik ino takkan nin rêl pêk rang ni mak; numei puan khah siakhama rên rangin nin lâk pêk rang ni mak e.

¹⁸Nangni khom Aigupta ramah khan bôi nin lei nit tâk a, PUMAPA nin Pathianin khantak ata kha nangni a irtlan a nit iti nin riatmai rang a nit; khasikah khan a nit hi thilhei hih itho ranga thu nangni kî pêk a nit.

¹⁹“Nin loiah bu nin ât a, fathlu nin mit kâra rel a omin chu nin lâk nôk rang ni mak; ram dang mihei, numeihei, farahei dongtum rang a nit; khanchu, PUMAPA nin Pathian khan nin kut sintho murdiah khan ṭhat nangni ai vur rang a nit.

²⁰Nin oliv irâ voikah nin rimal tâkin chu a rêk khah nin rimal nôk rang ni khâi mak; ram dang mihei, naifarahei, numeihei dongtum rang a nit.

²¹Nin grep voikah nin rimal tâkin chu a rêk kha nin rimal nôk rang ni khâi mak; ram dang mihei, naifarahei, numeihei dongtum rang a nit.

²²Aigupta ramah khan bôi nin lei nit tâk iti nin riatmai rang a nit; khasikah khan a nit hi thil hih itho ranga thu nangni kî pêk a nit.